1Jaburra Daud. He lok-mahlok sowarga, molja’agi PANGERAN, molja’agi kaagungan ban kobasana.
2Molja’agi asmana PANGERAN se molja, semba Salerana sambi ngangguy kalambi kabakteyan.
3Allah se agung asowara akantha galudhuk e attas tase’, sowarana metto ro-sarowan e attassa tase’ raja.
4Sowarana PANGERAN ekaedhing agandhu’ kakowadan ban kobasa.
5Sowarana PANGERAN magujur ka’-bungka’an, masempal bungkana comara Libanon.
6Ngedhing sowara jareya Gunong Libanon sampe’ alonca’ akantha budhu’na sape, Gunong Siriyon abintal akantha budhu’na banteng.
7Sowarana PANGERAN andaddiyagi kelap ngareddhap.
8Sowarana PANGERAN magundhek ra-ara beddhi, PANGERAN magundhek ra-ara beddhi Kades.
9Sowarana PANGERAN maguli ka-bungkana berrangan, maronto un-dhaunan e dhalem alas, sabatara e Padalemman Socce ommat ra’-era’an, "Molja’agi Pangeran!"
10PANGERAN kobasa ka ba’a, kobasa menangka Rato salanjangnga.
11Moga PANGERAN marengana kakowadan ka ommadda, ban mataremtem sarta manyaman odhi’na.