Alkitab Mobile SABDA
[VER] : [MADURA]     [PL]  [PB] 
 <<  Kejadian 27 >> 

1Ishak la seppo tor buta. E settong are Esau, pottrana se sareyang, edikane, dhabuna, "Na’!" Saodda Esau, "Ponapa, Pa’?"

2Dhabuna Ishak, "Ba’na tao sengko’ la towa, ta’ etemmo bila se mateya.

3Daddi kassa’ kala’ pana ban gandhibana, pas mangkat ka alas, nyare keban.

4Ollena pas ola panyaman, kantha jan-dujananna sengko’ rowa. Mon la massa’ giba dha’ enna’. Mon bi’ sengko’ la mare ekakan, bi’ sengko’ ba’na pas eberkadana, pongpong sengko’ gi’ ta’ mate."

5Teppa’na Ishak abu-dhabu ka Esau, Ribka meyarsa’agi. Daddi e bakto Esau mangkat aburuwa keban ka alas,

6Ribka adhabu ka Yakub, "Gi’ buru sengko’ ngedhing eppa’na adhabu kantha reya ka Esau,

7‘Kassa’ entar aburu, dagingnga ola panyaman, bagi ka sengko’. Mon bi’ sengko’ la mare ekakan, bi’ sengko’ ba’na eberkadana e ajunanna PANGERAN sabellunna sengko’ mate.’

8Sateya Na’, edhingngagi tang caca reya, ban toro’ pagu-onggu.

9Kassa’ ba’na entar ka kennengnganna ebinna eppa’na, ngala’ budhu’na embi’ se lempo dhadhuwa’. Bi’ sengko’ eola’agiya jan-dujananna eppa’na.

10Mon la mare pas giba ka eppa’na, soro dha’ar. Saellana jareya tanto ba’na bi’ eppa’na eberkadi sabellunna seda."

11Yakub mator ka ebuna, "Kadi ponapa, ja’ reng badanna Esau abulu, kaula bunten.

12Olle daddi eppa’ agagap ka kaula, tanto sareng eppa’ kaula esanggu co-ngoco; dhaggi’ kaula la’-mala’ ebasto, banne eberkadi."

13Dhabuna ebuna, "Dina sengko’ se nanggunga babaston jareya Na’. Lakone bai apa tang oca’. Kassa’ ngala’ budhu’na embi’ jareya."

14Daddi Yakub pas ngala’ budhu’na embi’ dhadhuwa’, eatorragi ka ebuna; Bi’ ebuna laju eola, jan-dujananna Ishak.

15Saellana jareya Ribka mondhut kalambina Esau se paleng bagus se esaba’ e bengkona, laju eangguyyagi ka Yakub.

16Kole’na embi’ gella’ ebetbeddagi ka lengngenna Yakub ban ka bagiyanna le’erra se ta’ abulu.

17La’-ola’anna se nyaman jareya ebagi ka Yakub, epapolong ban roti gabayanna dibi’.

18Yakub entar ka eppa’na, laju ngoca’, "Pa’." Saodda Ishak, "Apa, sapa ba’na reya?"

19Saodda Yakub, "Kaula Esau, Pa’, pottra sareyangnga sampeyan. Pessennanna sampeyan ampon lastare. Ngereng alenggi, paneka’ dha’ar daging ollena kaula se ababurun, ampon eola. Ngereng dha’ar, pas berkadi kaula."

20Dhabuna Ishak, "Me’ ce’ lekkassa ba’na olle keban buruwan?" Saodda Yakub, "PANGERAN, Allahna sampeyan se abanto kaula."

21Dhabuna Ishak, "Mara dha’ enna’an, Na’, me’ olle sengko’ ngenneng agagap ba’na. Sengko’ terro taowa apa ba’na reya Esau ongguwan apa enja’."

22Yakub nyander ka seddi’na eppa’na. Bi’ eppa’na pas egagap. "Sowarana akantha Yakub, tape lengngenna Esau," dhabuna Ishak.

23Ishak ta’ ngagali ja’ jareya Yakub sabab lengngenna abulu akantha lengngenna Esau. Ishak para’ aberkadana Yakub,

24tape pas mangmang, daddi atanya pole, "Ba’na reya Esau ongguwan, ya?" Saodda Yakub, "Enggi."

25Dhabuna Ishak, "Kemma daging la’-ola’anna ba’na, bi’ sengko’ ekakana. Mon la mare, bi’ sengko’ ba’na eberkadana." Yakub ngatorragi daging jareya ka Ishak, epabareng ban anggur se egabay aeng dha’arra.

26Eppa’na pas adhabu, "Dha’ enna’an, Na’. Mara seyom sengko’."

27E bakto Yakub nyeyom eppa’na, eppa’na ngedhing bauna kalambina Esau, daddi Yakub laju eberkadi. Dhabuna, "Bauna tang ana’ padha ban bauna teggal se eberkadi PANGERAN.

28Moga-moga bi’ Guste Allah ba’na eparengngana ebbun dhari langnge’, ban teggalla ba’na moga epalandhuwa! Moga-moga Allah marengana ba’na gandum ban anggur!

29Moga-moga sa-bangsa daddiya abdina ba’na ban ku-suku bangsa atelloga ka ba’na. Moga-moga ba’na ngobasa’ana la-balana, ban moga-moga na’ potona ba’na asojuda kabbi ka ba’na. Moga-moga oreng se abasto ba’na ekennenga babaston, ban reng-oreng se aberkadi ba’na kaparengana berkat keya."

30Ishak la mare aberkadi Yakub. E bakto Yakub buru ondur, Esau laju dhateng dhari se ababurun.

31Ollena dagingnga la eola epanyaman, pas egiba ka eppa’na. Ca’na Esau, "Pa’, ngereng alenggi, paneka’ daging ollena kaula se aburu, ngereng dha’ar, manabi lastare, kaula pas berkadi."

32"Ba’na reya sapa?" ca’na Ishak. Saodda Esau, "Kaula pottra sareyangnga sampeyan, Esau."

33Ishak ce’ takerjadda, sampe’ ngetter sabadan, dhabuna, "Mon bariya sapa se nyambelli keban buruwan gella’, sarta ngeba ka sengko’ dagingnga se la eola gella’ rowa? Bi’ sengko’ gi’ buru mare ekakan sabellunna ba’na dhateng. Bi’ sengko’ oreng jareya la eberkadi; daddi berkat jareya salanjangnga ekaandhi’ oreng jareya."

34E bakto ngedhing dhabuna eppa’na jareya, Esau laju nanges rat-tharadan sambi ngoca’, "Ngereng kaula berkadi jugan, Pa’!"

35Dhabuna Ishak, "Sengko’ la etepo ale’na ba’na. Berkat se samasthena etarema ba’na la ekala’."

36Ca’na Esau, "Paneka ampon kadhukaleyanna kaula eco-koco. Patot ban nyamana Yakub. Ha’ sareyangnga kaula ampon ekala’, samangken berkat se samasthena etarema kaula ekala’ jugan. Ponapa sampeyan ta’ kaagungan karena berkat se kengeng eparengngagi ka kaula, Pa’?"

37Dhabuna Ishak, "Bi’ sengko’ ale’na ba’na la epadaddi lorana ba’na, la-balana bi’ sengko’ epadaddi dunorra kabbi, gandum ban anggur bi’ sengko’ la esangowagi keya. Sateya sengko’ ta’ andhi’ pa-apa pole se ekenneng bagi ka ba’na, Na’!"

38Esau gi’ maksa nyo’on ka eppa’na, "Ponapa sampeyan pera’ kaagungan berkat samacem, Pa’? Ngereng kaula berkadi jugan, Pa’!" Samarena jareya Esau laju nanges pole.

39Ishak adhabu, "Ba’na ta’ kera nemmo gaggarra ebbun dhari langnge’, ta’ kera andhi’ teggal se landhu.

40Ba’na bakal olleya pangoreban dhari peddhangnga, tape ba’na bakal daddiya dunorra ale’na. Nangeng mon ba’na aberonta’, ba’na bakal lopoda dhari kakobasa’anna."

41Esau sake’ ate ka Yakub polana berkadda eppa’na ebagi ka Yakub jareya. Ca’na pekkerra, "Eppa’ la para’ seda’a; samarena kasossa’an jareya bi’ sengko’ Yakub epateyana."

42Tape e bakto Ribka meyarsa maksodda Esau jareya, laju adikane Yakub, pas adhabu, "Edhingngagi, Na’, Esau amaksod malessa sake’na atena, mateyana ba’na.

43Daddi sateya, Na’, mara ba’na patoro’ oca’. Kassa’ duli buru ka bengkona tang taretan se anyama Laban e Haran.

44Ba’na neng e jadhiya gallu kaangguy sabatara, sampe’ kaka’na ba’na elang peggella,

45sarta loppa ka lalakonna ba’na se mapeggel atena jareya. Bi’ sengko’ ba’na pas esorowa kone’e. Sengko’ ta’ terro kaelangana ana’ dhadhuwa’ e dhalem saare."

46Ribka mator ka Ishak, "Kaula ce’ caremmedda ka reng-oreng manca binena Esau ka’issa’. Manabi Yakub abine oreng Het jugan, kaula tanto mate."


  Share Facebook  |  Share Twitter

 <<  Kejadian 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel