Alkitab Mobile SABDA
[VER] : [MADURA]     [PL]  [PB] 
 <<  Kejadian 38 >> 

1Ra-kera e bakto jareya Yehuda ngalle ta’ apolong ban tan-taretanna, pas akompol ban Hira, lalake’ se asalla dhari Adulam.

2E jadhiya Yehuda kennal ban babine’ Kana’an, ana’na Suwa, laju ekabine.

3Saellana jareya binena pas rembi’ lalake’, bi’ eppa’na enyamae Er.

4Ana’na se nomer dhuwa’ lalake’ keya, enyamae Onan.

5Ana’na se nomer tello’ lalake’ pole, ban enyamae Syela. E bakto Syela lahir Yehuda teppa’na badha e Kezib.

6Ana’na se sareyang se anyama Er bi’ Yehuda epabine’e Tamar.

7Er jareya juba’ tengkana, daddi PANGERAN duka; Er laju epate’e.

8Yehuda laju ngoca’ ka Onan, ale’na Er, "Kassa’ ba’na tedhung ban randhana kaka’na. Lakone kawajibanna ba’na ka randhana kaka’na jareya, sabab ba’na taretanna lakena; kalaban cara se kantha jareya kaka’na ba’na bisa andhi’ toronan."

9Tape Onan tao ja’ na’-ana’na ta’ kera ekaandhi’ aba’na dibi’. Daddi, sabban akompol tedhung ban randhana kaka’na jareya, mannena epagili kalowar sopaja kaka’na ta’ bisa’a andhi’ toronan.

10Tengkana se kantha jareya maduka PANGERAN, daddi bi’ PANGERAN Onan epate’e keya.

11Saellana jareya Yehuda ngoca’ ka mantona se anyama Tamar jareya, "Kassa’ ba’na mole ka bengkona reng towana; ba’na neng e jadhiya, terros daddi randha sampe’ Syela tang ana’ la raja." Kan ngoca’ kantha jareya polana Yehuda tako’ Syela epate’e keya bi’ Pangeran akantha taretanna se kadhuwa. Daddi Tamar mole ka bengkona oreng towana.

12Ta’ abit saellana jareya binena Yehuda mate. Saellana elang kasossa’anna, Yehuda ngajak Hira, kancana se dhari Adulam rowa, entar ka Timna, kennengnganna ba-dumbana egunteng buluna.

13Tamar ngedhing kabar ja’ mattowana entara ka Timna aguntenga buluna dumbana.

14Tamar laju asalen, kalambi randhana ebukka’, asalen kalambi laen. Mowana etotobi, saellana jareya laju toju’ e labang sakethengnga kottha Ena’im, e lorong ka Timna. Tamar tao onggu ja’ Syela, ana’na Yehuda se bungso, la raja, tape aba’na gi’ ta’ epakabin ban lalake’ jareya.

15E naleka Yehuda nangale’e Tamar, babine’ jareya esanggu sondel polana mowana etotobi.

16Yehuda nyander ka seddi’anna e penggir lorong jareya, laju ngoca’, "Mara, sengko’ tedhunga ban ba’na." Yehuda ta’ tao ja’ babine’ jareya mantona dibi’. Tamar nyaot, "Sampeyan aparenga saponapa?"

17Yehuda ngoca’ pole, "Bi’ sengko’ ba’na eberri’ana budhu’na embi’ settong." Saodda Tamar, "Sae, sokor badha tanggunganna sampe’ sampeyan ngeremmagi embi’ ganeka."

18"Tanggungan apa se epenta’a ba’na?" ca’na Yehuda. Saodda Tamar, "Eccabba sampeyan ban talena, jugan tongkedda sampeyan ganeka." Barang se dhadhuwa’ jareya bi’ Yehuda ebagi ka Tamar. Se kadhuwa jareya laju tedhung apolong; Tamar laju ngandhung.

19Tamar mole ka bengkona, totobba mowana ebukka’ sarta laju ngangguy kalambi randhana pole.

20Ta’ saapa abidda saellana jareya, Yehuda nyoro Hira, kancana rowa, ngaterragi embi’ gella’ sarta esoro menta balina rang-barangnga se ebagi menangka tanggungan. Tape Hira ta’ tatemmo ban babine’ jareya.

21Hira anya-tanya ka reng-oreng e Ena’im, "E ka’imma sondel se biyasana atogu e penggir lorong paneka?" "E ka’anja ta’ oneng badha sondel," saodda reng-oreng jareya.

22Hira abali ka Yehuda, laju ngoca’, "Ta’ epanggi. Ca’epon lalake’an se etanyae kaula, e ka’issa’ ta’ oneng badha sondel."

23Ca’na Yehuda, "La dina tang rang-barang jareya me’ olle eteggu’ babine’ jareya, sokor sengko’ ta’ malo. Sengko’ la aehteyar majarana, tape bi’ ba’na orengnga ta’ etemmo."

24Ra-kera tello bulan saellana jareya Yehuda ngedhing kabar ja’ Tamar, mantona, daddi sondel ban sateya ngandhung. Yehuda laju marenta’agi, "Kala’ babine’ jareya, pas obbar pasampe’ mate!"

25E bakto egiba ka lowar, Tamar apessennan ka mattowana, oca’na, "Kaula epangandhung bi’ oreng se andhi’ rang-barang paneka. Oladdagi, pas orossagi pasera se gadhuwan eccap sareng talena, jugan tongket paneka."

26Yehuda tao ka rang-barang jareya, laju ngoca’, "Babine’ jareya ta’ sala. Sengko’ ta’ ajalannagi tang kawajiban ka oreng jareya; masthena babine’ jareya bi’ sengko’ epakabin ban tang ana’, Syela." Yehuda pas ta’ tao tedhung apolong ban Tamar pole.

27E bakto la napa’ sa’adda se rembi’a, pas etemmo ja’ ana’na Tamar kembar.

28Teppa’na rembi’a, babaji’na se settong kalowar tanangnga. Bi’ dhukonna tanang jareya etagenne pas etale’e bi’ bennang mera. Oca’na, "Paneka se kalowar kaadha’."

29Tape tanangnga babaji’ jareya maso’ pole, ban babaji’ settonganna kalowar kaadha’. Dhukon jareya pas ngoca’, "Daddi bariya carana ba’na se kalowara!" Daddi babaji’ se kalowar kaadha’ jareya enyamae Peres.

30Saellana jareya buru kalowar ale’na se e tanangnga badha bennang merana. Kana’ jareya enyamae Zerah.


  Share Facebook  |  Share Twitter

 <<  Kejadian 38 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel