Dual Panel1Elifas ngoca’, "E antarana manossa reya, tadha’ settonga se aguna ka Allah. Oreng se andhi’ akkal buddi pera’ aguna ka aba’na dibi’.
2(22:1)
3Apa gunana ka Allah mon ba’na ajalannagi kasokanna? Apa ontongnga ka Salerana mon odhi’na ba’na samporna?
4Banne polana ba’na tako’ ka Allah, ba’na earane ban eanggep sala,
5tape polana dusana ba’na ce’ bannya’na, tengka polana ce’ juba’na.
6Mon taretanna ba’na ta’ bisa majar otangnga, bi’ ba’na erampas kabbi kalambina.
7Ba’na ta’ aberri’ ngenom ka oreng se pelka’, ta’ matabari ngakan ka oreng se lapar.
8Ba’na ngangguy pangkat ban kakobasa’anna kaangguy arampas sakabbinna tana.
9Ba’na banne pera’ ta’ endha’ atolong para randha, tape na’-kana’ se ta’ andhi’ eppa’ embu’ etendhes keya.
10Daddi sateya bannya’ jebbak e sakalenglengnga ba’na, ban atena ba’na katako’en daksakala.
11Are sajan petteng, ba’na ta’ nangale pa-apa, ba’na tasellem elanyo’ banjir se ce’ rajana.
12Allah reya gu ta’ alenggi e langnge’ se paleng tenggi, nondhu’ ngoladi ka tang-bintang e baba’anna, maske tang-bintang jareya ce’ tenggina?
13Tape ca’na ba’na, ‘Dhu ngagaliya apa Allah rowa, se badha e attassa ondhem ban ta’ bisa ngadili sengko’ ban ba’na?’
14Ba’na nyangka Allah ta’ bisa ngoladi nerbas ondhem se kandel, ban pera’ bisa alomampa e bates e antarana langnge’ ban bume?
15Apa ba’na paggun lebada e jalan se epele reng-oreng jahat?
16Reng-oreng jareya esendhal sabellunna baktona ajal, elanyo’ banjir se ce’ rajana.
17Jareya reng-oreng se bangal nolak Se Mahakobasa, se nyangka Allah ta’ bisa apa-rapa ka aba’na.
18Mangkana Allah se masogi reng-oreng jareya! Sengko’ ta’ ngarte onggu ka pekkerra reng-oreng durjana!
19Reng-oreng becce’ agella’ kaperagen, mon nangale oreng jahat narema okoman.
20Dhi’-andhi’na oreng jahat epaancor, re-karena se gi’ badha tompes ekello’ apoy.
21Daddi, Ayyub, mara atobat ka Pangeran me’ olle ba’na olle kataremtemman. Mon ba’na ajalannagi jareya, tanto ba’na olle kaontongan.
22Tarema apa se eajarragi Pangeran ka ba’na; sempen kabbi e dhalem atena.
23Mara abali ka Pangeran kalaban ate andhap asor, kajahadan e bengkona ja’ paterros.
24Buwang emmassa ba’na se paleng morne; ontallagi ka dhasarra songay se la ta’ metto aeng.
25Dina Allah Se Mahakobasa me’ daddi emmassa ba’na, ban salakana ba’na se paleng bagus.
26Daddi ba’na tanto ros-terrosan parcaja ka Allah, ban tao ja’ Allah jareya somberra kasennengnganna ba’na.
27Mon ba’na adu’a bi’ Allah tanto ekabbullagi, ban ba’na tanto bisa neptebbi janji.
28Sabarang se elakone ba’na tanto ahasel ros-terrosan, odhi’na ba’na tanto etera’e sonar se terrang.
29Oreng se sombong ekababa’agi bi’ Pangeran, tape se andhap asor epasalamet.
30Allah tanto nolong ba’na mon ba’na ta’ sala sarta mon ajalannagi se daddi kasokanna."