Dual Panel1Saellana ngedhing parkara jareya, Mordekhai laju nyebbit kalambina, pas akalambi karong menangka tandha sossa. Cethagga eburburi abu, saellana jareya pas ajalan e kottha sambi nanges, panangessa kaja ban ngennes.
2E adha’anna labang sakethengnga karaton Mordekhai ambu, sabab oreng akalambi karong ta’ olle maso’ ka karaton.
3Bariya keya e saneyap propinsi, reng-oreng Yahudi nanges saellana parenta jareya eomommagi. Kabbi padha apowasa, nanges ban aserrowan; bannya’ e antarana se ngangguy kalambi karong ban tedhung alama’ abu.
4E bakto babine’an ban reng-oreng kobiriyan se lakona malolo aladine Dinaju Rato Ester nyareta’agi parkara Mordekhai jareya, Ester talebat sossana. Ester makon oreng ngeba kalambi ka Mordekhai; Mordekhai esoro asalen, kalambi karongnga esoro bukka’, tape Mordekhai ta’ endha’ narema.
5Saellana jareya Ester adikane Hatah, sala settong e antarana reng-oreng kobiriyan se bi’ rato epalako malolo aladine salerana. Hatah esoro atanya ka Mordekhai arapa Mordekhai me’ kantha jareya.
6Daddi Hatah laju entar ka Mordekhai e lon-alon kottha e adha’anna labang sakethengnga karaton.
7Mordekhai nyareta’agi sabarang kadaddiyan jareya ban barampa pesse salaka se ejanjiyagi Haman se epamaso’a ka parbendhahara’anna rato, saellana reng-oreng Yahudi epate’e kabbi.
8Mordekhai magi keya ka Hatah salenanna sorat parentana rato se epakalowar e Susan, se aesse parenta sopaja reng-oreng Yahudi epate’e kabbi. Bi’ Mordekhai Hatah esoro magi sorat jareya ka Ester, ban nerrangngagi parkara kadaddiyan jareya, sarta esoro menta’agi tolong sopaja Ester ngadhep ka rato, nyo’onnagi sopaja rato bellasa ka bangsana.
9Hatah pas nyabis ka Ester sarta manapa’ pessenna Mordekhai jareya.
10Tape bi’ Ester Hatah jareya epakon abali pole ka Mordekhai, epessenne kantha reya,
11"Saneyap oreng, lalake’ otaba babine’, mon ta’ etembali pas ngadhep rato e palataran e dhalem karaton, kodu eokom mate. Jareya monyena dhang-ondhang ban sakabbinna oreng, molae dhari panasehadda rato sampe’ ka ra’yat e si-propinsi, padha tao ka atoran jareya. Pera’ badha settong jalan mon terro lopoda dhari dhang-ondhang jareya, iya areya mon rato nodingngagi tekken emmassa ka oreng jareya. Mon kantha jareya tanto salamet. Tape la sabulan sengko’ ta’ etembali rato."
12Hatah pas manapa’ dhabuna Ester jareya ka Mordekhai.
13Daddi Mordekhai pas aberri’ parengeddan kantha reya ka Ester, "Ba’na ja’ apangrasa lebbi aman dhari oreng Yahudi laenna polana ba’na badha e karaton.
14Maske baramma’a oreng Yahudi masthe olle partolongan sampe’ salamet. Tape mon ba’na neng-enneng malolo e dhalem kabadha’an se kantha reya, ba’na dibi’ tanto mate ban toronanna eppa’na ba’na bakal tadha’a se nerrossagi pole. Sapa tao, pola e dhalem kabadha’an kantha reya ba’na pas epele epadaddi dinaju rato!"
15Daddi Ester makon oreng nyaot kantha reya ka Mordekhai,
16"Pakompollagi sadajana oreng Yahudi se badha e Susan; pakon nyo’onnagi kaula ka Allah. Reng-oreng ganeka pakon apowasa, pakon ja’ neddha sareng ja’ ngenom tello are tello malem abidda. Kaula dibi’ sareng babine’an se aladine kaula apowasa’a jugan. Manabi ampon lastare, kaula pas ngadhebba rato, sanare ta’ kengeng menorot dhang-ondhang. Manabi kaula kodu mate polana ganeka, dinggal ta’ aponapa!"
17Mordekhai pas mangkat, ajalannagi sabarang se epessennagi Ester jareya.