Dual Panel1Jaburra Daud. Guste PANGERAN, labannagi oreng se ngamoso abdidalem, perrangngagi oreng se merrange abdidalem.
2Pondhut tameng sareng pangangguy perrangngepon Junandalem, ngereng ngadek, tolong abdidalem.
3Angka’ lembing sareng tombakkepon kaangguy ngadhebbi oreng se nyerser abdidalem. Ngereng adhabu ka abdidalem ja’ Junandalem panyalamet abdidalem.
4Oreng se mateyana abdidalem moga eparengngana epakala sareng epamalo. Se asakongkel ngamoso abdidalem moga eparengngana nyorot kabingongan.
5Moga reng-oreng gapaneka eserserra malaekadda PANGERAN, atabuyan akadi sekkem eabber angen.
6Moga reng-oreng gapaneka epokola malaekadda PANGERAN e lorong se petteng sareng lecen.
7Parcoma reng-oreng gapaneka masang jebbak ajira’a abdidalem otabana ngale lobang mega’a abdidalem.
8Moga reng-oreng gapaneka padha mateya ta’ kalaban eka-sangka. Moga sadaja padha’a tajebbak e dhalem barajagga dibi’, laju labu terros mate.
9Daddi sengko’ rak-soragan polana PANGERAN, tang ate perak polana Salerana masalamet sengko’.
10Sengko’ ngoca’ kalaban gu-onggu ate, "Junandalem tadha’ bandhingannepon, GUSTE! Junandalem masalamet se ta’ gadhuwan kakowadan dhari oreng se kowat, masalamet oreng se mesken sareng nyangsara dhari reng-oreng se nendhes aba’epon."
11Se-sakse jahat padha jaga nyala’agi abdidalem, ngarane abdidalem ngalakone sabarang se abdidalem dibi’ ta’ oneng.
12Kabecce’annepon abdidalem ebales reng-oreng gapaneka sareng kajahadan; abdidalem tacekkel ta’ gadhuwan pangarebban.
13E bakto reng-oreng gapaneka nganglo, abdidalem sossa, neddha ta’ poron; abdidalem adu’a sambi nondhu’,
14akadi se adu’a nyo’onnagi taretan otaba sahabat. Abdidalem nondhu’, nangese reng-oreng gapaneka, akadi se sossa lantaran ebu abdidalem dibi’.
15Namong e bakto abdidalem sossa, reng-oreng gapaneka senneng, agaribbung ca’-ngoca’e abdidalem. Reng-oreng ya-nyeya abdidalem, sanare abdidalem ta’ oneng ka reng-oreng gapaneka.
16Akadi oreng se ya-nyeya oreng se dippang, reng-oreng gapaneka ngabas ka abdidalem, katon ce’ baji’na.
17Kantos bilaepon, GUSTE, kantos bilaepon, Junandalem namong ngoladi bisaos? Nyo’ona salamet abdidalem dhari serrangannepon reng-oreng gapaneka, palopottagi nyaba abdidalem dhari can-macan gapaneka.
18Abdidalem pas asokkora ka Junandalem e nga’-tengnga’annepon ommadda Junandalem, sareng amolja’agiya asmaepon Junandalem e dhalem kompolannepon reng-oreng gapaneka.
19Ja’ dinggal abdidalem ebadhi en-maenan sareng oreng se ngamoso abdidalem ta’ kalaban badha margana. Ja’ dinggal abdidalem erak-sorak oreng se baji’ ka abdidalem ta’ kalaban badha lantaranna.
20Pacacana reng-oreng gapaneka ta’ laba; reng-oreng gapaneka gadhuwan sajja badhi nepo reng-oreng laen se odhi’na rokon.
21Reng-oreng gapaneka ra’-era’an ka abdidalem sambi ngoca’ ja’ sadaja ampon padha nengale lalakon abdidalem.
22Namong Junandalem, GUSTE, ampon ngoladi; daddi ngereng, ja’ mendel saos, GUSTE, ja’ majau dhari abdidalem.
23Ngereng ngadek abillai abdidalem, Ya Allah, Pangeran kaula, nyo’ona tolong abdidalem, GUSTE.
24Guste ALLAH, ngereng billai abdidalem, sabab Junandalem adil; ja’ panneng abdidalem erak-sorak moso.
25Ja’ kantos moso abdidalem ngoca’ e dhalem atena, "Dulat, la tompes oreng jareya, la katekkan pangaterrona sengko’ ban ba’na!"
26Oreng se perak nengale kasangsara’an abdidalem, moga eparengngana todhus sareng bingong; se ga’-maangga’ ka abdidalem, moga eya’-seya’a oreng sareng eparenge malo.
27Oreng se terro nengalana abdidalem eanggep teppa’, moga eparengngana asorak sareng senneng atena. Moga padha’a li-baliyan ngoca’, "Agung onggu PANGERAN reya! Se ekaterro kasalameddanna para abdina!"
28Daddi abdidalem aberta’agiya kaadilannepon Junandalem, sareng amolja’agiya Junandalem saare benteng.