Alkitab Mobile SABDA
[VER] : [MADURA]     [PL]  [PB] 
 <<  Mazmur 105 >> 

1Mara asokkor ka PANGERAN, berta’agi kaagunganna, careta’agi lalampa’anna ka sa-bangsa.

2Mara nyanye pojiyan kaagem ka PANGERAN, berta’agi sakabbinna karyana se makasambu’ pekkeran.

3Salerana jareya Pangeran Se Settong; mara paperak sabab sengko’ ban ba’na reya kaagunganna, kabbi se abakte ka Salerana mara pagumbira.

4Nyo’on kakowadan dhari Salerana, semba Salerana salanjangnga.

5He toronanna Ibrahim, abdina Allah, para toronanna Yakub, peleyanna Pangeran, kaenga’e sakabbinna kaajiban se elampa’agi Salerana, ja’ kaloppae kapotosan-kapotosanna.

6(105:5)

7PANGERAN reya Allahna sengko’ ban ba’na, kapotosanna kaangguy saantero dunnya.

8Salerana terros emot ka parjanjiyanna, dhabuna kaangguy salanjangnga.

9Parjanjiyan jareya ebadhi Pangeran ban Ibrahim, saellana pas epaterros ban Ishak.

10Saellana jareya pas epakoko bi’ Yakub, epadaddi parjanjiyan se langgeng ban ommat Isra’il.

11Ca’na dhabuna, "Tana Kana’an bi’ Sengko’ ebagiya ka ba’na, epadaddiya sangkolan andhi’na ba’na."

12Lamba’ ommadda Allah daddi oreng manca e dhissa’, bannya’na orengnga ta’ saapa.

13Reng-oreng jareya alalana dhari bangsa se settong ka settonga, ngalle dhari nagara se settong ka settonga.

14Tape Pangeran ta’ ngedine sapa’a bai nendhes ommadda jareya, kaangguy masalamedda ommadda, to-rato padha epaenga’,

15"Ja’ la-nyala ka ommat Tang peleyan, Tang bi-nabbi ja’ ca-anca!"

16PANGERAN madhateng laep ka nagara jareya, parsadhiya’anna kakanan epondhut epatadha’ karena.

17Tape Pangeran ngotos oreng ajangadha’i ommadda jareya, Yusup, se ejuwal egabay dunor odhi’na.

18Sokona ekalenthong, le’erra etale’e rantay besse.

19Dhi-budhina kadaddiyan keya se eramallagi salerana, Yusup eanggep ta’ sala polana dhabuna PANGERAN.

20Rato Messer se ngobasane sa-bangsa makalowar salerana dhari penjara.

21Yusup laju epangoros karaja’anna, eparenge kakobasa’an marenta nagarana;

22bariya keya kakobasa’an ngator para ponggabana rato, ban mimpin kaom towa.

23Yakub pas meyos ka Messer, neptep e jadhiya daddi oreng manca.

24Bi’ PANGERAN ommadda epatamba bannya’, sampe’ daddi akowadan dhari mosona.

25Atena oreng Messer epabaji’ ka ommadda, para abdina padha eco-koco.

26Pangeran laju ngotos Mosa abdina sarta Harun oreng peleyanna.

27E nagara Messer se kadhuwa jareya mabadha kaajiban sabannya’na, lalakon ja-raja se elampa’agi Pangeran,

28Mosa ban Harun ta’at ka papakonna. Nagara jareya laju epapetteng calemodan bi’ Pangeran.

29Songayya eoba epadaddi dhara, sampe’ mate kabbi ko’-juko’na.

30Kata’ mossa’e nagara jareya, la’-mala’ sampe’ maso’ ka karatonna.

31Kalaban dhabuna Allah laju dhateng lala’ sabannya’na, rengnge’ ngaromo’ saantero nagara.

32Pangeran matoron es menangka gantena ojan, kelap epadhateng patang galirap.

33Pangeran marobbu bungkana anggur ban bungkana ara, bariya keya ju-kajuwan laenna.

34Kalaban dhabuna pas dhateng balang, bannya’na ta’ ekenneng bitong, ta’ ekenneng bilang.

35Balang jareya ngakan sakabbinna men-tamennan e teggal, hasella bume ekakan epatadha’.

36Saellana jareya Pangeran mate’e sakabbinna ana’ sareyang e Messer.

37Saellana jareya bangsa Isra’il pas eater ka lowar, reng-oreng jareya ngeba emmas ban salaka, kabbi padha baras ban kowat.

38Oreng Messer tako’ ka bangsa Isra’il jareya, daddi padha perak atena e bakto oreng Isra’il ondur dhari nagarana.

39Bi’ Pangeran ommadda epajunge ondhem, eparenge apoy se matera’ e baja malem.

40Reng-oreng jareya nyo’on, Pangeran madhateng mano’ gemmek, ommadda eparenge roti dhari sowarga sampe’ padha kennyang.

41Gunong bato eseba’ pas kalowar aeng se agili akantha songay e ra-ara beddhi.

42Sabab Pangeran emot ka janjina se edhabuwagi ka Ibrahim, abdina.

43Daddi Pangeran ngater ommat peleyanna, se nyanye sambi asorak, kaperagen atena.

44Tanana sa-bangsa laen eparengngagi ka ommat jareya, gal-teggalla epadaddi andhi’na,

45sopaja ommadda ta’ada ka kom-hokomma ban atoro’ ka papakonna. Molja’agi PANGERAN!


  Share Facebook  |  Share Twitter

 <<  Mazmur 105 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel