Alkitab Mobile SABDA
[VER] : [MADURA]     [PL]  [PB] 
 <<  Kejadian 44 >> 

1Sabatara jareya Yusup adhabu ka kabulana se ngoros kaparlowanna compo’na, "Karongnga reng-oreng rowa esse’e bi’ gandum pa ce’ possa’na; mon gi’ kellara se ngeba tambai pole. Pessena pamaso’ ka karongnga bang-sebang, saba’ e attassa gandumma.

2Tang piala salaka rowa pamaso’ keya ka karongnga kana’ se bungso, papolong ban pessena gandumma." Kabulana jareya ajalannagi papakon buru.

3Kalagguwanna teng-petteng tan-taretanna Yusup jareya mangkat moleya ngeba hemarra bang-sebang.

4Gi’ ta’ jau dhari kottha, Yusup adhabu ka kapalana kabula se ngoros kaparlowanna compo’na, "Duli serser reng-oreng rowa. Mon la ecapo’ koca’ kantha reya, ‘Arapa ba’na me’ males kabecce’an ban kajuba’an?

5Arapa ba’na me’ ngeco’ piala salakana tang lora?’ Piala jareya eagem mon adha’ar nom-enoman, bariya keya eagem mon anojum. Ba’na reya ce’ darakana onggu."

6E bakto tan-taretanna Yusup se eserser jareya la ecapo’, kabulana Yusup gella’ laju ngoca’agi pa-apa se edhabuwagi lorana.

7Saodda tan-taretanna Yusup, "Ponapa maksodda sampeyan adhabu sapaneka? Kaula padha asompa’a ja’ kaula padha ta’ atengka kadi ganeka!

8Sampeyan dibi’ ampon oneng ja’ pesse se etemmo badha e dhalem karong e attassa gandum kaula bang-sebang, ebakta abali dhari Kana’an, epabaliya ka sampeyan. Daddi aponapa’a kaula me’ ngeco’a piala salaka e compo’na lorana sampeyan?

9Mon pajat badha e antarana kaula sataretan paneka se ngerrep piala ganeka, eatore okom mate; se laen badhi dunorra sampeyan."

10Ca’na kabulana Yusup gella’, "Iya, mara. Tape se kodu daddi tang dunor coma se etemmo ngeco’ piala jarowa; se laenna olle mole."

11Tan-taretanna Yusup jareya laju padha matoron sarta mokka’ karongnga bang-sebang.

12Bi’ kabulana Yusup rong-karong jareya epareksa epatete, molae dhari karong andhi’na se sareyang sampe’ ka andhi’na se bungso, ban piala jareya etemmo e dhalem karongnga Benyamin.

13Tan-taretanna padha sossa, sampe’ padha nyebbit kalambina bang-sebang. Buwadanna epaongga pole ka hemarra bang-sebang, saellana jareya laju padha abali ka kottha.

14E bakto Yehuda ban tan-taretanna napa’ ka compo’na Yusup, Yusup gi’ badha e jadhiya, kabbi laju padha asojud e ajunanna.

15Dhabuna Yusup, "Ba’na me’ atengka kantha jareya? Apa ba’na ta’ tao ja’ oreng kantha sengko’ reya bisa tao ka sabarang tengkana ba’na kalaban elmo nojum?"

16"Dhu matora ponapa pole abdidalem, guste?" saodda Yehuda. "Kadi ponapa abdidalem sataretan ka’dhinto se kengenga alaban sareng noduwagiya ja’ abdidalem padha ta’ sala? Allah ampon mokka’ kasala’an abdidalem sataretanan. Samangken ka’dhinto abdidalem sataretan sadajana daddi dunorra junandalem; banne namong ale’ se e dhalem karongnga epanggi badha pialana ka’dhissa’."

17Dhabuna Yusup, "Enja’! Sengko’ ta’ amaksod kantha jareya! Pera’ oreng se e dhalem karongnga etemmo badha tang piala jareya se daddiya tang dunor. Se laen olle mole sakarebba ka eppa’na."

18Yehuda nyander ka adha’ ka seddi’na Yusup. "Ta’ langkong, guste; abdidalem nyo’ona edi tor-matora. Ja’ duka, guste; junandalem padha sareng rato Messer dibi’.

19Junandalem oneng mareksane ka abdidalem sataretan ka’dhinto, ‘Apa ba’na gi’ andhi’ eppa’ ban taretan laenna?’

20Abdidalem nyaot, ‘Eppa’ ampon seppo, dineng ale’ lahir e bakto eppa’ ampon seppo. Ale’ gapaneka gadhuwan kaka’ tonggal ebu, namong ampon seda. Daddi samangken ka’dhinto pottrana ebuna kana’ se kadhuwa gapaneka namong kare settong, ban eppa’ ce’ neserra ka ale’ se settong gapaneka.’

21Sareng junandalem abdidalem sataretan epakon abakta ale’ gapaneka ka ka’dhinto, polana junandalem terro ngoladana;

22abdidalem laju mator ja’ kana’ gapaneka ta’ kengeng apesa dhari eppa’na; manabi apesa dhari eppa’na, eppa’na tanto seda.

23Junandalem laju adhabu, ‘Ba’na ta’ olle ngadhep sengko’ pole mon ale’na ta’ egiba.’

24Sanapa’na ka compo’ abdidalem manapa’ dhabuna junandalem ka eppa’.

25Saamponnepon eppa’ laju makon abdidalem sataretan nyabis pole ka ka’dhinto pole, ngobangana teddha’an.

26Abdidalem mator, ‘Ta’ kengeng, Pa’. Kaula ta’ eedine ngadhep mon ale’ ta’ noro’. Kaula coma ngenneng entar ka’assa’ mon ale’ noro’.’

27Eppa’ laju adhabu, ‘Ba’na tao ja’ Rahel, tang bine, pera’ andhi’ ana’ dhadhuwa’.

28Se sareyang la tadha’. Tantona ebit-sebbit burun alas, sabab sampe’ sateya sengko’ ta’ tao nangale’e pole kana’ jareya.

29Mon se bungso reya egiba keya bi’ ba’na, ban e jalan pas badha pa-apa, sengko’ tanto mate polana kasossa’an se epadhateng ba’na jareya, sabab sengko’ la towa.’"

30"Daddi, guste," atorra Yehuda ka Yusup, "manabi abdidalem paleman ka eppa’ ta’ abakta ale’, tanto eppa’ pas seda. Nyabana agantong ka kana’ ka’dhinto. Eppa’ ampon ce’ seppona, daddi manabi abdidalem ngeba kasossa’an ka’dhinto tanto andaddiyagi talajana eppa’.

31(44:30)

32Laen dhari ka’dhinto abdidalem ampon ajanji ka eppa’ ja’ abdidalem daddi tanggunganna ale’. Abdidalem mator ka eppa’, manabi abdidalem ta’ abakta ale’ paleman ka eppa’, abdidalem se nanggunga okomanna saomorra.

33Daddi, abdidalem nyo’ona, guste, dinggal abdidalem cekka’a e ka’dhinto daddiya dunorra junandalem aganteya ale’; dinggal ale’ me’ olle paleman sareng ka’-kaka’na.

34Kadi ponapa abdidalem se abaliya ka eppa’ manabi ale’ ta’ noro’ paleman? Abdidalem ta’ kowat dhaggi’ nengalana mosiba se etanggunga eppa’."


  Share Facebook  |  Share Twitter

 <<  Kejadian 44 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel