Dual Panel1"Ja’ ngabarragi sabarang se ta’ bendher, ban ja’ nolonge oreng se sala kalaban nyakse’e barang se ta’ bendher.
2Ja’ ro’-noro’ oreng bannya’ se alako jahat otaba nyakse’e barang se ta’ bendher sampe’ kaadilan pas daddi lopot.
3Ja’ ada’-bida’agi oreng e dhalem parkara pangadilan, maske se eadili oreng ta’ andhi’.
4Mon ba’na kabendherran nangale’e sape otaba hemarra andhi’na mosona buru sarta posang, giba pabali ka se andhi’.
5Mon hemarra mosona ba’na labu polana berra’ gallu ban-gibanna, tolonge oreng jareya majaga hemarra; ja’ onduri.
6Paadil ka oreng se ta’ andhi’ mon oreng jareya aparkara ka pangadilan.
7Ja’ markara’agi oreng ka pangadilan ban ja’ daddi sababba oreng se ta’ sala sampe’ eokom mate, sabab Sengko’ masthe ngokom oreng se atengka kantha jareya.
8Ja’ narema’an go’-sogo’, sabab go’-sogo’ reya mabuta matana oreng sampe’ ta’ nangale’e barang se bendher ban marogi reng-oreng se ta’ sala.
9Ja’ nganeyaja’an oreng manca; ba’na tao baramma rassana daddi oreng manca, sabab lamba’ ba’na oreng manca keya e Messer."
10"Nem taon abidda ba’na olle namenne teggalla ban ngala’ hasella.
11Tape e taon se kapeng petto’ tana jareya kodu panneng. Sataon jareya ba’na ta’ olle makompol apa’a bai se tombu dibi’ e jadhiya. Dina me’ olle ekala’ oreng se mesken, ban karena me’ olle ekakan burun alas. Pakantha jareya keya kebbunna anggurra ban ka-bungkana jaitunna ba’na.
12Nem are e dhalem samenggu ba’na olle alalakon, tape e are se kapeng petto’ ba’na kodu aistirahat, sopaja ebinna, nor-dunorra ban reng-oreng manca se alako ka ba’na ngenneng aistirahat keya.
13Edhingngagi kabbi se ekoca’agi Sengko’ reya. Ja’ nyemba lah-illah laen, la’-mala’ nyebbut nyamana bai ta’ olle."
14"Sabban taon ba’na kodu mabadha paraya’an tello kale kaangguy ngormat Sengko’.
15E dhalem bulan Abib, e bakto se la etantowagi, ba’na kodu araya’agi Pesta Roti Se Ta’ Eragi’i, carana akantha se la eparenta’agi Sengko’ ka ba’na, sabab e dhalem bulan jareya ba’na ondur dhari Messer. Ja’ ngakan roti se eragi’i saabidda paraya’an se pettong are jareya. Sabban ba’na entar abakte ka Sengko’ kodu ngeba tor-ator.
16Raya’agi Pesta Anye e bakto ba’na molae molong hasella teggalla. Raya’agi Pesta Ranggun Dhaun e aher taon e bakto ba’na makompol hasella kebbun anggur ban kebbun wa’-buwa’anna.
17Tello kale sataon e bakto ebadha’agi paraya’an jareya, oreng lalake’an kodu dhateng abakte kabbi ka Sengko’, GUSTE Allahna.
18Ja’ ngeba roti se eragi’i e bakto ba’na ngurbannagi ebin ka Sengko’. Gajina keban se ekurbannagi ka Sengko’ saabidda paraya’an-paraya’an jareya ta’ olle epangenep sampe’ kalagguwanna.
19Sabban taon ba’na kodu ngeba ka padalemmanna Sengko’, PANGERAN, Allahna ba’na, gandum se eketthok ba’na dha’-adha’ kadibi’ e bakto anye. Dagingnga budhu’na dumba otaba budhu’na embi’ ta’ olle eola bi’ aeng sosona korbina."
20"Sengko’ ngotosa Tang malaekat epajangadha’ana ba’na, epajaga’a ba’na e dhalem parjalanan ban epangeba’a ba’na ka kennengngan se la esadhiya’agi bi’ Sengko’.
21Gateyagi malaekat jareya ban toro’ apa oca’na. Ja’ alaban, sabab malaekat jareya Tang otosan, ban malaekat jareya ta’ kera nyapora pa’-sapa’a ka se alaban.
22Mon ba’na atoro’ ka malaekat jareya ban ngalakone sabarang se eparenta’agi Sengko’, Sengko’ aperranga ngadhebbana so-mosona ba’na.
23Tang malaekat ajangadha’ana ba’na, ngeba’a ba’na ka nagarana bangsa Amori, Het, Feris, Kana’an, Hewi ban Yebus; sa-bangsa jareya bi’ Sengko’ epatompessa kabbi.
24Ba’na ja’ nyemba ca-arca se esemba sa-bangsa jareya, ban ja’ nerowe tengka polana se nyemba ka ca-arca jareya. Paancor ca-arcana jareya ban pagujur gu-tugu brahalana.
25Mon ba’na abakte ka Sengko’, PANGERAN, Allahna, ba’na bi’ Sengko’ eberkadana, eberri’ana kakanan tor nom-enoman, ban ba’na bi’ Sengko’ epajauwa dhari samacemma panyaket.
26E nagarana ba’na bakal tadha’a babine’ se kalabuwan otaba jubeng. Bi’ Sengko’ ba’na epalanjanga omor.
27Sa-bangsa se eentare ba’na bi’ Sengko’ epatako’a ka Sengko’; ban epasalebbudana kabbi; mosona ba’na bakal abaliya, buru katako’an.
28Sengko’ madhatengnga nyarowan, sampe’ sa-bangsa Hewi, Kana’an ban Het padha buru sopaja ba’na ngennenga terros maju.
29Sa-bangsa jareya bi’ Sengko’ ta’ eojuga sakaleyan e dhalem sataon, sabab mon kantha jareya tanana dhaggi’ ta’ taoros, tanto burun alas se lak-galak pas padha dhateng ban ba’na ta’ kellar ngadhebbi.
30Daddi bi’ Sengko’ sa-bangsa jareya eojuga gan sakone’, sampe’ na’ potona ba’na cokop bannya’ se ngobasa’ana tana jareya.
31Tes-batessa nagarana ba’na bi’ Sengko’ eteptebbagiya dhari Tellok Akaba sampe’ ka Songay Efrat, ban dhari Tase’ Tengnga sampe’ ka sagara beddhi. Ba’na bi’ Sengko’ epangobasa’ana pandhudhu’ e nagara jareya, ban ba’na bisa ngojuk reng-oreng jareya e bakto ba’na maju arebbu’a nagara jareya.
32Ja’ mabadha parjanjiyan ban sa-bangsa jareya otabana ban lah-illahna.
33Reng-oreng jareya ja’ bagi neng e nagarana ba’na, sopaja ba’na ta’ nyemba ka lah-illahna ban agabay dusa ka Sengko’. Mon ba’na nyemba ka lah-illahna sa-bangsa jareya, ba’na tabalusok ka dhalem jebbak maot."