Dual Panel1Dhabuna PANGERAN Se Mahakobasa, "Sengko’ ngerema otosan kaangguy nyadhiya’agi jalan ka Sengko’. Daddi Sengko’, PANGERAN se esare’e ba’na reya, daksakala dhatengnga ka Tang Padalemman. Tang otosan se ete’-nante’ ba’na jareya dhatengnga tor ngomommagiya Tang parjanjiyan."
2Tape sapa se bisa kowat e bakto Pangeran rabu sarta ngaton jareya? Sabab Salerana padha ban apoyya tokang mamorne gagaliyan, ban padha bi’ sabunna tokang panatu.
3Salerana rabu parlo ngadilana, padha ban oreng se aberse’e tor mamorne salaka. Padha ban tokang emmas mamorne emmas ban salaka, bariya keya otosanna PANGERAN bakal mamorneya para imam sopaja mam-imam jareya ngatorragi kurban kalaban cara se ekasokane PANGERAN.
4Daddi akantha gi’ jaman lamba’, PANGERAN bakal kasokana narema ban-kurban se eatorragi ka Salerana bi’ ommat Yehuda ban Yerusalim.
5Dhabuna PANGERAN Se Mahakobasa, "Sengko’ entara ka ba’na parlo ngadilana ba’na. Sengko’ bakal duliya daddi saksena kasala’anna kang-tokang tennong, reng-oreng se azina, se daddi sakse palsu, se roce e dhalem agaji la-kabulana, se nyeksa para randha, kana’ jatim, ban oreng manca, ka sakabbinna oreng se ta’ ngargai Sengko’."
6"Sengko’ reya PANGERAN, ban Sengko’ ta’ aoba. Daddi ba’na, toronanna Yakub, ta’ epatompes.
7Padha ban bangatowana ba’na lamba’, ba’na la nyaleyot dhari Tang kom-hokom sarta ta’ esto ajalannagi kom-hokom jareya. Mara ba’na abali ka Sengko’, sopaja Sengko’ abali ka ba’na keya. Tape ba’na atanya, ‘Ponapa se kodu elakone abdidalem manabi abaliya ka Junandalem?’
8Sateya Sengko’ atanya’a ka ba’na: Apa olle manossa nepo Allah? Tanto bai enja’. Tape ba’na nepo Sengko’ keya. Ba’na atanya, ‘Kadi ponapa?’ Tang jawaban: E dhalem parkara majar saparpolowan ban aberri’ tor-ator.
9Sakabbinna bangsa nepo Sengko’, daddi ba’na kabbi ekenneng basto.
10Giba kabbi saparpolowanna ba’na ka Tang Padalemman sopaja neng e jadhiya bannya’a kakanan. Mara oji Sengko’, tanto ba’na pas tao ja’ Sengko’ mokka’ bang-labangnga sowarga sarta aberri’i ba’na sakabbinna barang se bagus se ce’ bannya’na.
11Bi’ Sengko’ ta’ ebagiya balang ban sabangsana marosak hasel bumena ba’na; ka-bungkana anggurra ba’na bakal lebba’a buwana.
12Daddi ba’na bi’ sakabbinna bangsa bakal ekoca’a senneng odhi’na, sabab nagarana ba’na daddi kennengngan se nyaman."
13PANGERAN adhabu, "Ca’-oca’na ba’na ya-nyeya Sengko’ parana." Tape ba’na atanya, ‘Ngoca’ ponapa abdidalem parkara Junandalem?’
14Ba’na ngoca’, ‘Parcoma abakte ka Allah. Apa gunana ajalannagi kawajiban ka PANGERAN Se Mahakobasa, otaba noduwagi ka Salerana ja’ sengko’ ban ba’na kasta polana se la agabay sala?
15Sengko’ ban ba’na nangale dibi’ oreng se gathak senneng odhi’na. Oreng se jahat ta’ pera’ atamba ma’mor, tape mon reng-oreng jareya ngoji kasabbaranna Allah kalaban alako jahat, oreng jareya lopot keya.’
16Reng-oreng se tako’ ka PANGERAN pas padha saleng acaca. PANGERAN meyarsa sarta agateyagi pa-apa se ekacaca reng-oreng jareya. Reng-oreng se ngormat ban tako’ ka Salerana, nyamana etoles e dhalem ketab catheddan se badha e ajunanna.
17PANGERAN Se Mahakobasa adhabu, "Reng-oreng jareya daddiya Tang ommat. E are baktona Sengko’ madhatengnga okoman, reng-oreng jareya daddiya Tang andhi’ se kataresnan. Reng-oreng jareya bi’ Sengko’ ekaneserrana, akantha panganeserra eppa’ ka ana’na se abakte ka aba’na.
18Tang ommat bakal nangaleyana pole bidana nasibba oreng se becce’ ban oreng se jahat, e antarana oreng se abakte ka Sengko’ ban se enja’."