Dual Panel1Zofar nyaot, "Sengko’ peggel ngedhing cacana ba’na daddi bi’ sengko’ ba’na esaodana.
2(20:1)
3Cacana ba’na jareya ya-nyeya tang aba’, tape sengko’ tao baramma se ajawaba.
4Apa ba’na ta’ tao dhari lamba’na, molae manossa buru esaba’ e dunnya,
5ja’ kagumbira’anna oreng jahat pera’ sakejja’, kasennengnganna oreng daraka ta’ saapa abidda?
6Maske daddi oreng raja tenggina sampe’ gan langnge’, cethagga sampe’ nyedding ka ondhem,
7tape oreng jareya bakal mosna’a salanjangnga, elang dhari dunnya kalaban cara se nespa. Reng-oreng se kennal ka aba’na, bakal atanya’a, ‘Dha’ emma oreng rowa?’
8Oreng jareya bakal elanga akantha jang-bajanganna mempe, akantha barang se katon e baja malem elang ta’ etangale’e pole.
9Oreng jareya ta’ etangale’e pole bi’ mata; sarta tadha’ neng e bengkona.
10Sabarang se ekeco’ dhari oreng se malarat, kodu epabali bi’ na’-ana’na.
11Maske oreng jareya gi’ ngodha ban parjuga, sakejja’ aggi’ la daddi abu ta’ aroba.
12Kajahadan ekarassa ce’ manessa e colo’na, se ekalodhu’a eman rassana; daddi esempen e baba’anna jilana sopaja abit ngarassa’agi nyamanna.
13(20:12)
14Tape sanapa’na ka dhalem tabu’na, aoba kakanan jareya daddi racon se ce’ mandina.
15Barang keco’an se la ekalodhu’ maso’ ka dhalem tabu’, kapaksa eota’agi kalowar; Allah se makalowar dhari dhalem tabu’na.
16Oreng jahat bakal ngenoma racon se madhateng balai, oreng jareya bakal mateya akantha se ekekke’ olar se mandi raconna.
17Oreng jareya ta’ kera tao rassana mennya’ jaitun se ce’ bannya’na, otabana susu ban maddu se wa-ngalowa.
18Kaontonganna kodu epabali kabbi; daddi ta’ tao rassana kobassana hasella usahana.
19Sabab oreng jahat jareya nendhes ban ta’ marduli oreng mesken ban malarat, arampas ko-bengko se banne andhi’na.
20Lantaran katama’anna tadha’ batessa, oreng jareya ros-terrosan arassa korang.
21Mon ngakan kabbi epaabi’ epatadha’ karena, daddi kama’moranna ta’ abit omorra.
22E bakto odhi’na la ce’ ma’morra, kasangsara’an ban kasossa’an teba ka aba’na.
23E bakto ngakan ngesse’e tabu’na, Allah ce’ dukana pas ngokom oreng jareya.
24Mon oreng jareya bisa buru lopot dhari peddhang baja bakal loka’a ekenneng pana dimbaga.
25Pana naccek sampe’ aba’na loka; konco’na agalirap terbas ka badanna, daddi atena katako’en ce’ talebadda.
26Tompes dhi’-andhi’na ban sempennanna; oreng jareya ban saessena bengkona ekakan apoy se banne gabayanna manossa.
27Langnge’ mokka’ kajahadanna, bume jaga nangtang aba’na.
28Dhi’-andhi’na kabbi bakal tompessa, sabab Allah talebat dukana.
29Jareya odhi’na oreng durjana, se la etantowagi Allah kaangguy aba’na."