Dual Panel1Jaburra kaom Korah. Kaangguy pamimpinna koor. Ngangguy nyanyeyan Alamot. (46-2) Allah reya pangaoban ban kakowadanna sengko’ ban ba’na; se to-sabakto bisa nolong e dhalem karekongan.
2(46-3) Daddi sengko’ ban ba’na ta’ tako’, maske bume agundhegga sakale, ban nong-gunong nyellem ka dhasarra tase’ raja;
3(46-4) maske tase’ ngamok, omba’na akantha gunong, ban mo’-gumo’ agaledder ekenneng tambu omba’na.
4(46-5) Badha gilina songay se maperak Kotthana Allah, kalenggiyanna Allah Se Mahatenggi.
5(46-6) Allah alenggi e jadhiya, daddi kottha jareya ta’ kera mosna; Salerana tanto apareng partolongan e bakto pajjar ngombar.
6(46-7) Allah agarudhu’ akantha galudhuk, bume lejjar; sa-bangsa baridhu, karaja’anna padha gujur.
7(46-8) Sengko’ ban ba’na esarengnge PANGERAN Se Mahakobasa, Allahna Yakub ngaobi sengko’ ban ba’na.
8(46-9) Mara, abas apa se elampa’agi PANGERAN; makasambu’ onggu se elampa’agi e bume!
9(46-10) Paperrangan saantero dunnya epaambu, gandhiba ban lembing epaancor, meng-tameng padha eobbar.
10(46-11) Dhabuna, "Ambu se aperrang; ba’na kodu tao, Sengko’ reya Allah, Sengko’ agung e antarana sa-bangsa, agung e saantero bume reya."
11(46-12) Sengko’ ban ba’na esarengnge PANGERAN Se Mahakobasa, Allahna Yakub ngaobi sengko’ ban ba’na.