Dual Panel1Ana’ se penter agateyagi babala’anna eppa’na; oreng sombong ta’ endha’ narema parengeddan.
2Cacana oreng becce’ madhateng kaontongan; oreng se ta’ jujur lebur ka kakerrasan.
3Oreng se te-ngate acaca tanto aman odhi’na; oreng se acaca ban-saromban tanto calaka’.
4Oreng males bannya’ pangaterrona tape tadha’ se ekaolleya; oreng se alako berra’ katekkan sakabbinna pangaterrona.
5Oreng jujur baji’ ka dusa, tengka gulina oreng jahat matodhusan ban ecale oreng.
6Kajujuran ngaobi oreng se loros odhi’na; kajahadan maancor oreng se dusa.
7Badha se gi-masogi, tape sanyatana ta’ andhi’ pa-apa, badha se ken-mamesken tape sanyatana ce’ sogina.
8Oreng sogi kodu makalowar pessena sopaja aman odhi’na; oreng mesken tadha’ oreng se ngara.
9Oreng alem akantha sonar se tar-kataran; oreng jahat akantha damar se mate.
10Kaangkowan pera’ madhateng tokar; oreng se bicaksana endha’ narema pangajaran.
11Kasogiyan se gampang ekaolle gampang keya elangnga; tape arta se epakompol gan sakone’ sajan abit sajan bannya’.
12Mon pangaterro ta’ katekkan ate sompek ta’ karowan; mon pangaterro katorodan, ate gumbira.
13Oreng se ngenthengngagi pangajaranna Pangeran, macalaka’ aba’na dibi’; oreng se atoro’ ka dhabuna Allah bakal narema’a ganjaranna.
14Pangajaranna oreng se bicaksana reya somberra kasennengngan, e dhalem babaja, pangajaran jareya panyalamedda ba’na.
15Oreng se bagus buddina bakal ealemma; oreng se ta’ ekenneng parcaja bakal malarada odhi’na.
16Oreng bicaksana apekker gallu sabellunna alako apa’a bai, oreng budhu ngobral kabudhuwanna.
17Otosan se ta’ bendher madhateng calaka’; otosan se ekenneng parcaja tanto ahasel.
18Oreng se ta’ endha’ edhidhi’ daddi mesken ban nespa; oreng se ngedhingngagi babala’an bakal ehormada oreng.
19Ce’ nyamanna mon ngaolle pa-apa se ekaterro! Oreng budhu ta’ endha’ adina’agi kajahadan.
20Oreng se akanca’an ban oreng bicaksana, bakal daddiya bicaksana; oreng se akanca’an ban oreng budhu, bakal calaka’a.
21Oreng dusa ros-terrosan eserser kasossa’an, oreng becce’ ros-terrosan olle kasennengngan.
22Oreng becce’ nyangkollagi kasogiyan ka na’ potona; artana oreng dusa esempen kaangguy oreng se loros odhi’na.
23Tana kosong bisa ngasellagi kakanan sabannya’na kaangguy oreng mesken; tape lalakon se ta’ adil andaddiyagi tana jareya ta’ elakone.
24Ta’ mokol ana’ artena ta’ neser ka kana’ jareya; mon neser kodu bangal mokol kana’ jareya.
25Oreng becce’ cokop saterrossa, tape oreng jahat kakorangan salanjangnga.