Alkitab Mobile SABDA
[VER] : [MADURA]     [PL]  [PB] 
 <<  Imamat 16 >> 

1Saellana pottrana Harun se kadhuwa padha mate e bakto ngatorragi apoy se ta’ ekasokane PANGERAN, PANGERAN adhabu ka Mosa,

2dhabuna, "Kabala ka Harun taretanna ba’na rowa, mon maso’a ka Rowangan Se Mahasocce se epesa ban bir-tabir rowa, pera’ olle mon teppa’na bakto se la etantowagi malolo, sabab e jadhiya Sengko’ ngaton e dhalem ondhem e attassa kodhungnga Petthe Parjanjiyan. Mon Harun ta’ atoro’ ka parenta reya, tanto mate.

3Mon Harun maso’a ka Rowangan Se Mahasocce jareya kodu ngeba tor-ator sape lake’ se gi’ ngodha kaangguy kurban pangamponanna dusa ban dumba lake’ kaangguy kurban obbaran."

4Laen dhari jareya Harun kodu atoro’ ka atoran-atoran reya. Sabellunna maso’ ka Rowangan Se Mahasocce kodu mandhi gallu, pas ngangguy pangangguyya imam, iya areya kalambi, katho’ pandha’, sabbu’ ban surban, se ekagabay dhari kaen linen kabbi.

5Saellana jareya ommat Isra’il kodu massra’agi embi’ lake’ dhadhuwa’ ka Harun kaangguy kurban pangamponanna dusa ban dumba lake kaangguy kurban obbaran.

6Harun kodu ngatorragi sape lake’ kaangguy kurban pangamponanna dusa kaangguy aba’na dibi’ ban sabalana.

7Embi’ lake’ se dhadhuwa’ gella’ kodu egiba ka adha’anna labangnga Kemah Socce.

8E jadhiya Harun kodu ngellot ngangguy bato dhadhuwa’, bato se settong epobuwi tandha "kaator ka PANGERAN" ban settonganna "kaator ka Azazel".

9Embi’ se kapele kaangguy PANGERAN kodu egabay kurban pangamponanna dusa.

10Embi’ se kapele kaangguy Azazel kodu esaba’ dhi’-odhi’ e ajunanna PANGERAN, pas eagga ka ra-ara kaangguy Azazel, sopaja dusana bangsa Isra’il esapora’a.

11Saellana ngatorragi ban nyambelli sape lake’ kaangguy kurban pangamponanna dusana dibi’ ban sabalana,

12Harun kodu ngala’ baddhana apoy dhari mezba, baddhana apoy jareya kodu eesse’e mardha sarta dupa se alos dhu pergem, pas giba ka Rowangan Se Mahasocce.

13Dupa jareya kodu eobbar e adha’anna Petthe Parjanjiyan, sampe’ okossa notobi kodhungnga Petthe jareya, sampe’ ta’ etangale’e bi’ Harun, sabab mon Harun nangale’e totobba Petthe Parjanjiyan jareya, tanto mate.

14Harun pas kodu ngala’ dharana sape jareya sakone’; dhara jareya pas kodu eketessagi ban garigi’na ka bagiyan adha’na totobba Petthe Parjanjiyan ban pettong kale ka adha’anna Petthe.

15Samarena jareya Harun kodu nyambelli embi’ kaangguy kurban pangamponanna dusana ommat Isra’il. Dharana embi’ jareya kodu egiba ka Rowangan Se Mahasocce, pas eketessagi ka bagiyan adha’na totobba Petthe Parjanjiyan ban ka bagiyan adha’na Petthe, akantha se ngettessagi dharana sape lake’ rowa.

16Kalaban cara se kantha jareya Harun nyocce’e Rowangan Se Mahasocce dhari najjissa bangsa Isra’il ban dhari sa-dusana bangsa jareya. Kemah Socce kodu esocce’e polana badha e nga’-tengnga’anna parkemahanna bangsa Isra’il ban ekenneng najjissa bangsa jareya.

17Molae dhari bakto Harun maso’ ka Rowangan Se Mahasocce ngatorragiya kurban kaangguy pangamponanna dusa jareya sampe’ kalowar dhari jadhiya, ta’ olle badha oreng settonga e dhalem Kemah jareya. Saellana mare ajalannagi opacara kaangguy aba’na dibi’, kaangguy sabalana ban kaangguy bangsa Isra’il,

18Harun kodu kalowar, pas entar ka mezba kennengnganna kurban obbaran kaangguy nyocce’e mezba jareya. Dharana sape ban dharana embi’ gella’ kodu ekala’ sakone’ pas ebuliddagi ka dhu’-tandhu’ e du-padduna mezba.

19Dhara jareya kodu eketessagi bi’ garigi’na sakone’ sampe’ pettong kale ka attassa mezba. Kalaban cara se kantha jareya mezba jareya epasocce dhari najjissa bangsa Isra’il, sopaja daddiya socce.

20Saellana mabadha opacara nyocce’e Rowangan Se Mahasocce ban bagiyan en-laenna e Kemah Socce ban mezbana, Harun kodu ngatorragi ka PANGERAN embi’ se gi’ odhi’ se kapele kaangguy Azazel.

21Tanangnga kodu etompangngagi ka cethagga embi’ jareya sambi ngakowagi sakabbinna kasala’anna, dusana ban sabarang tengkana bangsa Isra’il se ta’ atoro’ ka papakonna PANGERAN. Kalaban cara se kantha jareya sakabbinna kasala’anna bangsa Isra’il ealle ka attassa cethagga embi’ jareya. Pas kodu badha oreng se etugassagi ngagga embi’ jareya ka ra-ara.

22Embi’ jareya ngeba sa-dusana bangsa Isra’il ka tana kajal se ta’ ekennengnge oreng, ban kodu eocol e ra-ara.

23Saellana jareya Harun kodu maso’ ka dhalem Kemah, mokka’ pangangguyya imamma se eangguy baktona maso’ ka Rowangan Se Mahasocce, ban pangangguy jareya kodu edina e jadhiya.

24Saellana jareya Harun kodu mandhi e kennengngan se etantowagi kaangguy kaparlowan jareya malolo, pas asalen ngangguy kalambina dibi’. Samarena pas kodu kalowar ngatorragi kurban obbaran kaangguy pangamponanna dusana dibi’ ban dusana bangsa Isra’il.

25Gajina keban se egabay kurban pangamponanna dusa jareya kodu eobbar e mezba.

26Oreng se ngocol embi’ se kapele kaangguy Azazel e ra-ara rowa kodu nyassa kalambina sarta mandhi sabellunna mole ka parkemahan.

27Sape lake’ ban embi’ se egabaya kurban pangamponanna dusa, se dharana egiba maso’ ka Rowangan Se Mahasocce kaangguy pangamponanna dusa, kodu egiba ka lowaranna parkemahan pas eobbar. Kole’na, dagingnga, essena tabu’na keban se dhadhuwa’ jareya kodu eobbar kabbi.

28Oreng se ngobbar jareya kodu nyassa kalambina pas mandhi sabellunna mole ka parkemahan.

29Atoran-atoran reya kodu etoro’ salanjangnga. E tanggal sapolo bulan petto’, oreng Isra’il ban oreng manca se apolong e antarana bangsa Isra’il jareya kodu apowasa ban ta’ olle alalakon, sabab are jareya are se talebat soccena. E are jareya kodu ebadha’agi opacara kaangguy nyocce’e bangsa Isra’il dhari sakabbinna dusana sopaja daddiya berse.

30(16:29)

31(16:29)

32Imam Agung se la etahbissagi kaangguy aladine Allah malolo menangka gantena eppa’na, kodu ajalannagi opacara kaangguy nyocce’e bangsa jareya. E bakto ajalannagi opacara imam jareya kodu ngangguy pangangguy dhari kaen linen se pera’ ekagabay kaparlowan jareya malolo,

33pas ajalannagi opacara kaangguy nyocce’e Rowangan Se Mahasocce, bagiyan en-laenna e Kemah Socce, mezba, mam-imam ban sakabbinna bangsa Isra’il.

34Opacara jareya kodu ebadha’agi sataon sakaleyan kaangguy nyocce’e bangsa Isra’il dhari sa-dusana. Jareya atoran-atoran se kodu etoro’ salanjangnga. Mosa alampa’agi akantha se edhabuwagi PANGERAN ka salerana.


  Share Facebook  |  Share Twitter

 <<  Imamat 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel