Alkitab Mobile SABDA
[VER] : [MADURA]     [PL]  [PB] 
 <<  Kejadian 25 >> 

1Ibrahim araji pole, olle babine’ se anyama Ketura.

2Rajina jareya ngalahirragi pottra se anyama: Zimran, Yoksan, Medan, Midian, Isybak, ban Su’ah.

3Yoksan reya eppa’na Syeba ban Dedan, ban toronanna Dedan reya oreng Asyur, oreng Letus, ban oreng Leum.

4Na’-ana’na Midian iya areya: Efa, Efer, Henokh, Abida ban Elda’a. Jareya kabbi toronanna Ketura.

5Bi’ Ibrahim sakabbinna dhi’-andhi’na eparengngagi ka pottrana se anyama Ishak;

6tape gi’ odhi’na Ibrahim bannya’ areng-pareng ka tra-pottrana dhari ji-rajina se laen. Saellana jareya tra-pottrana jareya epakon ngalle ka tana e temorra Kana’an, me’ olle padha jau dhari pottrana se anyama Ishak.

7Ibrahim seda e bakto la ce’ seppona, yuswana saratos pettong polo lema’ taon.

8(25:7)

9Bi’ tra-pottrana se anyama Ishak ban Isma’il laju esareyagi e Guwa Makhpela se kennengnganna e teggal e temoranna Mamre. Gi’ lamba’na teggal jareya andhi’na Efron ana’na Zohar, oreng Het,

10tape bi’ Ibrahim la epondhut dhari oreng Het jareya. Sara, rajina Ibrahim, ekoburragi e jadhiya keya.

11Saellana Ibrahim seda, Allah aberkadi Ishak, pottrana Ibrahim. E bakto jareya Ishak alenggi e seddi’anna somor se anyama "Lahai-Roi" se artena "Somorra Pangeran Se Ajaga Sengko’".

12Isma’il reya pottrana Ibrahim ban Hagar, dunorra Sara.

13Isma’il kaagungan pottra dhubellas, menorot giliranna kalahiranna, tra-pottrana jareya iya areya: Nebayot, Kedar, Adbe’el, Mibsam,

14Misyma, Duma, Masa,

15Hadad, Tema, Yetur, Nafis ban Kedma.

16Tra-pottrana Isma’il jareya daddi bangatowana dhubellas suku bangsa, dineng disa ban parkemahanna esebbut menorot ma-nyamana tra-pottrana Isma’il jareya.

17Isma’il seda e bakto yuswana saratos tello polo petto’ taon.

18Toronanna Isma’il jareya ngennengnge dhaera Hawila sampe’ ka Syur se badha e temorra Messer se nojju ka Asyur. Odhi’na tapesa dhari toronanna Ibrahim.

19Areya’ caretana toronanna Ishak pottrana Ibrahim.

20Yuswana Ishak pa’ polo taon e bakto akabin ban Ribka, ana’na Betuwel, oreng Mesopotamia; Ribka jareya taretanna Laban.

21Ishak nyo’onnagi Ribka ka PANGERAN, polana Ribka jubeng. Parnyo’onanna ekabbuli bi’ PANGERAN. Ribka bubut.

22Bubudda kembar. Ban sabellunna babaji’ se dhadhuwa’ jareya lahir, e dhalem gandhu’anna ebuna akeket. Ca’na Ribka, "Arapa sengko’ me’ kodu nyandhang se kantha reya?" Ribka laju nyo’on petodu ka PANGERAN.

23Dhabuna PANGERAN ka babine’ jareya, "E dhalem tabu’na ba’na badha bangsa dhadhuwa’; bangsa se dhadhuwa’ jareya amosowan; se settong akowadan dhari settonganna; se towa’an bakal daddiya abdina se ngodha’an."

24Saellana napa’ baktona, Ribka babar kembar lalake’ kabbi dhadhuwa’.

25Se sareyang kole’na abak mera, akantha juba se ekagabay dhari kaen se abulu, daddi kana’ jareya enyamae Esau.

26Saellana jareya pas kalowar se ngodha’an. E bakto babaji’ se nomer dhuwa’ jareya kalowar, tanangnga neggu’i tombedda Esau ce’ sekkenna, daddi kana’ jareya laju enyamae Yakub. E bakto kana’ se kadhuwa jareya lahir, yuswana Ishak sabidak taon.

27Na’-kana’ se kadhuwa jareya atamba raja. Esau daddi panganjur, ce’ penterra ababurun, lebur enneng e lon-talon ban e ra-ara. Dineng Yakub orengnga anteng ban aleburan enneng e bengkona.

28Ishak aneserran ka Esau polana Ishak dujan ka daging ollena Esau ababurun, tape Ribka aneserran ka Yakub.

29E settong are, teppa’na Yakub aola kacang mera, Esau dhateng dhari ababurun. Tabu’na lapar,

30laju ngoca’ ka Yakub, "Sengko’ ce’ laparra. Mara, ra, sengko’ menta’a kacang merana sakone’." Lantaran jareya Esau enyamae Edom.

31Saodda Yakub, "Iya, mara, tape bagi ka sengko’ gallu ha’ sareyangnga ba’na."

32Ca’na Esau, "Iya, mara. Sengko’ ce’ laparra, kantha se mateya rassana. Apa gunana ha’ sareyang jareya ka sengko’?"

33Oca’na Yakub, "Mara asompa gallu." Esau asompa, ha’ sareyangnga ebagi ka Yakub.

34Bi’ Yakub Esau eberri’i roti ban essop kacang merana. Esau ngakan ban ngenom, saellana jareya laju ondur. Daddi Esau nganggep ha’ sareyang jareya tadha’ gunana.


  Share Facebook  |  Share Twitter

 <<  Kejadian 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel