Dual Panel1E jaman jareya laju badha laep pole akantha gi’ jamanna Ibrahim. Ishak ngadhep ka Abimelekh, ratona oreng Filistin, e Gerar, laju nyo’on edi alenggiya e jadhiya.
2Kan nyo’on kantha jareya polana PANGERAN ngaton ka salerana laju adhabu, "Ba’na ja’ entar ka Messer; neng e nagara reya bai, kantha se la eparenta’agi Sengko’ ka ba’na.
3Sengko’ ajaga’a ban aberkadana ba’na. Tana reya bi’ Sengko’ ebagiya ka ba’na ban na’ potona. Sengko’ neptebbana Tang janji ka Ibrahim ramana ba’na.
4Sengko’ aberri’a ka ba’na toronan sabannya’na, akantha bannya’na bintang e langnge’, ban sakabbinna tana reya bi’ Sengko’ ebagiya ka toronanna ba’na jareya. Sakabbinna bangsa e bume bakal nyo’ona ka Sengko’ sopaja bi’ Sengko’ eberkadana epakantha toronanna ba’na.
5Sengko’ aberkadana ba’na, polana Ibrahim ngestowagi Tang parenta ban neggu’i sakabbinna Tang hokom ban Tang parenta."
6Daddi Ishak laju alenggi e Gerar.
7E bakto reng-oreng e jadhiya nanya’agi Ribka, Ishak adhabu ja’ Ribka jareya ale’na, banne rajina. Ishak tako’ epate’e bi’ reng-oreng jareya polana terro ngaandhi’a Ribka se raddin.
8Saellana Ishak abak abit se alenggi e jadhiya, e settong are Rato Abimelekh ngoladi ka baba dhari candhelana, laju ngoladi Ishak teppa’na neng-sennengngan bi’ Ribka.
9Daddi Abimelekh laju adikane Ishak, sarta adhabu, "Daddi babine’ ganeka rajina sampeyan! Aponapa sampeyan me’ adhabu ale’na?" Dhabuna Ishak, "Ca’epon abdidalem tako’ abdidalem me’ epate’e manabi mator ja’ ka’dhinto raji abdidalem."
10"Sampeyan me’ sapaneka ka bangsa kaula?" dhabuna Abimelekh. "Sala settong e antarana ra’yat kaula bisa saos tedhung apolong sareng rajina sampeyan ganeka, manabi kantos kadaddiyan sapaneka, ganeka salana sampeyan, banne salana bangsa kaula."
11Abimelekh laju maenga’ sakabbinna ra’yadda, dhabuna, "Pa’-sapa’a se la-nyala ka oreng reya otaba ka rajina, bi’ sengko’ eokoma mate."
12Ishak nabur bibit e tana jareya, ban saellana olle sataon hasella saratos kalena se etamen, sabab eberkadi bi’ PANGERAN.
13Ishak sajan sogi sarta pas daddi ce’ sogina.
14Ishak ekabaji’i bi’ oreng Filistin polana bannya’ dunorra, bannya’ dumbana ban sapena.
15Daddi mor-somor se ekale bi’ nor-dunorra Ibrahim gi’ odhi’na laju etotobi tana kabbi bi’ reng-oreng Filistin.
16Abimelekh laju adhabu ka Ishak, "Sampeyan tore nyengla dhari ka’iya. Sampeyan samangken akobasa’an dhari bangsa kaula."
17Daddi Ishak nyengla dhari tana jareya, laju akemah e Cora Gerar, sarta alenggi e jadhiya abak abit.
18Mor-somor se ekale gi’ jamanna Ibrahim, se etotobi tana bi’ reng-oreng Filistin satadha’na Ibrahim, bi’ Ishak laju ekale pole. Mor-somor jareya paggun enyamae akantha se enyama’agi bi’ ramana.
19E bakto la-kabulana Ishak ngale somor e Cora Gerar jareya laju nemmo somber se ce’ lebburra.
20Tape reng-oreng ngowan Gerar atokar ban reng-oreng ngowanna Ishak. Ca’na reng-oreng ngowan jareya, "Aeng reya tang andhi’." Daddi bi’ Ishak somor jareya enyamae Esek, artena "Tokar".
21La-kabulana Ishak ngale somor laenna, tape pas daddi tokar pole. Daddi somor jareya bi’ Ishak enyamae Sitna, artena "Parmosowan".
22Saellana jareya Ishak ngalle dhari jadhiya, laju ngale somor pole. Se jareya ta’ daddi tokar. Daddi somor jareya bi’ Ishak enyamae Rehobot, artena "Kabebasan". Dhabuna, "Sateya sengko’ ban ba’na bi’ PANGERAN eparenge kabebasan neng e nagara reya, e dhinna’ sengko’ ban ba’na bakal ma’mora."
23Saellana jareya Ishak meyos ka Bersyeba.
24E malem jareya PANGERAN ngaton sarta adhabu, "Sengko’ reya Allahna ramana ba’na Ibrahim. Ba’na ja’ tako’; Sengko’ alindhunge ba’na. Sengko’ aberkadana ba’na ban ba’na bi’ Sengko’ eberri’ana toronan sabannya’na lantaran Tang janji ka Tang abdi Ibrahim."
25Ishak laju abadhi mezba, pas abakte ka PANGERAN e kennengngan jareya. Ishak akemah e jadhiya, dineng di-abdina laju ngale somor laen.
26E settong are Abimelekh rabu dhari Gerar manggiyana Ishak, asareng ban Ahuzat, panasehadda, ban Pikhol, panglimana tantarana.
27Dhabuna Ishak, "Aponapa samangken sampeyan me’ padha manggi’i kaula, mangkana gi’ dhimen kaula ekamoso sareng etondhung dhari nagarana sampeyan?"
28Saodda reng-oreng jareya, "Samangken kaula oneng ja’ sampeyan elindhunge sareng PANGERAN; daddi noro’ manggi kaula langkong sae kaula sareng sampeyan mabadha parjanjiyan. Ngereng sampeyan asompa
29ja’ sampeyan ta’ alakowa juba’ ka bangsa kaula, pakadi kaula sadaja se ta’ oneng alako juba’ ka sampeyan. Bangsa kaula ampon sae ka sampeyan, sampeyan eedine ngalle kalaban taremtem. Ampon terrang ka kaula ja’ sampeyan eberkadi PANGERAN."
30Saellana jareya reng-oreng buru bi’ Ishak eka’-angka’e, kabbi pas padha adha’ar ban nom-ngenom.
31Kalagguwanna gu-laggu se kadhuwa jareya padha adhabuwagi janjina se eessa’agi ban sompa. Ishak laju ngater tamoyya, ban saellana jareya se kadhuwa laju apesa menangka oreng se akanca.
32E are jareya keya la-kabulana Ishak dhateng ngatore oneng parkara somor se la ekale. Atorra, "Abdina ampon manggi somber."
33Somor jareya bi’ Ishak laju enyamae Syeba, artena "Sompa". Jareya asal molana kottha jareya enyamae Bersyeba.
34E bakto aomor pa’ polo taon, Esau araji babine’ kadhuwa Elon.
35Babine’ se kadhuwa jareya masossa odhi’na Ishak ban Ribka.