Alkitab Mobile SABDA
[VER] : [MADURA]     [PL]  [PB] 
 <<  Kejadian 48 >> 

1Ta’ saapa abidda dhari jareya Yusup ekabari ja’ eppa’na songkan sanget. Daddi Yusup laju meyos ngoladi eppa’na, sambi abakta pottra lalake’na se kadhuwa, iya areya Efraim ban Manasye.

2E bakto Yakub meyarsa ja’ Yusup rabu, laju ja-ngaja alenggi e pasareyanna.

3Dhabuna Yakub ka Yusup, "Allah Se Mahakobasa ngaton ka sengko’ e Lus, iya areya e tana Kana’an, sarta aberkadi sengko’.

4Dhabuna ka sengko’ kantha reya, ‘Sengko’ aberri’a na’ poto sabannya’na ka ba’na, sopaja toronanna ba’na daddiya bangsa sabannya’na. Nagara reya bi’ Sengko’ ebagiya ka na’ potona ba’na me’ olle ekaandhi’ salanjangnga.’"

5Yakub pas adhabu pole, "Yusup, ana’na ba’na Efraim ban Manasye, se lahir e Messer reya sabellunna sengko’ napa’ dha’ enna’, bi’ sengko’ eanggep padha ban tang ana’ dibi’, tadha’ bidana ban Ruben tor Simeyon.

6Mon ba’na andhi’ ana’ lalake’ pole, bi’ sengko’ ta’ eanggebba tang ana’. Sangkolan kaangguy na’-kana’ jareya bakal etarema’a dhari Efraim ban Manasye.

7Sengko’ neptebbagi kantha jareya polana ebuna ba’na, Rahel. Ebuna ba’na jareya tadha’ omorra e Kana’an, ta’ jau dhari Efrata, e bakto sengko’ teppa’ badha e dhalem parjalanan abali dhari Mesopotamia. Sengko’ ce’ ngennessa." (Efrata jareya sateya enyamae Betlehem.)

8E bakto Yakub ngoladi pottrana Yusup se kadhuwa laju mareksane, dhabuna, "Sapa kana’ reya?"

9Sambidda Yusup, "Ana’ kaula, paparengnga Allah ka kaula neng e Messer paneka." Dhabuna Yakub, "Giba dha’ enna’, bi’ sengko’ eberkadana."

10Yakub la rabeng sabab la seppo, daddi pangoladanna ta’ terrang. Yusup abakta pottrana se kadhuwa, epasemma’ ka eppa’na; na’-kana’ se kadhuwa jareya bi’ Yakub egellu’ tor ekaloskos.

11Dhabuna Yakub ka Yusup, "Sengko’ ta’ nyangka ja’ tatemmowa ban ba’na pole, tape sateya bi’ Guste Allah sengko’ la’-mala’ epanangale na’-ana’na ba’na keya."

12Saellana jareya ana’na se kadhuwa bi’ Yusup epatoron dhari reba’anna eppa’na. Yusup dibi’ laju asojud e ajunanna eppa’na.

13Saellana jareya bi’ Yusup Efraim esaba’ e kaceranna, dineng Manasye se sareyang esaba’ e kangananna.

14Tape Yakub nompangngagi astana se kangan ka cethagga Efraim se badha e kaceranna, sanajjan Efraim jareya se angodha’an, ban astana se kacer etompangngagi ka cethagga se towa’an, Manasye, se badha e kanganna.

15Saellana jareya Yakub laju aberkadi Yusup, dhabuna, "Allah se esemba tang bangatowa Ibrahim ban Ishak, se nonton sengko’ sampe’ sateya reya.

16Salerana jareya malaekat se malopot tang aba’ dhari samacemma babaja. Moga Allah jareya aberkadana na’-kana’ reya. Moga lantaran na’-kana’ se kadhuwa reya tang nyama ban asmana Ibrahim ban Ishak ekaenga’ana oreng saterrossa. Moga se kadhuwa reya bannya’a na’ potona ban bannya’ toronanna e bume reya."

17Yusup ta’ senneng e bakto ngoladi eppa’na nompangngagi astana se kangan ka cethagga Efraim; daddi astana eppa’na jareya laju etagenne, ealleya ka cethagga Manasye.

18Dhabuna Yusup ka eppa’na, "Kalero, Pa’. Paneka’ se towa’an; ngereng tompangngagi astaepon sampeyan se kangan ka cethagga."

19Tape eppa’na ta’ kasokan, sambi adhabu, "Sengko’ tao, Na’, sengko’ tao. Na’ potona Manasye bakal daddiya bangsa se raja kakobasa’anna keya. Tape ale’na bakal lebbiya raja kakobasa’anna, ban na’ potona ale’na bakal daddiya sa-bangsa se raja kakobasa’anna."

20Daddi e are jareya Yakub aberkadi kana’ se kadhuwa jareya sambi adhabu, "Reng-oreng Isra’il bakal nyebbuda ma-nyamana ba’na mon aberkadi oreng. Reng-oreng Isra’il bakal ngoca’a kantha reya, ‘Moga-moga bi’ Allah ba’na epapadha’a bi’ Efraim ban Manasye.’" Daddi bi’ Yakub nyamana Efraim esebbut sabellunna Manasye.

21Yakub pas adhabu ka Yusup, "Ba’na tao ja’ sengko’ la para’ mateya, tape Guste Allah bakal nolonga ba’na, sarta bakal abakta’a ba’na abali ka nagarana bangatowana.

22Dhaera Sikhem se landhu, ollena sengko’ arebbu’ dhari oreng Amori kalaban ngangguy peddhang ban pana, bi’ sengko’ ebagiya ka ba’na, banne ka tan-taretanna ba’na."


  Share Facebook  |  Share Twitter

 <<  Kejadian 48 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel