Alkitab Mobile SABDA
[VER] : [MADURA]     [PL]  [PB] 
 <<  Amsal 4 >> 

1Edhingngagi babala’anna eppa’na ba’na, kana’. Gateyagi pateppa’ sopaja ba’na ngarteya.

2Se eajarragi sengko’ ka ba’na reya becce’, daddi ja’ enthengngagi.

3E bakto sengko’ gi’ kene’, sengko’ reya ana’ nonggalla tang oreng towa,

4sengko’ eajari bi’ eppa’. Dhabuna, "Kaenga’e tang babala’an, ja’ sampe’ kaloppae. Jalannagi tang du-petodu sopaja odhi’na ba’na sennengnga.

5Pabicaksana ban papenter! Kaenga’e terros tang babala’an reya, ja’ sampe’ buwang."

6Argai hekmat, tanto hekmat jareya ngaobi ba’na; kaleburi hekmat, tanto hekmat jareya terros ajaga ba’na sopaja teptebba aman.

7Se paleng penting se kodu elakone kaadha’ bi’ ba’na iya areya ba’na kodu aehteyar sopaja ba’na daddiya bicaksana. Apa’a bai se eserser ba’na, se paleng otama iya areya ehteyarragi sopaja ba’na olleya pangarteyan.

8Jungjung patenggi hekmat, tanto ba’na epatenggi keya bi’ hekmat jareya. Gellu’ hekmat jareya, tanto ba’na epadhatengnge kahormadan.

9Hekmat jareya bakal aberri’ana ba’na kembang se eto’or epabagus kaangguy ekagabay jamangnga ba’na.

10Edhingngagi sengko’, na’! Gateyagi pateppa’ tang babala’an reya, tanto ba’na pas lanjang omor.

11Sengko’ la ngajarragi hekmat ka ba’na ban noduwagi carana odhi’ se bendher.

12Mon ba’na odhi’ kantha jareya, ba’na ta’ kera nemmo alangan e bakto ajalan, ban ta’ kera tatandhung e bakto berka’.

13Kaenga’e terros pangajaran se etarema ba’na dhari sengko’. Jaga pateppa’, sabab kalaban pangajaran jareya ba’na tanto ahasel e dhalem odhi’na.

14Ja’ noro’ cara odhi’na oreng jahat, ban ja’ nerowe tengkana reng-oreng jareya.

15Ja’ agateyagi reng-oreng jareya! La’-mala’ jauwi ban ba’na ajalan terros!

16Oreng jahat ta’ bisa tedhung sabellunna ngalakone se ta’ becce’, ta’ ngantok sabellunna macalaka’ oreng laen.

17Kajahadan ban kakejjemman reya akantha kakanan ban nom-enoman monggu ka reng-oreng jareya.

18Jalanna oreng jahat petteng akantha malem. Sokona tatandhung laju labu ta’ kalaban tao sababba. Sabaligga jalan se elebadi oreng becce’ akantha moncarra are; sajan abit sajan tera’, sampe’ dhi-budhina tera’ tar-kataran.

19(4:18)

20Edhingngagi tang ca’-oca’ reya, na’. Edhingngagi tang babala’an.

21Ja’ buwang, sempen terros e dhalem atena.

22Oreng se paham ka jareya bakal odhi’a ban baras.

23Jaga atena ba’na pateppa’, sabab atena ba’na nantowagi jalanna odhi’na ba’na.

24Ja’ sampe’ ba’na ca’-ngoca’ barang se ta’ bendher. Jauwagi caca lecek ban caca se emaksoddagi ngeba’a oreng ka jalan se sala.

25Mowana ba’na kodu nyonarragi kajujuranna atena; ta’ parlo ba’na top-notobi maksod se ta’ becce’.

26Pekker pateppa’ sabellunna ngalakone apa’a bai, sopaja ba’na bisa’a ahasel e dhalem sakabbinna ehteyarra.

27Jauwi se jahat, pajujur odhi’na. Ja’ nyempang dhari jalan se bendher.


  Share Facebook  |  Share Twitter

 <<  Amsal 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel