1Jaburra kaom Korah. Nyanyeyan pangajaran. Kaangguy pamimpinna koor. (44-2) Ya Allah, abdidalem ampon mereng dibi’ careta dhari para bangatowa, parkara sadaja lalakon raja se elampa’agi Junandalem gi’ jaman dhimen.
2(44-3) Junandalem dibi’ ngojuk sa-bangsa, sopaja ommadda Junandalem neptebba e nagarana. Sa-bangsa laen sareng Junandalem epacalaka’, namong ommattepon Junandalem epasajan ma’mor odhi’na.
3(44-4) Banne sareng peddhang reng-oreng gapaneka arebbu’ tana ka’dhissa’; banne lantaran kakowadanna dibi’ reng-oreng gapaneka mennang, namong lantaran kobasa sareng cajana kahadirannepon Junandalem, sabab ommat ka’dhinto katarema ka Junandalem.
4(44-5) Junandalem Rato sareng Allah abdidalem, se apareng kamennangan ka ommadda.
5(44-6) Kalaban kobasaepon Junandalem abdidalem sadaja makala moso, ban matellok reng-oreng se nyerrang abdidalem sadaja.
6(44-7) Sabab abdidalem ta’ ngandellagi pana otabana peddhang kaangguy masalamet aba’ ka’dhinto.
7(44-8) Namong Junandalem panyalamet abdidalem dhari moso, makala reng-oreng se baji’ ka abdidalem.
8(44-9) Daddi abdidalem amolja’agiya Junandalem salanjangnga, sareng asokkor ka Junandalem saterrossa.
9(44-10) Namong samangken Junandalem adinggallagi abdidalem sadajana; Junandalem mendel sanare abdidalem epakala. Junandalem ta’ kasokan maju nyarengnge abdidalem sadajana.
10(44-11) Junandalem mendel saos abdidalem padha buru dhari moso, dhi’-andhi’ abdidalem sadaja erampas tadha’ karena.
11(44-12) Junandalem mendel abdidalem sadaja ejagal epakadi dumba, sareng Junandalem epabalessudan e antaraepon sa-bangsa.
12(44-13) Junandalem ajuwal ommadda epace’modhana, Junandalem ta’ narema kaontongan pa-ponapa.
13(44-14) Sareng Junandalem abdidalem sadaja ebadhi co-kocowanna tatangga, ekala’-gella’ ebadhi en-maenan.
14(44-15) Sareng Junandalem abdidalem sadaja eya-seya ka sa-bangsa; se pek-kepeggan ya-nyeya tadha’ ambuna.
15(44-16) Saare benteng abdidalem ecale, nanggung malo e adha’na oreng.
16(44-17) polana mereng aba’ eco-koco sareng eya-seya sareng moso, sareng oreng se baji’ ka abdidalem sadajana.
17(44-18) Abdidalem sadaja padha katebanan ka’dhinto, sanare abdidalem ta’ oneng loppa ka Junandalem otabana ta’ esto ban ta’ neptebbi ka parjanjiyan se ebadhi Junandalem sareng abdidalem sadaja.
18(44-19) Abdidalem sadaja ta’ oneng mongkere Junandalem; papakonnepon Junandalem etoro’ terros.
19(44-20) Namong abdidalem sadaja sareng Junandalem edinggallagi e pettengnga; ta’ kengeng apa-ponapa e antaraepon burun alas.
20(44-21) Saompamaepon abdidalem nyemba ka diba laen, ta’ poron pole nyemba ka Allah,
21(44-22) tanto Junandalem ngagali sabab Junandalem ngoladi ka essena ate se ta’ etengale oreng.
22(44-23) Namong bit asmaepon Junandalem, abdidalem ngadhebbi babaja pate salanjangnga, epakadi dumba se esambelliya.
23(44-24) Ngereng ngadek, GUSTE! Aponapa Junandalem me’ asare? Ngereng ngadek! Ja’ nolak abdidalem salanjangnga.
24(44-25) Aponapa Junandalem me’ ngetek ta’ ngemodi sangsarana sareng kasossa’anna abdidalem sadaja?
25(44-26) Abdidalem sadaja robbu ancor e tana ta’ kengeng jaga e dhalem abu polana kala.
26(44-27) Ngereng ngadek, nyo’ona tolong abdidalem, nyo’ona salamet abdidalem, lantaran kataresna’annepon Junandalem.