Dual Panel1E bakto reng-oreng Isra’il akompol e Mizpa, kabbi padha ajanji ka PANGERAN ja’ reng-oreng jareya tadha’ settonga se ngedinana ana’ parabanna daddi binena oreng Benyamin.
2Sateya reng-oreng jareya entar ka Betel laju toju’ kalaban ate sossa sampe’ malem e ajunanna PANGERAN. Reng-oreng jareya nanges sambi aserro,
3"Adhu, GUSTE, Allahna Isra’il, aponapa ma’ kodu sapaneka? Aponapa suku Benyamin ma’ laju mosna’a dhari bangsa Isra’il?"
4Kalagguwanna gi’ petteng, ommat Isra’il agabay mezba e jadhiya, pas ngatorragi kurban obbaran ban kurban karokonan ka PANGERAN.
5Saellana jareya reng-oreng jareya laju nyare katerrangan apa e antarana ku-suku Isra’il badha se ta’ entar akompol ngadhep ka PANGERAN e Mizpa sabbanna. (E bakto jareya reng-oreng jareya la asompa ja’ oreng se ta’ entar ka Mizpa kodu eokom mate.)
6Oreng Isra’il neser ka tan-taretanna suku Benyamin jareya, laju padha ngoca’, "Are teya Isra’il kaelangan sala settong dhari sukuna.
7Sateya baramma carana sopaja re-karena oreng Benyamin rowa bisa’a andhi’ bine, sabab sengko’ ban ba’na la padha asompa ka PANGERAN ta’ magiya paraban Isra’il daddi binena oreng Benyamin."
8Daddi reng-oreng Isra’il padha nyare katerrangan apa badha golongan dhari suku Isra’il se ta’ noro’ akompol e Mizpa. Dhi-budhina etemmo ja’ reng-oreng Yabes e Gileyad, tadha’ se noro’a entar ka Mizpa.
9Sabab, e bakto epareksa dhaftarra se hadir e Mizpa jareya nyata tadha’ settonga oreng dhari Yabes.
10Daddi, reng-oreng se akompol e Betel jareya ngerem dhubellas ebu oreng se paleng bangalan e antarana oreng Isra’il, esoro mate’e saneyap oreng Yabes, tamaso’ babine’an ban na’-kana’.
11Reng-oreng jareya esoro mate’e sakabbinna lalake’an, bariya keya saneyap babine’ se la ta’ paraban.
12E antarana reng-oreng se badha e Yabes jareya, reng-oreng Isra’il gella’ nemmo babine’an se gi’ paraban bannya’na pa’ ratos oreng. Ban-paraban jareya kabbi egiba ka parkemahan e Silo se badha e nagara Kana’an.
13Saellana jareya ommat Isra’il ngerem otosan ka reng-oreng Benyamin se badha e nong-gunong bato e Rimon eajak adhame.
14Daddi reng-oreng Benyamin jareya laju abali, bi’ ommat Isra’il pas eberri’i ban-paraban dhari Yabes se gi’ ta’ epate’e. Tape babine’an Yabes jareya ta’ mendhang se egi-bagi ka reng-oreng Benyamin.
15Ommat Isra’il neser ka oreng Benyamin, polana PANGERAN la mapecca kasatuwanna ku-suku Isra’il.
16Daddi, wa-towana ommat se badha e Betel jareya padha ngoca’, "Suku Benyamin ta’ andhi’ babine’an pole. Tape, dhu baramma’a pole; ana’na ba’na ban sengko’ padha ta’ bisa eedine alake oreng Benyamin, sabab sengko’ ban ba’na la padha abasto sapa’a bai e antarana ommat Isra’il se ngedine ana’ parabanna alake oreng Benyamin! Daddi, sateya baramma carana sopaja re-karena oreng Benyamin rowa bisa’a andhi’ bine keya? Ja’ sampe’ bangsa Isra’il kaelangan sala settong dhari sukuna se dhubellas. Daddi, mara sateya nyareyagi jalan sopaja suku Benyamin bisa’a andhi’ toronan saterrossa ban teptep ngaandhi’ tanana."
17(21:16)
18(21:16)
19"Bariya bai," ca’na reng-oreng Isra’il jareya, "badha jalan, iya areya e bakto paraya’an taonan kaangguy ngormadi PANGERAN e Silo." (E lao’na Silo reya badha kottha Betel, e bara’anna badha jalan raja Betel ka Sikhem, ban e dhaja’anna badha kottha Lebona.)
20Daddi wa-towana ommat se akompol e Betel jareya ngoca’ ka reng-oreng Benyamin, "Kassa’ ba’na ngetek e bun-kebbun anggur e Silo,
21e dhissa’ aga-jaga. Mon ban-paraban Silo kalowar atariya saabidda paraya’an taonan kaangguy ngormadi PANGERAN jareya, ba’na kalowar dhari bun-kebbun anggur jareya. Pega’ ban-paraban jareya settong ebang, giba buru ka baba kakobasa’anna Benyamin, kabine.
22Mon eppa’na otaba taretan lake’na paraban jareya entar menta paraban jareya, saodi kantha reya, ‘Diggal pona, paraban paneka eso’ona. Kaula ta’ arebbu’ babine’an paneka e dhalem paperrangan. Jugan banne sampeyan se marengngagi ka kaula, daddi sampeyan ta’ lopot janji, daddi ta’ sala.’"
23Oreng Benyamin ajalannagi babala’an jareya. Daddi padha ngeba buru paraban settong ebang dhari antarana ban-paraban se atari e Silo. Saellana jareya pas abali ka baba kakobasa’anna dibi’; tha-kotthana epaddek pole. Reng-oreng jareya laju neptep e jadhiya.
24Dineng reng-oreng Isra’il laenna mangkat keya, abali ka dhaerana bang-sebang, menorot kaom ban sukuna.
25E jaman jareya gi’ tadha’ rato e Isra’il. Oreng padha ngalakone apa se eanggep bendher bang-sebang.