Alkitab Mobile SABDA
[VER] : [MADURA]     [PL]  [PB] 
 <<  Kejadian 1 >> 

1E bakto Allah nyepta’agi alam dunnya,

2bume reya gi’ ta’ etemmo bangonna ban gi’ ta’ etemmo karowanna kabadha’anna. Kabbi gi’ katotoban tase’ raja. Dineng tase’ raja jareya omba’na raja tor petteng calemodan, tape kobasana Allah ngabang e bagiyan attassa aeng.

3Allah adhabu, "Mara tera’!" Kabadha’an laju tera’.

4Allah ngoladi ja’ tera’ jareya bagus. Se tera’ laju epalaen dhari se petteng.

5Se tera’ jareya eparenge nyama "Seyang," dineng se petteng eparenge nyama "Malem". Malem la lebat pas agante laggu. Jareya are se kapeng settong.

6Allah adhabu, "Mara metto kubah se raja sopaja aeng reya daddiya dhu bagiyan, ban bagiyan se dhadhuwa’ jareya sopaja ta’ acampowa pole." Se edhabuwagi Allah jareya kalakon. Daddi Allah la abadhi kubah se malaen aeng se badha e baba’anna dhari aeng se badha e attasanna.

7(1:6)

8Kubah jareya eparenge nyama "Langnge’". Malem la lebat pas agante laggu. Jareya are se kapeng dhuwa’.

9Saellana jareya Allah adhabu, "Mara aeng se badha e baba’anna langnge’ reya agili akompol ka settong kennengngan, sopaja tana etangaleyana." Se edhabuwagi Allah jareya kalakon.

10Tana jareya eparenge nyama "Tenggangan" ban aeng se masettong eparenge nyama "Tase’". Ban Allah senneng ngoladi jareya.

11Allah laju adhabu pole, "Mara tana makalowar samacemma ka’-bungka’an se ngasellagi gi-bigi ban se ngasellagi wa’-buwa’an." Se edhabuwagi Allah jareya kalakon.

12Daddi tana makalowar samacemma bu-tombuwan se ngasellagi gi-bigi ban wa’-buwa’an. Allah ngoladi ja’ jareya kabbi bagus.

13Malem la lebat pas agante laggu. Jareya are se kapeng tello’.

14Saellana jareya Allah adhabu, "Mara e langnge’ kalowar rang-barang se tera’ sopaja bume tera’a, kaangguy malaen seyang dhari malem, sarta kaangguy noduwagi sa’at parmola’anna are, taon ban are rajana agama." Se edhabuwagi Allah jareya kalakon.

15(1:14)

16Daddi Allah la abadhi barang tera’ se raja dhadhuwa’, iya areya are se ngobasane seyang, ban bulan se ngobasane malem, sarta tang-bintang.

17Jareya kabbi bi’ Allah esaba’ e langnge’ epanera’e bume,

18epangobasae seyang ban malem, sarta kaangguy malaen se tera’ dhari se petteng. Ban Allah senneng ngoladi jareya.

19Malem la lebat pas agante laggu. Jareya are se kapeng empa’.

20Saellana jareya Allah adhabu, "Mara e dhalem aeng agaremmet samacemma mahlok se odhi’, ban e bang-abang pabannya’ mano’ ber-abberran."

21Daddi Allah la nyepta’agi keban tase’ se ja-raja ban samacemma mahlok se odhi’ agaremmet e dhalem aeng, sarta samacemma mano’. Ban Allah senneng ngoladi jareya.

22Allah aberkadi jareya kabbi, dhabuna, "Mara adhu’-budhu’ ban atamba bannya’ mossa’e aeng tase’, ban no’-mano’ sopaja atamba’a bannya’."

23Malem la lebat pas agante laggu. Jareya are se kapeng lema’.

24Saellana jareya Allah adhabu, "Mara bume makalowar samacemma keban, se notot ban se kesset, se raja ban se kene’ sarta keban se agalajar." Apa se edhabuwagi Allah jareya kalakon.

25Daddi Allah la abadhi keban se notot ban se kesset sarta keban se agalajar. Ban Allah senneng ngoladi jareya.

26Saellana jareya Allah adhabu, "Mara sateya ja’ agabaya manossa se merep Sengko’ ban ba’na, sopaja manossa jareya ngobasane bume, ko’-juko’, no’-mano’ ban sakabbinna keban laenna, se notot ban se kesset sarta ban-keban se agalajar e tana."

27Daddi Allah nyepta’agi manossa se merep Salerana dibi’. Manossa se ecepta’agi jareya badha se lalake’ badha se babine’.

28Allah laju aberkadi manossa se lalake’ ban babine’ jareya, sarta adhabu, "Mara ba’na pabannya’ na’ potona sopaja toronanna ba’na mossa’e ban ngobasane bume. Kobasae ko’-juko’ ban no’-mano’ sarta sakabbinna keban laenna.

29Sakabbinna bu-tombuwan se ngasellagi gi-bigi ban wa’-buwa’an bi’ Sengko’ ebagiya ka ba’na menangka kakanna ba’na.

30Tape no’-mano’ sarta ban-keban laenna bi’ Sengko’ eberri’ana rebba ban bu-tombuwan laenna menangka kakanna." Se edhabuwagi Allah jareya kalakon kabbi.

31Allah ngoladi sabarang se ebadhi Salerana jareya ce’ bagussa kabbi. Malem la lebat pas agante laggu. Jareya are se kapeng ennem.


  Share Facebook  |  Share Twitter

 <<  Kejadian 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran