Dual Panel1Mosa mator ka PANGERAN, "Kadi ponapa manabi oreng Isra’il ta’ poron parcaja ka abdidalem sareng ta’ parduli ka oca’ abdidalem? Ponapa se kodu ejalannagi abdidalem manabi saompamana oreng Isra’il ngoca’ ja’ sanyatana Junandalem ta’ ngaton ka abdidalem?"
2Dhabuna PANGERAN ka Mosa, "Apa se eteggu’ ba’na jareya?" Atorra Mosa, "Tongket."
3Dhabuna PANGERAN, "Ontallagi tongket jareya ka tana." Bi’ Mosa tongket jareya pas eontallagi; tongket jareya laju aoba daddi olar; Mosa buru ajauwi olar jareya.
4Dhabuna PANGERAN, ka Mosa, "Semma’e olar jareya, pas teggu’ bunto’na." Bi’ Mosa esemma’e, laju eteggu’ bunto’na. Olarra pas aoba daddi tongket pole.
5Dhabuna PANGERAN, "Lakone kantha jareya sopaja oreng Isra’il parcaja’a ja’ Sengko’, PANGERAN, Allahna bangatowana bangsa Isra’il, iya areya Allahna Ibrahim, Ishak ban Yakub, ngaton ka ba’na ongguwan."
6PANGERAN pas adhabu pole ka Mosa, "Lebbuwagi tanangnga ba’na ka lengngenna kalambina." Mosa alampa’agi dhabuna PANGERAN jareya; e bakto astana jareya epakalowar etemmo toltol pote, lampang ekenneng panyaket se nako’e.
7PANGERAN pas adhabu pole, "Lebbuwagi pole tanangnga jareya ka lengngenna kalambina." Mosa alampa’agi pole dhabuna PANGERAN buru; e bakto astana epakalowar pole, la etemmo baras, akantha bagiyanna badanna se laen.
8Dhabuna PANGERAN, "Mon oreng Isra’il ta’ parcaja ka ba’na, otabana gi’ ta’ yakin saellana nangale kaajiban se nomer settong, tantona pas parcaja saellana nangale’e kaajiban se nomer dhuwa’.
9Mon reng-oreng jareya gi’ paggun ta’ endha’ parcaja keya sanajjan la nangale kaajiban se dhu macem buru, sarta ta’ parduli ka oca’na ba’na, ba’na ngala’ aeng sakone’ dhari Songay Nil; aeng jareya totta’ ka tana. Aeng jareya bakal aoba’a daddi dhara."
10Mosa mator pole ka PANGERAN, "Adhu, Guste, Junandalem ja’ makon abdidalem. Abdidalem ta’ penter acaca, ngabidi gi’ dhimen, kantos samangken, saamponnepon Junandalem abu-dhabu sareng abdidalem. Manabi acaca, abdidalem guggu’, lere sareng ta’ lancar."
11Dhabuna PANGERAN ka Mosa, "Sapa se aberri’ colo’ ka manossa? Sapa se mabuwi ban makopok manossa? Sapa se mamella’ ban mabuta matana? Gu ta’ Sengko’, PANGERAN, ta’ iya?
12Daddi, kassa’ kat-mangkat! Sengko’ se nolongana ba’na acaca, ban se mala’ana sabarang se kodu ekoca’agi bi’ ba’na."
13Tape Mosa gi’ mator pole, "Ampon, Guste, ja’ makon abdidalem; makon oreng laen saos."
14PANGERAN pas duka ka Mosa, dhabuna, "Ba’na gu ta’ andhi’ taretan se anyama Harun? Harun jareya penter acaca. Sateya teppa’na ajalan dha’ enna’a. Harun jareya mon tatemmo ban ba’na tanto perak.
15Ba’na acaca ka Harun, kabala apa se kodu ekoca’agi; Sengko’ mala’ana ba’na ban Harun apa se kodu ekoca’agi ban apa se kodu elakone.
16Harun jareya se bakal daddiya tokang madhapa’ cacana ba’na, ban se nolongana ba’na acaca ka ra’yat. Ba’na bakal eanggebba padha ban Allah, nyoro Harun ngoca’agi sabarang se kodu ekoca’agi.
17Giba tongkedda, angguy mabadha kaajiban acem-macem."
18Saellana jareya Mosa abali ka compo’na mattowana, iya areya Yitro, laju mator kantha reya, "Kaula nyo’ona edi palemana ka Messer, nengalana la-bala se badha e ka’issa’, terro onenga ponapa gi’ odhi’ ponapa bunten." Saodda Yitro, "Iya, kassa’; mandar salamedda."
19E bakto Mosa gi’ badha e Midian, PANGERAN adhabu, "Kassa’ ba’na abali ka Messer. Reng-oreng se terro mateyana ba’na la padha mate kabbi."
20Daddi Mosa pas makompol rajina ban tra-pottrana, epanetene hemar, pas mangkat ka Messer. Tongkedda ebakta, menorot se edhabuwagi Allah.
21PANGERAN adhabu pole ka Mosa, "Bi’ Sengko’ ba’na la eberri’i kakobasa’an mabadha kaajiban acem-macem. Daddi sanapa’na ka Messer, ba’na mabadha kaajiban-kaajiban jareya e adha’anna rato Messer. Tape bi’ Sengko’ rato jareya epacengkala, sampe’ ta’ magi oreng Isra’il kalowar dhari Messer.
22Ba’na pas kodu ngoca’ ka rato jareya, ja’ Sengko’, PANGERAN, apessen kantha reya, ‘Isra’il reya Tang ana’ sareyang,
23ban Sengko’ la marenta’agi ka ba’na sopaja Tang ana’ jareya eedine nyengla dhari dhinna’, sopaja ngennenga abakte ka Sengko’, tape ba’na ta’ endha’ magi. Daddi bi’ Sengko’ ana’ sareyangnga ba’na se lalake’ epateyana.’"
24E dhalem parjalanan ka Messer, Mosa kelem e settong kennengngan; e jadhiya PANGERAN manggi’i Mosa, epateyana.
25Rajina Mosa se anyama Zipora mondhut bato se tajem, epanyonnat pottrana. Kole’ thok-ketthoganna jareya eseddingngagi ka padana Mosa. Atorra Zipora, "Sampeyan paneka lake dhara monggu ka kaula."
26Kan adhabu kantha jareya polana se nyonnat pottrana. Daddi Mosa burung ta’ epate’e bi’ PANGERAN.
27Sabatara jareya PANGERAN adhabu ka Harun, "Kassa’ ba’na entar ka Mosa e ra-ara beddhi." Harun pas meyos manggi’i ale’na e gunong socce; saellana atemmo, Mosa laju eseyom.
28Mosa laju apareng oneng ka Harun sabarang se edhabuwagi PANGERAN se makon Mosa abali ka Messer, sarta sakabbinna kaajiban se kodu epabadha salerana.
29Harun ban Mosa pas meyos ka Messer, sarta pas makompol para seppona oreng Isra’il.
30Sabarang se edhabuwagi PANGERAN ka Mosa, bi’ Harun epanapa’ ka sakabbinna para seppona oreng Isra’il jareya; ban e adha’anna reng-oreng jareya Mosa mabadha kaajiban-kaajiban.
31Daddi reng-oreng Isra’il pas parcaja. Ban e bakto ngedhing ja’ PANGERAN nolonge bangsa Isra’il ban ngoladi saapa seksa’an se etanggung bangsa Isra’il jareya, kabbi laju padha asojud abakte ka PANGERAN.