Dual Panel1Nyanyeyan pangajaranna Daud e bakto badha e dhalem guwa. (142-2) Sengko’ aserro epakaja ka PANGERAN; tang sowara eparanyeng nyo’on bantowanna.
2(142-3) E ajunanna sengko’ aserrowan; notorragi sakabbinna tang kasossa’an.
3(142-4) E bakto abdidalem para’ kaelangana pangarep, Junandalem ngagali ponapa se kodu elakone abdidalem. E jalan se kodu elebadi abdidalem, moso ta’ asa’-kasa’ masang jira’ ajebbaga abdidalem.
4(142-5) E bakto abdidalem atole ka ereng, abdidalem ta’ nengale oreng se nolongana abdidalem. Tadha’ se ngaobi abdidalem, otaba se marduli abdidalem.
5(142-6) Abdidalem aserro ka Junandalem, GUSTE, Junandalem pangaoban abdidalem, namong Junandalem se ekaparlo abdidalem e dhalem odhi’ ka’dhinto.
6(142-7) Peyarsa’agi serro abdidalem paneka, sabab abdidalem talebat nyangsara. Pasalamet abdidalem dhari moso abdidalem sadajana, sabab monggu ka abdidalem moso talebat kowat.
7(142-8) Pakalowarragi abdidalem dhari penjara, sopaja e dhalem kompolanna ommattepon Junandalem abdidalem kengenga amolja’agi asmaepon Junandalem, sabab Junandalem sae ka abdidalem.