Dual Panel1E tanggal settong bulan petto’ ba’na kodu akompol mabadha kabakteyan, ban ta’ olle alako berra’. E are jareya tarompet kodu epamonye.
2Atorragi ka PANGERAN kurban obbaran se aropa sape lake’ se gi’ ngodha settong, dumba lake’ settong, budhu’na dumba lake’ se gi’ aomor sataon papetto’, kabbi kodu padha tadha’ calena. Bauna kurban jareya masenneng panggaliyanna PANGERAN.
3Atorragi keya kurban sasajin se wajib, aropa teppong se ecampore mennya’ jaitun: tello kilo kaangguy sape lake’ settong, dhu kilo kaangguy dumba lake’ settong,
4ban sakilo kaangguy sabban budhu’na dumba settong.
5Atorragi keya embi’ lake’ settong kaangguy kurban pangamponanna dusa. Kalaban cara se kantha jareya ba’na mabadha opacara palebbaranna dusana ommat.
6Tor-ator jareya tamba’agi ka kurban obbaran se eatorragi epabareng ban kurban sasajinna, sabban tanggal settong sabban bulanna. Bariya keya menangka tamba’anna kurban obbaran se eatorragi epabareng ban kurban sasajin sarta kurban aeng anggurra. Bauna kurban obbaran jareya masenneng panggaliyanna PANGERAN.
7E tanggal sapolo bulan petto’ ba’na kodu akompol mabadha kabakteyan. E are jareya ba’na kodu apowasa ban ta’ olle alako berra’.
8Atorragi ka PANGERAN kurban obbaran se aropa sape lake’ se gi’ ngodha settong, dumba lake’ settong, budhu’na dumba lake’ se gi’ aomor sataon papetto’, kabbi kodu padha tadha’ calena. Bauna kurban jareya masenneng panggaliyanna Pangeran.
9Atorragi kurban sasajin se wajib aropa teppong se ecampore mennya’ jaitun: tello kilo kaangguy sabban sape lake’ settong, dhu kilo kaangguy sabban dumba lake’ settong,
10ban sakilo kaangguy sabban budhu’na dumba settong.
11Atorragi keya embi’ lake’ settong kaangguy opacarana pangamponanna dusana ommat, salaenna kurban pangamponanna dusa ban kurban obbaran ren-aren se epabareng ban kurban sasajin sarta kurban aeng anggurra se eatorragi e are jareya.
12E tanggal lema bellas bulan petto’ ba’na kodu akompol kaangguy mabadha kabakteyan ban ta’ olle alako berra’. Paraya’an jareya kodu ebadha’agi pettong are abidda kaangguy ahormadi PANGERAN.
13E are se dha’-adha’ atorragi kurban obbaran, se bauna masenneng panggaliyanna PANGERAN, iya areya: sape lake’ ngodha tello bellas meggi’, dumba lake’ se gi’ ngodha dhadhuwa’, budhu’na dumba lake’ se gi’ aomor sataon pa’ bellas meggi’, kabbi kodu padha tadha’ calena.
14Atorragi keya kurban sasajin se wajib, iya areya teppong se ecampore mennya’ jaitun: tello kilo kaangguy sabban sape lake’ settong, dhu kilo kaangguy sabban dumba lake’ settong,
15ban sakilo kaangguy sabban budhu’na dumba settong. Kurban sasajin jareya kodu eatorragi epabareng ban kurban aeng anggur se wajib.
16Laen dhari jareya kodu eatorragi keya embi’ lake’ settong kaangguy kurban pangamponanna dusa. Kurban jareya menangka tamba’anna kurban obbaran ren-aren sarta kurban sasajin ban kurban aeng anggurra.
17E are se kapeng dhuwa’ atorragi sape lake’ se gi’ ngodha dhubellas meggi’, dumba lake’ dhadhuwa’, ban budhu’na dumba lake’ se gi’ aomor sataon pa’ bellas meggi’, kabbi kodu padha tadha’ calena.
18Salaenna jareya atorragi keya ban-kurban laenna akantha se ekaparlo e are se dha’-adha’, kabbi padha atorragi pabareng.
19(29:18)
20E are se kapeng tello’ atorragi sape lake’ se gi’ ngodha sabellas meggi’, dumba lake’ dhadhuwa’, ban budhu’na dumba lake’ se aomor sataon pa’ bellas meggi’, kabbi kodu padha tadha’ calena.
21Jareya kabbi atorragi pabareng ban ban-kurban laenna akantha se ekaparlo e are se dha’-adha’.
22(29:21)
23E are se kapeng empa’ atorragi sape lake’ se gi’ ngodha sapolo meggi’, dumba lake’ dhadhuwa’, ban budhu’na dumba lake’ se aomor sataon pa’ bellas meggi’, kabbi kodu padha tadha’ calena.
24Jareya kabbi atorragi pabareng ban ban-kurban laenna akantha se ekaparlo e are se dha’-adha’.
25(29:24)
26E are se kapeng lema’ atorragi sape lake’ se gi’ ngodha sangang meggi’, dumba lake’ dhadhuwa’, budhu’na dumba lake’ se gi’ aomor sataon pa’ bellas meggi’, kabbi kodu padha tadha’ calena.
27Jareya kabbi atorragi pabareng ban ban-kurban laenna akantha se ekaparlo e are se dha’-adha’.
28(29:27)
29E are se kapeng ennem atorragi sape lake’ se gi’ ngodha baballu’, dumba lake’ dhadhuwa’, budhu’na dumba lake’ se aomor sataon pa’ bellas, kabbi kodu padha tadha’ calena.
30Jareya kabbi atorragi pabareng ban ban-kurban laenna akantha se ekaparlo e are se dha’-adha’.
31(29:30)
32E are se kapeng petto’ atorragi sape lake’ se gi’ ngodha papetto’, dumba lake’ dhadhuwa’, budhu’na dumba lake’ se gi’ ngodha se aomor sataon pa’ bellas, kabbi kodu padha tadha’ calena.
33Jareya kabbi atorragi pabareng ban ban kurban laenna akantha se ekaparlo e are se dha’-adha’.
34(29:33)
35E are se kapeng ballu’ ba’na akompol mabadha kabakteyan ban ta’ olle alako berra’.
36Atorragi ka PANGERAN kurban obbaran se bauna masenneng panggaliyanna, iya areya: sape lake’ se gi’ ngodha settong, dumba lake’ settong, budhu’na dumba lake’ se gi’ aomor sataon papetto’, kabbi kodu padha tadha’ calena.
37Jareya kabbi atorragi pabareng ban ban-kurban laenna akantha se ekaparlo e are se dha’-adha’.
38(29:37)
39Jareya atoran-atoranna kurban obbaran, kurban sasajin, kurban aeng anggur, ban kurban kasalameddan se kodu eatorragi ba’na ka PANGERAN mon badha paraya’an-paraya’an se wajib. Ban-kurban jareya menangka tamba’anna ban-kurban se la eatorragi ba’na kaangguy ngessa’agi neyat otabana kurban sokalella.
40Mosa manapa’ ka bangsa Isra’il sabarang se edhabuwagi PANGERAN ka salerana.