Dual Panel1Ngabidi lahir manossa ta’ gadhuwan kakowadan, ta’ bisa apa-ponapa; odhi’ sakejja’ e dunnya nanggung sangsara.
2Saamponna nyemme pas elop akadi kembang; mosna terros elang akadi jang-bajangan.
3Ya Allah, ba’ kasokana Junandalem ngoladi abdidalem, otabana ponapa Junandalem ngadhebbagiya abdidalem ka pangadilanna Junandalem?
4Ba’ kengenga manossa se buddhak dusa madhateng barang se samporna?
5Omorra manossa sareng Junandalem ampon etantowagi; bannya’na bulanna ampon eteptebbagi. Jugan batessa ampon epamasthe, ta’ kengeng elebadi pole.
6Diggal ja’ rok-erok, me’ olle bu-ambu lesso; ngarassa’agi kobassaepon odhi’na se nyangsara.
7Kajuwan se epoger gi’ gadhuwan pangarebban; nyelbi’ pole, pas aca’-ranca’.
8Sanare e dhalem tana ramo’na kero’, sarengngan bungkella bucco’,
9namong manabi ekenneng aeng pas tombu pole; akadi tamennan se ngodha, selbi’na tombu pole.
10Namong manabi manossa mate, obus caretana; manabi adinggal dunnya, pas e ka’dhimma kennengnganna?
11Akadi songay se asat aengnga, sareng talaga se kerreng dhasarra,
12sapaneka jugan manossa se ampon mate: ta’ kengeng odhi’ pole. Ta’ kera jaga saabidda langnge’ gi’ badha, ta’ kera mella’ pole dhari tedhungnga.
13Erreppagi abdidalem e dunnyana oreng mate; jaga’agi kantos Junandalem ta’ duka pole. Pas tantowagi baktoepon bila Junandalem se emoda ka abdidalem ka’dhinto.
14Sabab manabi manossa mate, ta’ kera bisa odhi’ pole. Abdidalem anante’ sabban are kantos kasangsara’an ka’dhinto mare.
15Saamponna gapaneka Junandalem tanto ngolok, abdidalem badhi nyaot; Junandalem tanto pas neser pole ka abdidalem, mahlok cepta’anna.
16Junandalem tanto pas ajaga tendagga soko abdidalem, namong ta’ kera nalektegi dusa abdidalem.
17Dusa abdidalem tanto epalebbar, kasala’an se ampon lebat tanto epatadha’.
18Pagi’ nong-gunong badhi gujura, gunong bato se koko agingser kennengnganna.
19To-bato bakal egisgisa aeng se santer gilina; tana bakal eanyo’a ojan se derres gaggarra. Sapaneka jugan Junandalem mamosna pangarebbanna manossa.
20Junandalem makala manossa kaangguy salanjangnga; sareng Junandalem etondhung, eoba robana.
21Na’-ana’na daddi oreng se molja, tape oreng gapaneka ta’ oneng pa-ponapa. Manabi na’-ana’na nespa odhi’na, tadha’ oreng se malae aba’na.
22Se ekarassa namong nyo’nyo’na badanna; se etanggung namong ngennessa atena."