Alkitab Mobile SABDA
[VER] : [MADURA]     [PL]  [PB] 
 <<  Kejadian 43 >> 

1Kalaparan e Kana’an sajan sara.

2Saellana gandumma Yakub ban la-balana se ollena melle dhari Messer rowa la tadha’ kabbi, Yakub adhabu ka tra-pottrana, "Kassa’, ra, entar ka Messer pole, melle gandum."

3Atorra Yehuda ka eppa’na, "Gubennor Messer ampon apareng parengeddan kerras ja’ kaula sataretan ta’ kengeng abali ngadhep ka salerana mon ta’ ngeba ale’.

4Mon bi’ sampeyan ale’ eparengngagi noro’, kaula sataretan entara ka’assa’ pole ngobangana gandum.

5Tape manabi Benyamin ta’ eparengngagi noro’, kaula ta’ entara, sabab gubennor ka’issa’ ampon adhabu ja’ kaula padha ta’ kengeng ngadhep ka ka’issa’ mon ale’ ta’ noro’."

6Dhabuna Yakub, "Arapa ba’na ma’ masossa sengko’, abala ka oreng jareya ja’ ba’na gi’ andhi’ ale’?"

7Saodda tra-pottrana, "Oreng ka’issa’ ros-terrosan atanya parkara kaula sataretan, jugan parkara la-bala kaula, dhabuna, ‘Apa eppa’na ba’na gi’ odhi’? Apa ba’na ta’ andhi’ taretan lake’ laenna?’ Kaula sataretan tapaksa nyaot sabendherra. Dhari ka’imma kaula se onenga ja’ gubennor ganeka makona ngeba ale’ ka ka’assa’?"

8Yehuda laju mator ka eppa’na, "Diggal, pona, Pa’, ale’ me’ olle noro’. Diggal kaula se nanggunga. Mon eparengngagi, kaula ban tan-taretan pas duliya mangkat, me’ olle padha tadha’ se mate kalaparan.

9Kaula dibi’ se daddi tanggunganna. Mon bi’ kaula ale’ ta’ ekenneng giba abali ka ka’dhinto e dhalem kabadha’an salamet ta’ korang pa-ponapa, kaula nanggunga okomanna saomorra.

10Ja’ sakenga ta’ abit parana se te’-nante’an, tantona kaula ban tan-taretan laenna ampon abali dhu kale dhari Messer."

11Eppa’na laju adhabu, "Mon pajat kodu kantha jareya, ba’na ngeba hasella nagara reya se paleng bagus: kismis, maddu, palappa, komere ban buwana badam.

12Ngeba keya pesse tekel dhuwa’, sabab pesse se etemmo e karongnga ba’na rowa kodu epabali. Pola jareya sakeng kalero.

13La giba ale’na, tape duli abali, ya.

14Moga-moga bi’ Allah Se Mahakobasa gubennor jareya eparengngana neser ka ba’na, sopaja Benyamin ban Simeyon epabaliya ka ba’na. Dineng sengko’ reya, mon pajat la kodu kaelangan tang na’-ana’, dhu baramma’a pole."

15Daddi tan-taretanna Yusup jareya ngeba tor-ator jareya ban pesse se bannya’na tekel dhuwa’na; saellana laju mangkat ka Messer abareng Benyamin. Sanapa’na ka jadhiya laju ngadhep ka Yusup.

16E bakto Yusup ngoladi Benyamin abareng ban tan-taretanna jareya, laju adhabu ka kabulana se ngapalae orosanna compo’na, "Giba reng-oreng reya ka tang bengko. Bi’ sengko’ epangakana abareng ban sengko’ dhaggi’ ban-aban. Daddi sambelli ebin settong, terros paranta."

17Kabula gella’ ajalannagi apa se edhabuwagi Yusup, pas ngeba tan-taretanna Yusup jareya ka kalenggiyanna gubennor.

18E bakto egiba ka kalenggiyanna Yusup, tan-taretanna padha katako’an ban apekker, "Sengko’ sataretan reya egiba dha’ enna’ kabbi polana pesse se etemmo badha e dhalem karong e bakto entar dha’ enna’ se jang adha’an rowa. Sengko’ sataretan kabbi tanto pas ejebbak daksakala; mar-hemar rowa tanto ekala’, dineng sengko’ sataretan tanto laju padha ekagabay dunor kabbi."

19Daddi, sanapa’na ka labangnga kalenggiyanna Yusup, tan-taretanna jareya atanya ka oreng se ngapalae orosan compo’na Yusup gella’,

20"Ta’ langkong, guste. Kaula sataretan paneka gi’ dhimen oneng entar ka’anja ngobangana gandum.

21E bakto palemana e tengnga lorong kaula sadaja ambu, kelemma. E bakto mokka’ karong baddhana gandum ka’issa’, neng-oneng kaula sataretan padha manggi pesse se epamajar gandum padha badha e attassa gandumma bang-sebang. Kaula padha ta’ oneng pasera se nyaba’ pesse ganeka. Samangken pesse ganeka bi’ kaula ebakta sadaja, ebajarragiya ka sampeyan. Laen dhari pesse ganeka, kaula jugan abakta pesse terro ngobangana gandum pole."

22(43:21)

23Kabulana Yusup jareya ngoca’, "Ampon ta’ osa tako’. Ja’ kobater. Allahna sampeyan, Allah se epojja eppa’na sampeyan, ganeka se nyaba’ pesse ganeka e dhalem karongnga sampeyan. Kaula ampon narema pessena sampeyan se ekabajar gandum ka’issa’." Saellana jareya Simeyon epakalowar, pas egiba ka tan-taretanna;

24samarena, kabbi laju padha egiba ka dhalem bengko jareya. Reng-oreng jareya eberri’i aeng baccona soko; mar-hemarra eberri’i pakan.

25Saellana jareya, tan-taretanna Yusup nyadhiya’agi le-ollena se eatorragiya ka Yusup mon rabu e baja beddhuk, sabab reng-oreng jareya ebalai ja’ epangakana abareng ban Yusup.

26E bakto Yusup napa’ ka bengko jareya, tan-taretanna ngatorragi le-ollena sambi asojud e adha’anna.

27Yusup mareksane parkara kabadha’anna tan-taretanna jareya, pas adhabu, "Ba’na la nyareta’agi ka sengko’ parkara eppa’na se la towa rowa. Baramma kabadha’anna sateya? Apa gi’ odhi’? Ban baras?"

28Saodda tan-taretanna, "Abdiepon junandalem, eppa’ abdidalem, gi’ odhi’ sareng baras." Tan-taretanna jareya laju asojud e adha’na Yusup.

29E bakto ngoladi Benyamin, ale’na, Yusup adhabu, "Daddi reya ale’na ba’na se bungso se ecareta’agi ba’na rowa? Moga-moga Allah aberkadana ba’na, Na’."

30Panggaliyanna Yusup arassa seksek polana kerrong ka ale’na, sampe’ para’ ta’ kowada ngampet, daddi laju duli nyengga daksakala, maso’ ka kamarra pas molar e jadhiya.

31Saellana jareya laju araop, pas kalowar pole; panggaliyanna ewat-kowattagi, sarta laju makon sopaja dha’arra eparanta.

32Yusup epadha’ar e meja settong, dineng tan-taretanna e meja laen. Reng-oreng Messer se badha e jadhiya ngakan e meja laenna pole, sabab oreng Messer apangrasa apes mon ngakan apolong ban oreng Ibrani.

33Tan-taretanna se toju’ padha ngadhep ka Yusup, epajajar menorot gilirra omorra molae dhari se paleng towa sampe’ ka se paleng ngodha. E bakto nangale’e katoju’anna se egilir menorot omorra jareya, tan-taretanna Yusup padha saleng pandeng kaheranan.

34Tan-taretanna jareya engala’agi kakanan dhari mejana Yusup. Benyamin eberri’i lema kalena ka’-kaka’na. Reng-oreng jareya laju padha ngakan abareng sampe’ kennyang.


  Share Facebook  |  Share Twitter

 <<  Kejadian 43 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel