Dual Panel1Kaenga’e tang ca’-oca’, na’, ban ja’ kaloppae apa se eparenta’agi sengko’ ka ba’na.
2Toro’ tang babala’an sopaja odhi’na ba’na senneng. Toro’ tang pangajaran pagu-onggu akantha mon ba’na ajaga bigina matana dibi’.
3Kaenga’e terros tang pangajaran jareya kabbi, sempen e dhalem atena.
4Anggep hekmat reya menangka taretanna ba’na ban pangataowan menangka kanca kenthella.
5Hekmat bakal majauwa ba’na dhari babine’ se nakal, dhari babine’ se kalaban ca’-oca’ se manes aehteyar matagiyura atena ba’na.
6E settong are sengko’ ngabas dhari candhelana tang bengko.
7Sengko’ nangale’e lalake’an se gi’ ngodha ban gi’ ta’ andhi’ pangalaman; tape e antarana badha settong se budhu, bi’ sengko’ oreng jareya eabas terros.
8E bakto para’ compet are ban la molae petteng, oreng jareya lan-jalanan e lorong e seddi’na luk-bilugan se semma’ ka bengkona settong oreng bine’.
9(7:8)
10Babine’ jareya oreng se ta’ betta neng e bengkona. Ja’-sakejja’ badha e penggir lorong, saellana pas badha e lon-alon, otabana manjeng e parapadan. Tengkana bangal ban ta’ tao todhus. Sengko’ nangale’e babine’ jareya kalowar akalambi akantha sondel, nyander ka lalake’ se ngodha gella’, katonna andhi’ sajja juba’.
11(7:10)
12(7:10)
13Lalake’ se gi’ ngodha jareya egellu’ sarta eseyom. Pas ngoca’ kantha reya, tadha’ todhussa,
14"Are mangken kaula kodu ngessa’agi neyat, ban kaula ampon ngatorragi kurban.
15Ganeka sababba aponapa kaula me’ kalowar nyareya sampeyan, sopaja sampeyan adha’ar e compo’ kaula. Samangken kaula ampon apanggi sareng sampeyan!
16Ranjang kaula ampon epobuwi sepere dhari kaen se ana-barna dhari Messer,
17sareng eparo’om ngangguy mennyan, candhana, sareng manes jangan.
18Samangken tore neng-sennengngan kadhuwa’an, ngarassa’agi kobassana asmara samalem benteng.
19Lake kaula tadha’ e compo’, kalerressan ajalanan jau.
20Se mangkat abakta pesse bannya’, ta’ kera abali sabellunna dhu menggu."
21Kantha jareya babine’ jareya nyacae lalake’ gella’ bi’ ca’-oca’ se makapencot ate sampe’ lalake’ jareya tagiyur.
22Ta’ kalaban apekker lalake’ jareya noro’ babine’ gella’ akantha sape se eeret ka pajagalan ban akantha oreng tahanan se egiba kaangguy narema’a okoman se esadhiya’agi kaangguy reng-oreng se budhu;
23sakejja’ aggi’ pana bakal naccegga ka atena sampe’ terbas. Akantha mano’ se ngabber ka jira’, oreng ngodha jareya ta’ apangrasa ja’ odhi’na ngadhebbi babaja.
24Daddi, na’, edhingngagi sengko’. Gateyagi tang babala’an.
25Ja’ sampe’ atena ba’na tagiyur ka babine’ kantha jareya; ja’ entar nyare babine’ jareya,
26sabab la bannya’ lalake’ se eparosak odhi’na. Ta’ kabitong bannya’na se mate polana babine’ jareya.
27Mon entar ka bengkona artena padha ban se nyerang lebat jalan se asemma’an ka pate.