Alkitab Mobile SABDA
[VER] : [MADURA]     [PL]  [PB] 
 <<  Keluaran 8 >> 

1Dhabuna PANGERAN ka Mosa, "Kassa’ ba’na entar pole ka rato Messer. Kabala ja’ Sengko’ apessen kantha reya, ‘Panneng Tang ommat entara abakte ka Sengko’.

2Mon ba’na ta’ ngedine, nagara reya bi’ Sengko’ eokoma, epadhatengngana kata’ se ta’ sakera-kera bannya’na.

3Songay Nil bakal possa’a ban kata’, sampe’ ta’-kata’ jareya kalowar dhari songay, maso’ ka karatonna ba’na, ka kamar katedhunganna, la’-mala’ sampe’ ka ranjangnga, ka ko-bengkona para ponggabana ban ko-bengkona ra’yat, la’-mala’ sampe’ maso’ ka pangeppananna roti ban ka dhalem adunna rotina.

4Ta’-kata’ jareya bakal nalara ka badanna ba’na, ka badanna ja-pangraja ban badanna ra’yat.’"

5Dhabuna PANGERAN ka Mosa, "Harun soro mangaceng tongkedda e attasanna ngay-songay, sellogan ban man-taman, me’ olle pas kalowar kata’ se mossa’e tana Messer."

6Daddi Harun laju mangaceng tongkedda e attasanna ngay-songay, sellogan ban man-taman. Neng e man-dhimman sanagara Messer laju possa’ ban kata’.

7Tape kang-tokang tennongnga rato nerowe keya madhateng kata’ se mossa’e daddi sanagara Messer, kalaban ngangguy wa’-duwa’.

8Rato nembali Mosa ban Harun, dhabuna, "Mara nyo’on ka PANGERANna ba’na me’ olle ta’-kata’ reya epatadha’. Mon la tadha’ kabbi bi’ sengko’ bangsana ba’na eedinana ngatorragi kurban ka PANGERANna."

9Atorra Mosa, "Sae. Ngereng tantowagi baktoepon, bila abdidalem se nyo’onnagiya junandalem sareng sadajana pangraja sareng ra’yat Messer, sopaja ta’-kata’ ka’dhinto epatadha’a sadaja kajabana namong neng e Songay Nil."

10Dhabuna rato, "Lagguna." Dhabuna Mosa, "Abdidalem badhi alampa’agiya dhabuepon junandalem, sopaja junandalem ngagaliya ja’ tadha’ Allah salaenna PANGERAN, Allahepon Isra’il.

11Ta’-kata’ ka’dhinto sareng PANGERAN bakal epatadha’a, sopaja junandalem sareng sadajana pangraja, jugan sareng sadajana ra’yat ta’ egangguwa pole. Ta’ kera badha kata’ pole neng e po’-compo’ sareng e man-ka’dhimman, kajabana neng e Songay Nil."

12Mosa ban Harun pas nyengga dhari jadhiya. Mosa laju adu’a nyo’on ka PANGERAN sopaja ta’-kata’ se epadhateng menangka okoman ka rato jareya epamosna’a.

13PANGERAN ngabbuli parnyo’onanna Mosa jareya. Ta’-kata’ se badha e ko-bengko, taneyan ban gal-teggal padha epamate kabbi.

14Bi’ oreng Messer babathangnga epakompol sampe’ abuk-tombuk, sampe’ sanagara baceng abatthowangan.

15E bakto rato ngoladi ja’ ta’-kata’ la mate kabbi, pas macengkal pole. Akantha se la edhabuwagi PANGERAN, rato ta’ meyarsa’agi dhabuna Mosa ban Harun.

16Dhabuna PANGERAN ka Mosa, "Koca’ ka Harun, tongkedda soro pokollagi ka tana, abu sanagara Messer tanto pas aoba daddi rengnge’."

17Dhabuna PANGERAN jareya elampa’agi. Harun mokollagi tongkedda ka tana. Abu sanagara Messer pas aoba daddi rengnge’, ngaromo’ manossa ban keban.

18Kang-tokang tennong ngoddi ngangguy wa’-duwa’ madhatengnga rengnge’ kantha jareya keya, tape ta’ bisa. E man-dhimman possa’ ban rengnge’ se ngaromo’ manossa ban keban,

19sampe’ kang-tokang tennong jareya mator ka rato, "Ka’dhinto Allah se madhateng." Tape rato paggun macengkal; akantha se la edhabuwagi PANGERAN, paggun ta’ meyarsa’agi dhabuna Mosa ban Harun.

20Dhabuna PANGERAN ka Mosa, "Lagguna gu-laggu ba’na entar ka rato, pateppa’ baktona rato entar ka songay. Kabala ja’ Sengko’ apessen kantha reya: ‘Panneng Tang ommat kalowar dhari dhinna’, me’ olle ngenneng abakte ka Sengko’.

21Mon bi’ ba’na ta’ ebagi, bi’ Sengko’ ba’na epadhatengngana lala’, bariya keya ba-ponggabana ban ra’yadda ba’na. Ko-bengkona oreng Messer, la’-mala’ tana sanagara Messer, bakal possa’a ban lala’.

22Tape bagiyan Gosyen, kennengnganna Tang ommat, bi’ Sengko’ epabida’a; bi’ Sengko’ kennengngan jareya ta’ epadhatengngana lala’, sopaja ba’na taowa ja’ Sengko’, PANGERAN, badha e nagara reya.

23Sengko’ mabida’a Tang ommat dhari ra’yadda ba’na. Kaajiban jareya bakal kadaddiyana lagguna.’"

24PANGERAN madhateng lala’ ta’ sakera-kera bannya’na, mossa’e karaton ban bengkona ba-ponggabana rato sarta ra’yat Messer. Oreng sanagara nyandhang sangsara polana lala’ jareya.

25Rato laju nembali Mosa ban Harun. Dhabuna rato, "Kassa’ la kat-mangkat mon entara ngatorragiya kurban ka Allahna, tape neng e nagara reya bai."

26Tape Mosa mator, "Ta’ kengeng kadi ka’dhinto, sabab oreng Messer tanto peggel manabi nengale oreng Isra’il ngatorragi kurban ka PANGERAN, Allahna bangsa abdidalem; tanto oreng Isra’il pas egarujuk sareng oreng Messer.

27Bangsa Isra’il kodu entar ka sagara beddhi se jauepon tello are parjalanan dhari ka’dhinto, badhi ngatorragiya kurban ka PANGERAN, Allahepon bangsa abdidalem, akadi se edhabuwagi PANGERAN dibi’ ka abdidalem."

28Dhabuna rato, "Iya, kassa’, bi’ sengko’ bangsana ba’na eedinana entar ka sagara beddhi kaangguy ngatorragiya kurban ka PANGERAN, Allahna ba’na. Tape ja’ u-jau. Pojiyagi sengko’ ka Allahna."

29Atorra Mosa, "Samangken abdidalem mangkada, abdidalem pas nyo’onnagiya ka PANGERAN sopaja lagguwepon lala’ se bannya’ ka’dhinto epatadha’a sadaja, sopaja ta’ agangguwa pole ka junandalem, sareng ka sadajana ponggabana junandalem, jugan ka ra’yattepon. Namong junandalem ja’ co-ngoco pole, ja’ lang-ngalange oreng Isra’il se padha entara ngatorragiya kurban ka PANGERAN."

30Saellana jareya Mosa pas kalowar dhari karaton, laju nyo’on ka PANGERAN.

31PANGERAN ngabbuli parnyo’onanna. Lala’ gella’ padha ngabber, ondur dhari kalenggiyanna rato, dhari kennengnganna para ponggabana ban ra’yadda. Tadha’ karena settonga.

32Tape rato paggun aoba pole, paggun macengkal, bangsa Isra’il ta’ eedine kalowar dhari nagarana.


  Share Facebook  |  Share Twitter

 <<  Keluaran 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel