Dual Panel1Ayyub, mara aera’, ba’ badha’a se nyaodi? Malaekat se kemma se bi’ ba’na epentae bantowan?
2Pera’ oreng se budhu pekkerra se mate polana sake’ atena.
3Sengko’ tao nangale’e oreng budhu; odhi’na katon ce’ kokona onggu. Tape daksakala sengko’ abasto bengko kennengnganna.
4Na’-ana’na ta’ tao nemmo pangaoban; tadha’ se abillai e pangadilan.
5Hasel se ekaolle dhari teggalla, tadha’ ekakan oreng se kosong tabu’na. La’-mala’ gandum se badha e tengnga ombut tadha’ epaabi’ reng-oreng se lapar. Sakabbinna dhi’-andhi’na eencer oreng se dhakka ka dunnya.
6Banne dhari bume kalowarra kajahadan, banne dhari tana dhatengnga kasossa’an.
7Enja’, banne! Manossa dibi’ se madhateng kasossa’an ka aba’na akantha tampessa kembang apoy asalla dhari apoyya dibi’.
8Ja’ sakenga sengko’ daddi ba’na, sengko’ tanto aserro ka Allah. Ka Allah sengko’ mamadula, nyareta’agiya tang parkara.
9Se elampa’agi Allah reya lowar biyasa, ta’ kera epahame bi’ manossa. Jat-mo’jijat badhiyanna, ta’ kabilang bannya’na ban tadha’ ambuna.
10Allah matoron ojan ka bume, teggal ban talon padha eserame.
11Jareya Allah se matenggi oreng se mandhap ban masenneng oreng se sossa.
12Epabuddhu rancanana oreng se salenter, ejebbak ban etangkep oreng se penter, sampe’ ehteyarra ta’ daddi kabbi, ekenneng tepo ban akkalla dibi’.
13(5:12)
14E baja seyang reng-oreng jareya ngadhebbi papetteng, ga’-raga’an akantha e baja malem.
15Tape Allah masalamet ban malopot oreng mesken dhari pate, oreng se ta’ andhi’ dhari seksa’anna oreng laen.
16Sateya badha pangarebban pole ka oreng se mesken. Oreng jahat ta’ metto caca, edunggem colo’na bi’ Allah.
17Pojur ba’na mon bi’ Allah eparengeddi! Ja’ kene’ ate mon ecale.
18Sabab Allah se masake’ ban Allah keya se nambai. Astana se mokole bariya keya se mabaras pole.
19Mon badha e dhalem babaja ba’na epasalamet terros.
20E mosem laep ba’na ta’ kera kalaparan. E jaman perrang raja ba’na aman ta’ kera mate.
21Ba’na epalopot dhari petenna ba’na ngadhebbi mosiba tadha’ tako’na.
22Ngadhebbi kakejjemman ban kalaparan ba’na tanto kowat, la’-mala’ agella’an. Ba’na ta’ tako’ ta’ kobater ngadhebbi burun alas se galak.
23Teggal se esalaga ba’na ta’ kera badha batona; burun alas ta’ kera nyerrang ba’na.
24Ba’na tanto aman neng e kemahna; ban mon ba’na ngetong ba-dumbana, kabbi salamet, ta’ korang settonga.
25Na’ potona ba’na ta’ kera kabilang, bannya’na akantha rebba e teggal.
26Akantha gandum se massa’, eanye mon dhapa’ baktona, bariya keya ba’na odhi’ segger sampe’ towana.
27Ayyub, bi’ sengko’ jareya la epareksa kabbi. Caca jareya bendher, tarema bai."