Alkitab Mobile SABDA
[VER] : [MADURA]     [PL]  [PB] 
 <<  Kejadian 47 >> 

1Yusup laju ngajak taretanna se kalema, ebakta ngadhep ka rato. Atorra Yusup, "Eppa’ sareng tan-taretan abdidalem ampon rabu, abakta embi’ sareng dumbana, sape sareng sadaja dhi’-andhi’epon. Samangken sadajana padha badha e Gosyen." Tan-taretanna jareya pas ekennallagi ka rato.

2(47:1)

3Dhabuna rato, "Lalakonna ba’na apa?" Atorra tan-taretanna Yusup, "Abdidalem oreng ngowan sadaja, guste, akadi sadajana bangatowa abdidalem gi’ jaman dhimen.

4Abdidalem padha entar ka Messer ka’dhinto terro apo’-compo’a e nagara ka’dhinto, amarga mosem laep e Kana’an talebat berra’epon, kantos tadha’ rebba se kengenga eteddha embi’ sareng dumba abdidalem. Daddi abdidalem sadaja nyo’ona lellana junandalem sopaja eedinana neptep e dhaera Gosyen."

5Dhabuna rato ka Yusup, "Sateya eppa’ ban tan-taretanna ba’na la napa’ dha’ enna’.

6Anggep bai nagara Messer reya andhi’na ba’na dibi’. Dina eppa’na ba’na ban tan-taretanna me’ olle padha neng e Gosyen, bagiyanna nagara Messer se paleng bagus. Mon la-balana ba’na jareya badha se sanggup, passrae soro ngoros tang ebin."

7Bi’ Yusup eppa’na ebakta keya ka rato, epakennal. Yakub aberkadi rato jareya,

8dineng rato jareya adhabu, "Saponapa yuswana sampeyan?"

9Dhabuna Yakub, "Abdidalem ampon saratos tello polo taon odhi’ alalana. Odhi’ abdidalem se saratos tello polo taon ka’dhinto possa’ sareng kasossa’an, sarengngan ta’ saponapa abidda manabi ebandhingngagi sareng yuswaepon bangatowana abdidalem se odhi’epon alalana jugan."

10Saellana jareya Yakub laju amet, sabellunna gubar gi’ apareng berkadda ka rato.

11Bi’ Yusup eppa’ ban tan-taretanna epaneptep e Messer. Kabbi padha eparenge tana e kennengngan se paleng bagus e nagara jareya, iya areya e seddi’anna kottha Rameses, akantha se la edhabuwagi rato.

12Yusup nyadhiya’agi pa-apa se parlo edha’ara eppa’na, tan-taretanna ban sakabbinna balana se laen, sampe’ ka se paleng kene’.

13Mosem laep jareya ce’ sarana, sampe’ e man-dhimman tadha’ pa-apa se ekennenga kakan. Ra’yat Messer ban Kana’an padha lo’lo’ dhari laparra.

14Mon badha reng-oreng se melle gandum, pessena bi’ Yusup epakompol laju egiba ka karaton.

15Saellana reng-oreng Messer ban Kana’an la ta’ andhi’ pesse pole, laju padha nyabis ka Yusup sarta mator, "Nyo’ona gandumma, guste! Kaneserre abdidalem, manabi bunten tanto padha mate sadaja. Abdidalem sadaja padha ta’ gadhuwan pesse pole, ampon tadha’ karena."

16Dhabuna Yusup, "Mon pessena ba’na la tadha’, giba ebinna dha’ enna’, porop ban gandum."

17Daddi reng-oreng jareya padha ngeba ebinna, eatorragi ka Yusup. Bi’ Yusup reng-oreng jareya eparenge gandum menangka gantena jaranna, dumbana, embi’na, sapena ban hemarra. Daddi e taon jareya Yusup apareng gandum ka ra’yat, rop-poroban bi’ ebinna jareya.

18Sataon saellana jareya ra’yat nyabis pole ka Yusup sambi mator, "Abdidalem ta’ leng-ngalenga ka junandalem, guste, abdidalem ampon ta’ gadhuwan pesse sakale, ebin abdidalem ampon daddi kaagunganna junandalem. Abdidalem ampon ta’ gadhuwan pa-ponapa pole se eatorragiya ka junandalem, kajabana badan sareng tana.

19Kaneserre abdidalem, manabi bunten tanto padha mate sadaja! Sopaja teggal abdidalem ta’ kantosa tadha’ orengnga. Ngereng pondhut badan sareng tana abdidalem, porop sareng teddha’an. Abdidalem daddiya dunorrepon rato, tana abdidalem badhi daddiya kaagunganna rato. Ngereng abdidalem nyo’ona gandumma epanyambunga nyaba, sareng nyo’ona ne-bine etabura e teggal!"

20Sakabbinna tana e Messer bi’ Yusup epondhut, epadaddi kaagunganna rato. Sakabbinna oreng Messer tapaksa ajuwal tanana sabab mosem laep jareya ce’ sarana. Sakabbinna tana e Messer la daddi kaagunganna rato.

21Sakabbinna oreng Messer la epadaddi dunorra rato bi’ Yusup.

22Tana se ta’ epondhut pera’ tanana para imam. Para imam jareya ta’ parlo ajuwal tanana sabab la padha olle sombangan dhari rato kaangguy kaparlowanna odhi’na.

23Dhabuna Yusup ka ra’yat, "Daddi badan ban tanana ba’na bi’ sengko’ la ebelli epadaddi kaagunganna rato. Areya’ ne-bine mon etamenna e teggalla ba’na.

24Mon ba’na anye, saparlemanna kodu eatorragi ka rato. Lebbina olle kagabay ne-bine tor ekakan ba’na sabala."

25Atorra reng-oreng jareya, "Junandalem ampon nolong abdidalem sadaja kantos padha salamet. Junandalem ce’ saena ka abdidalem, guste, daddi abdidalem sadaja padha halal daddi dunorrepon rato."

26Parkara jareya bi’ Yusup laju ekagabay dhang-ondhang e nagara Messer, iya areya saparlemanna hasel tane kodu eatorragi ka rato. Sampe’ sateya dhang-ondhang jareya gi’ paggun bai. Pera’ tanana para imam se ta’ eatorragi ka rato.

27Reng-oreng Isra’il neptep e dhaera Gosyen. Neng e jadhiya laju padha daddi sogi ban bannya’ na’ potona.

28Yakub se alenggi e Messer abidda petto bellas taon, sampe’ yuswana saratos pa’ polo petto’ taon.

29E bakto para’ napa’a ka ajalla, Yakub adikane Yusup, pottrana. Dhabuna ka Yusup, "Mara saba’ tanangnga ba’na e antarana tang kang-pekang sarta asompa ja’ ba’na ta’ ngoburragiya sengko’ e Messer reya.

30Sengko’ koburragi e kennengnganna tang para bangatowa; giba tang mayyit dhari nagara reya, pas koburragi pakompol e koburanna tang para bangatowa." Atorra Yusup, "Ponapa dhabuna sampeyan bi’ kaula ejalannagiya sadaja."

31Dhabuna Yakub, "Mara asompa ja’ ba’na pajat ajalannagiya ongguwan." Yusup laju asompa, dineng Yakub pas asokkor e pasareyanna.


  Share Facebook  |  Share Twitter

 <<  Kejadian 47 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel