Dual Panel1Saellana opacara pantahbisan jareya la lebat saare, daddi e are se kapeng ballu’, Mosa adikane Harun ban tra-pottrana ban para seppona bangsa Isra’il.
2Dhabuna Mosa ka Harun, "Kassa’ ngala’ sape lake’ se gi’ ngodha ban dumba lake’, se padha tadha’ calena kabbi, atorragi ka PANGERAN, sape lake’na kaangguy kurban pangamponanna dusa, ban dumba lake’na kaangguy kurban obbaran.
3Saellana jareya bangsa Isra’il soro ngatorragi embi’ lake’ kaangguy kurban pangamponanna dusa ban budhu’na sape settong sarta budhu’na dumba settong se omorra padha sataonan ban tadha’ calena, menangka kurban obbaran.
4Reng-oreng jareya soro ngatorragi keya sape lake’ settong ban embi’ lake’ settong kaangguy kurban salameddan. Jareya kabbi kodu eatorragi bi’ bangsa Isra’il ka PANGERAN, pabareng ban kurban sasajin se eola ban mennya’, sabab are teya PANGERAN rabuwa ka adha’anna bangsa Isra’il jareya."
5Kabbi se epessennagi Mosa jareya bi’ reng-oreng jareya egiba ka adha’anna Kemah Socce, ban ommat Isra’il padha akompol e jadhiya, abakte ka PANGERAN.
6Mosa pas adhabu, "PANGERAN makon ba’na ajalannagi reya kabbi sopaja ba’na nangaleyana sonarra kahadiranna PANGERAN."
7Saellana jareya Mosa pas adhabu pole ka Harun, "Mara entar ka seddi’anna mezba, sadhiya’agi kurban pangamponanna dusa ban kurban obbaran akantha se edhabuwagi PANGERAN, sopaja dusana ba’na ban dusana ommat reya esapora’a bi’ PANGERAN."
8Daddi Harun laju nyander ka meja kurban pas nyambelli budhu’na sape lake’ se ekurbannagiya kaangguy pangamponanna dusana dibi’.
9Tra-pottrana Harun ngatorragi dharana sape jareya ka Harun. Harun nyabbur garigi’na ka dhalem dhara jareya, pas ebuliddagi ka dhu’-tandhu’na mezba se pa’-empa’ jareya. Lebbina dharana etotta’ e dhasarra mezba.
10Gajina, bingselanna ban bagiyanna atena se paleng bagus eobbar e attassa mezba, akantha se epakonnagi PANGERAN ka Mosa.
11Tape dagingnga ban kole’na sape jareya eobbar e lowaranna parkemahan.
12Saellana jareya Harun nyambelli keban se ekagabaya kurban obbaran kaangguy aba’na dibi’. Tra-pottrana ngatorragi dharana keban jareya ka Harun, bi’ Harun dhara jareya laju eserammagi ka sakalenglengnga penggirra mezba.
13Saellana jareya tra-pottrana ngatorragi cethagga keban jareya ban bagiyan en-laenna ka Harun, bi’ Harun laju eobbar e attassa mezba.
14Essena tabu’na ban pokangnga pas ebacco, terros eobbar epabareng ban kurban obbaran e attassa mezba.
15Saellana jareya Harun ngatorragi embi’ lake’ menangka kurban pangamponanna dusana ommadda. Embi’ jareya esambelli ban eatorragi akantha se ngatorragi kurban kaangguy pangamponanna dusana dibi’.
16Kurban obbaran jareya ebakta ka mezba, sarta pas eatorragi menorot atoranna.
17Saellana jareya Harun laju ngatorragi kurban sasajin; mondhut teppong sapergem, laju eobbar e attassa mezba. Jareya tamba’anna kurban obbaran ren-aren se eatorragi e baja laggu.
18Saellana jareya salerana laju nyambelli sape lake’ ban dumba lake’ settong ebang menangka kurban salameddanna ommadda. Tra-pottrana ngatorragi dharana keban jareya ban Harun laju eserammagi ka sakalenglengnga penggirra mezba.
19Bagiyanna sape ban embi’ jareya se badha gajina esaba’ e attassa dhadhana keban se dhadhuwa’ jareya,
20laju egiba ka mezba terros eobbar e jadhiya.
21Dhadhana ban pokang kanganna bi’ Harun eatorragi menangka kurban kusus ka PANGERAN. Jareya bagiyanna para imam, akantha se epakonnagi bi’ Mosa.
22Saellana ngatorragi kurban jareya kabbi, Harun ngangka’ astana, epangaceng ka attassa reng-oreng jareya kabbi, aberkadi reng-oreng jareya, samarena laju toron.
23Harun ban Mosa laju maso’ ka dhalem Kemah Socce. Saellana jareya se kadhuwa buru laju kalowar sarta aberkadi ommadda. Ommat Isra’il kabbi laju padha nangale’e sonar kahadiranna PANGERAN.
24Daksakala jareya PANGERAN laju matoron apoy, sampe’ kurban obbaran ban bagiyan-bagiyanna se badha gajina e attassa mezba ekenneng obbar kabbi sampe’ tadha’. E bakto ommat Isra’il nangale’e jareya, kabbi padha asorak, laju asojud.