Alkitab Mobile SABDA
[VER] : [MADURA]     [PL]  [PB] 
 <<  Kejadian 34 >> 

1E settong are, Dina, ana’na Yakub ollena ban Liya, entar ka babine’an Kana’an.

2E bakto Sikhem, ana’na Hemor oreng Hewi se daddi rato e baba jadhiya nangale’e Dina, Dina laju egiba buru pas eparkosa.

3Tape Sikhem pas arassa lebur ka Dina, Dina pas ecacae sopaja leburra keya ka aba’na.

4Ca’na Sikhem ka eppa’na, "Tore paraban ka’issa’ penta’agi, ekabineya kaula."

5Yakub ngedhing ja’ ana’na eparkosa, tape e bakto jareya na’-ana’na teppa’na badha e teggal, daddi tapaksa neng-enneng, ta’ ngenneng apa-rapa, sabellunna na’-ana’na mole.

6Hemor, eppa’na Sikhem, entar ka Yakub, aparembagana parkara jareya.

7Tape e bakto jareya ana’ lalake’anna Yakub padha mole dhari talon. E bakto ngedhing parkara jareya, na’-ana’na Yakub takerjat ban talebat peggella. Sabab arosak ana’na Yakub padha ban ya-nyeya bangsa Isra’il.

8Ca’na Hemor ka Yakub, "Ana’ kaula lebur ka pottrana sampeyan. Daddi kaula nyo’ona lellana sampeyan, sareng kaula pottrana eso’ona, ejudhuwagiya sareng ana’ kaula ka’dhissa’.

9Ngereng sampeyan sareng kaula mabadha parjanjiyan: bangsana sampeyan kengeng abine babine’an bangsa kaula, sapaneka jugan sabaligga.

10Sampeyan sadaja padha kengeng alenggi e nagara paneka akompol sareng bangsa kaula; e ka’imma’a saos se ekasokane sampeyan. Sampeyan kengeng aponapa’a saos e nagara paneka."

11Sikhem pas mator ka eppa’na Dina ban ka tan-taretanna, "Ngereng kabbuli parnyo’onan kaula paneka. Ponapa saos se eso’ona sampeyan, sareng kaula etorodana.

12Ngereng dhabuwagi tor-ator ponapa se ekasokane sampeyan, sareng tantowagi mas kabinna. Ponapa se ekasokane sampeyan bi’ kaula etorodana, sokor kaula eedine araji kana’ ka’dhissa’."

13Sarrena Sikhem la arosak kahormadanna Dina, ale’na na’-ana’na Yakub jareya, daddi Sikhem laju etepo bi’ na’-kana’ jareya.

14Ca’na na’-ana’na Yakub ka oreng se kadhuwa jareya, "Kaula malo manabi ale’ alake oreng se ta’ asonnat.

15Kaula coma bisa narema manabi sampeyan norodi sarat paneka: Sampeyan kodu padha sareng bangsa kaula, enggi paneka sadajana lalake’anna sampeyan kodu esonnat.

16Saamponna, buru kaula narema’a usulla sampeyan parkara kabin campor paneka. Bangsa kaula neptebba e nga’-tengnga’anna sampeyan, ban daddi settong bangsa bi’ sampeyan.

17Namong manabi sampeyan ta’ kasokan narema sarat ganeka, sareng kaula ale’ ekala’a pole. Saamponna ganeka kaula sadaja laju nyengla’a dhari ka’iya."

18Hemor ban Sikhem padha kasokan narema sarat jareya,

19sabab Sikhem talebat leburra ka ana’na Yakub, ban pole Sikhem jareya e antarana sabala’anna tamaso’ se paleng ehormadi.

20Hemor ban Sikhem pas meyos ka kennengnganna reng-oreng akompol e labang sakethengnga kottha, pas adhabu ka reng-oreng jareya,

21"Reng-oreng Isra’il reya sanyatana kanca. Daddi mara dina me’ olle apolong ban ba’na e nagara reya; panneng maske entara dha’ emma’a bai. Nagara reya cokop lebar maske etamba’ana reng-oreng jareya. Dhaggi’ ba’na bisa abine oreng Isra’il, ban oreng Isra’il bisa abine oreng bangsana ba’na.

22Tape reng-oreng jareya endha’ apolonga ban ba’na, ban daddi sabangsa ban ba’na, mon ba’na endha’ narema settong sarat, iya areya: sakabbinna lalake’an bangsana ba’na kodu padha asonnat akantha bangsa Isra’il.

23Dhaggi’ ebinna bangsa jareya, ban sakabbinna dhi’-andhi’na, bakal ekaandhi’a ba’na keya. Daddi mara tarema sarat jareya me’ olle bangsa jareya endha’ apolong ban ba’na."

24Reng-oreng kottha se akompol e jadhiya padha saroju’ ka panemmona Hemor ban Sikhem, daddi saneyap oreng lalake’ se dibasa e kottha jareya laju padha asonnat.

25Saellana olle tello are dhari jareya, e bakto lalake’an e nagara jareya gi’ padha kasake’an polana se asonnat, Simeyon ban Lewi, iya areya kaka’na Dina, ana’na Yakub, laju ngala’ peddhangnga, maso’ ka kottha ta’ asa’-kasa’, mate’e sakabbinna lalake’an e jadhiya,

26tamaso’ Hemor ban Sikhem. Dina laju ekone’e dhari bengkona Sikhem, terros egiba buru.

27Saellana mate’e reng-oreng e kottha jareya, na’-ana’na Yakub se laenna arampok kottha jareya, menangka babalessa sake’ atena ka bangsa jareya polana Dina eparkosa.

28Kabbi padha ekala’: embi’ ban dumbana, sape ban hemarra, sabarang se badha e dhalem kottha ban e teggal.

29Rang-barang se aji ekala’ kabbi, babine’an ban na’-kana’ etawan, essena ko-bengko padha erampas.

30Ca’na Yakub ka Simeyon ban Lewi, "Ba’na padha masossa sengko’. Sateya oreng Kana’an ban oreng Feris ban sakabbinna oreng e nagara reya tanto padha amoso ka sengko’. Tang oreng ta’ bannya’; mon reng-oreng kottha reya padha nyerrang sengko’, tang ana’ bine tanto tadha’ karena."

31Tape se kadhuwa jareya nyaot, "Masa’ kaula neng-ennengnga saos ale’ epakantha sondel!"


  Share Facebook  |  Share Twitter

 <<  Kejadian 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel