1Kaangguy pamimpinna koor. Menorot nyanyeyan: Ja’ mamosna. Jaburra Daud. (58-2) Para pangobasa, apa ba’na adil e dhalem aberri’ potosan? Apa ba’na jujur e dhalem ngadili manossa?
2(58-3) Enja’, ba’na andhi’ sajja jahat, ban pole ba’na ngalakone kakerrasan e nagara reya.
3(58-4) Oreng jahat la kalero jalan molae gi’ egandhu’ ebuna, la co-ngoco manossa laenna molae bakto lahir e dunnya.
4(58-5) Reng-oreng jareya agandhu’ racon akantha olar se badha opassa, kopengnga esompet akantha kobbra se kopok
5(58-6) se ta’ ngedhing sowarana pawang se penter otabana sowarana tokang seher se cakep.
6(58-7) Ya Allah, papotongngagi gigina reng-oreng gapaneka, dabu’agi seyongnga can-macan se gi’ ngodha ka’dhissa’, GUSTE.
7(58-8) Dinggal sadajana me’ olle mosna akadi aeng se ngebbat, akadi pana se tompol.
8(58-9) Dinggal sadajana me’ olle akadi congcong se ngalelle daddi aeng that-lenthat, akadi babaji’ se mate sabellunna nengale tera’.
9(58-10) Sabellunna apangrasa, reng-oreng gapaneka ampon mate akadi ombut se gi’ ta’ raja, padha obus ekebbat angen tadha’ bidana sareng tamennan se kerreng.
10(58-11) Nangale’e oreng jahat eokom, oreng se jujur padha perak, sokona padha ebaccowe ban dharana oreng daraka.
11(58-12) Oreng bakal padha’a ngoca’ kantha reya, "Oreng becce’ pajat olle ganjaran, pajat bendher, badha Allah se ahakime bume."