Dual Panel1Du’ana oreng se nyangsara e dhalem kabadha’an lesso aserro ka PANGERAN. (102-2) Adhu GUSTE, peyarsa’agi du’a abdidalem, moga serrona abdidalem napa’a ka Junandalem.
2(102-3) Ja’ malengos dhari abdidalem, manabi abdidalem e dhalem kasossa’an. Peyarsa’agi manabi abdidalem aserro, kasokana Junandalem duli nyaot.
3(102-4) Odhi’ abdidalem elang akadi okos; lang-tolang abdidalem akadi mardhana apoy.
4(102-5) Abdidalem lesso akadi rebba se kerreng, sareng ta’ gadhuwan napso se neddha’a.
5(102-6) Abdidalem ngadhudhu epakaja; badan kare kole’ se abungkos tolang.
6(102-7) Abdidalem akadi mano’ alas e ra-ara, akadi wek-kowek e jur-gujuran se seppe.
7(102-8) Abdidalem ta’ ngeddha tedhung, akadi mano’ se kaseppeyan e ata’na compo’.
8(102-9) Saare benteng abdidalem eya-seya moso; nyama abdidalem ebadhi babaston sareng oreng se peggel ka abdidalem.
9(102-10) Abdidalem neddha abu akadi roti, se eenom abdidalem acampor aeng tengal,
10(102-11) sabab sareng Junandalem abdidalem eangka’ laju ebantengngagi, lantaran dukaepon Junandalem ekabbiyagi.
11(102-12) Odhi’ abdidalem lebat akadi jang-bajangan e baja asar; abdidalem elop akadi rebba.
12(102-13) Namong Junandalem, GUSTE, salanjangnga teptep Rato, se terros ekaemodi ron-temoron.
13(102-14) Junandalem bakal ngadegga noduwagiya kabellasan ka Siyon, sabab ampon napa’ sa’adda Siyon ekabellasi.
14(102-15) Sabab di-abdiepon Junandalem taresna ka kottha gapaneka, sanare ampon aropa jur-gujuran se tadha’ argana. Sadaja padha arassa neser, sanare ampon aropa abu sareng tana.
15(102-16) Kobasana PANGERAN bakal ekatako’ana sa-bangsa; kamolja’anna ekasengkae to-rato saalam dunnya,
16(102-17) e bakto PANGERAN mateppa’ Siyon pole sarta kalowar e dhalem kaagunganna.
17(102-18) Pangeran bakal meyarsa’agiya du’ana ommadda se malarat ban ta’ nolak parnyo’onanna.
18(102-19) Mara toles sabarang se elampa’agi PANGERAN me’ olle ekataowe angkadan se bakal dhateng, sopaja bangsa se gi’ ta’ elahirragi e dunnya, bisa amolja’agi Salerana.
19(102-20) PANGERAN ngoladi dhari kalenggiyanna se tenggi, dhari sowarga nyongngo’ ka bume,
20(102-21) meyarsa’agiya serrona oreng tahanan, mabebasa reng-oreng se eokom mate.
21(102-22) Daddi asmana bakal eberta’agiya e Siyon, Salerana bakal emolja’agiya e Yerusalim,
22(102-23) e bakto sa-bangsa ban karaja’an-karaja’an padha akompol abakteya ka PANGERAN.
23(102-24) PANGERAN motel tang kakowadan e bakto sengko’ gi’ ngodha, tang omor epapandha’.
24(102-25) Sengko’ pas mator, "Ya Allah ja’ cabuddagi nyaba abdidalem, sabab abdidalem gi’ ta’ towa." GUSTE, Junandalem odhi’ salanjangnga,
25(102-26) gi’ dhimen Junandalem abadhi bume, sapaneka jugan Junandalem se abadhi langnge’.
26(102-27) Sadaja gapaneka bakal mosna’a, namong Junandalem paggun badha saterrossa; sadaja gapaneka bakal lajuwa akadi kalambi. Sareng Junandalem bakal ebuwanga akadi kalambi se laju, saamponna sadajana laju bakal mosna’a.
27(102-28) Namong Junandalem paggun padha, odhi’epon Junandalem tadha’ aherra.
28(102-29) Na’ poto abdidalem sadaja bakal taremtemma odhi’na, sareng aman saterrossa e dhalem pangaobannepon Junandalem.