Dual Panel1He, bangsa Isra’il, ambu ja’ araya’agi re-are raja pole akantha sa-bangsa laen. Ba’na la nyenglae Allahna ban ta’ esto ka Salerana. E saneyap kennengnganna oreng agebba gandum ba’na nyondel ajuwal aba’ ka diba Ba’al ban perak narema gandum se bi’ ba’na eanggep opana dhari diba jareya ka ba’na!
2Tape sakejja’ anggi’ ba’na bakal kakorangana gandum ban mennya’ jaitun ban anggurra ba’na bakal tadha’a.
3Ba’na, he, bangsa Isra’il, bakal ta’ teptebba enneng e tana se eparengngagi PANGERAN ka ba’na reya. Ba’na kodu abali ka Messer, ban kodu ngakan kakanan se haram e Asyur.
4E ra-nagara jareya ba’na ta’ kera bisa ngatorraggi anggur ban kurban keban kaangguy masenneng panggaliyanna PANGERAN. Kakanna ba’na bakal manajjisa saneyap oreng se ngakan kakanan jareya, akantha kakanan se ekakan e bakto opacara pangoburan. Kakanan jareya pera’ aguna kaangguy makennyanga tabu’na ba’na; ta’ kera egiba ka Padalemman Socce menangka tor-ator e dhissa’.
5Mon teppa’na are raja agama kaangguy ahormadi PANGERAN, ba’na ta’ kera bisa apa-rapa kaangguy araya’agi are jareya.
6Mon balai dhateng, ban ba’na egiba ka nagara laen, re-karena ba’na se gi’ odhi’ bakal epakompola bi’ reng-oreng Messer, epateyana ban ebendhemma e Memfis! Lampadda bengkona ba’na ban rang-barang salakana ba’na se ji-aji bakal katopowana rebba ban dhuri.
7Sateya la nappa’ baktona kaangguy narema okoman, baktona kaangguy narema babalessa sakabbinna lalakonna ba’na. Isra’il bakal taowa rassana. Ba’na ngoca’, "Nabbi se ekobasae erroh reya gendheng! Gila!" Ba’na ngoca’ kantha jareya polana ba’na ce’ baji’na ka sengko’ ban dusana ba’na ce’ rajana.
8Sengko’ eotos menangka nabbi bi’ Allah sopaja sengko’ aberri’a parengeddan ka ommadda, tape sengko’ mon entar dha’ emma’a bai bi’ ba’na ros-terrosan eehteyarragi ejira’a epakantha mano’. E nagara kaagunganna Allah dibi’, bi-nabbi akantha sengko’ reya ekamoso ra’yat.
9Tengkana ba’na ce’ juba’na akantha se gi’ badha e Gibeya. Tengkana ba’na se juba’ jareya tanto ekaemodi terros bi’ Allah, ban ba’na bakal eokoma lantaran sa-dusana.
10PANGERAN adhabu, "E bakto Sengko’ buru nemmo Isra’il, Sengko’ perak akantha oreng se nemmo buwana anggur e ra-ara. E bakto Sengko’ dha’-adha’na nangale’e bangatowana ba’na, Sengko’ perak akantha oreng se nangale’e hasel dha’-adha’na buwana ara. Tape e bakto entar ka Gunong Peyor, bangatowana ba’na jareya molae nyemba Ba’al sampe’ padha najjis akantha dibana se ekataresnae jareya.
11Kamolja’anna Isra’il bakal ngabberra elang akantha mano’; ta’ kera badha babine’anna se ngandhung, ta’ kera badha na’-kana’ se elahirragi.
12Tape maske badha na’-kana’ se lahir ban eparaja, bi’ Sengko’ ekala’a, tadha’ se odhi’a. Calaka’ ba’na, he, bangsa Israil, mon ba’na edina bi’ Sengko’!"
13GUSTE Pangeran, abdidalem nengale na’-ana’na oreng Isra’il eser-serser sareng epate’e.
14Ponapa se kodu eso’on abdidalem ka Junandalem kaangguy reng-oreng gapaneka? Pajubeng babine’annepon! Ja’ kantos babine’an gapaneka bisa nyepsebbi babaji’na!
15PANGERAN adhabu, "Kajahadanna reng-oreng jareya molae dhari e Gilgal. E jadhiya Sengko’ molae baji’ ka oreng Isra’il jareya. Bi’ Sengko’ reng-oreng jareya eojuga dhari nagara reya polana lalakonna se jahat. Bi’ Sengko’ ta’ ekaneserrana pole; pamimpinna kabbi padha alaban ka Sengko’.
16Oreng Isra’il bi’ Sengko’ eokoma, epadaddiya akantha men-tamennan se ta’ abuwa, ban se mo’-ramo’na kerreng. Oreng Isra’il bakal ta’ andhi’a ana’; tape maske andhi’ ana’, na’-ana’na se ekaneserre jareya bi’ Sengko’ epateyana."
17Allah se eladine sengko’ rowa bakal nolaga ommadda, sabab ommadda jareya ta’ endha’ ngedhingngagi dhabuna. Ommadda Allah jareya bakal alalana’a e antarana sa-bangsa.