Dual Panel1Kaangguy pamimpinna koor. Jabur karanganna Daud (51-2) saellana epaemot Nabbi Natan polana azina ban Batsyeba. (51-3) Kabellasi adidalem, Guste Allah, sabab Junandalem bellas ase salanjangnga. Patadha’agi dusa abdidalem lantaran bellas asena Junandalem se talebat rajana.
2(51-4) Baccowagi kajahadan abdidalem sadajana; paberseyagi abdidalem dhari sadajana dusa.
3(51-5) Sabab abdidalem ngakone sadajaepon kasala’an abdidalem, abdidalem enga’ terros ka sadajaepon dusa abdidalem.
4(51-6) Namong ka Junandalem, namong ka Junandalem abdidalem se dusa, ban abdidalem ngalakone sadajana se sareng Junandalem eanggep jahat. Daddi ampon sapantessa abdidalem eparenge okoman, kapotosannepon Junandalem adil sadajana.
5(51-7) Salerressepon abdidalem jahat molae bakto lahir, ampon ekenneng dusa molae dhari gandhu’anna ebu.
6(51-8) Se epondhut Junandalem namong ate se berse; esseyagi baten abdidalem sareng hekmattepon Junandalem.
7(51-9) Pasocceyagi abdidalem, tanto abdidalem pas berse; baccowagi abdidalem, tanto abdidalem apoteyan dhari kapas.
8(51-10) Edine abdidalem mereng kabar gumbira, sopaja ate abdidalem se sareng Junandalem eparemmok ka’dhinto kengenga asorak pole.
9(51-11) Ja’ ngoladi ka sa-dusa abdidalem, sareng paelangngagi sadajana kasala’an abdidalem.
10(51-12) Ya Allah, parenge abdidalem ate se morne, anyare baten abdidalem sareng samangat se kowat.
11(51-13) Ja’ buwang abdidalem dhari ajunannepon Junandalem, ja’ pondhut errohepon Junandalem se socce dhari abdidalem.
12(51-14) Pagumbira pole ate abdidalem lantaran kasalameddan se dhateng dhari Junandalem, parenge abdidalem ate se ehlas ta’at ka Junandalem.
13(51-15) Abdidalem laju ngajarragiya ka reng-oreng dusa sadaja papakonnepon Junandalem, sopaja reng-oreng gapaneka padha abali ka Junandalem.
14(51-16) Ya Allah se masalamet abdidalem, palopottagi abdidalem dhari maot, sopaja kalaban ate senneng abdidalem aberta’agiya kaadilannepon Junandalem.
15(51-17) Tolonge abdidalem acaca, GUSTE, sopaja abdidalem kengenga amolja’agi Junandalem.
16(51-18) Kurban sambelliyan ta’ katarema ka Junandalem; saompamaepon abdidalem ngatorragi kurban obbaran, sareng Junandalem ta’ kera katarema jugan.
17(51-19) Kurban abdidalem kaator ka Junandalem ate se andhap asor, Guste; Junandalem ta’ nolak ate se andhap asor sareng se atobat.
18(51-20) Ya Allah, duduwagi kasaeyannepon Junandalem ka Siyon, pamanjengngagi pole dhung-geddhungngepon Yerusalim.
19(51-21) Tanto Junandalem pas kasokan narema kurban se pantes, sareng kurban obbaran; sape lake’ badhi ekurbannagiya e mezbaepon Junandalem.