Dual Panel1Jaburra Daud, e bakto badha e ra-ara Yehuda. (63-2) Ya Allah, Junandalem Allah abdidalem, abdidalem nyare’e sareng kerrong ka Junandalem. Akadi tana kajal se terro ka aeng, saka’dhinto jugan abdidalem ce’ terrona tapanggiya sareng Junandalem.
2(63-3) Edine abdidalem mandeng Junandalem e kalenggiyanna, sopaja nengale kakowadan sareng kaagungannepon Junandalem.
3(63-4) Kataresna’annepon Junandalem aarga’an dhari odhi’, daddi abdidalem ngagungngagi Junandalem.
4(63-5) Abdidalem asokkor ka Junandalem saomorra, ngangka’ tanang ka Junandalem sambi adu’a.
5(63-6) Abdidalem amolja’agi Junandalem sambi asorak, sabab sokma abdidalem sareng Junandalem epakennyang, akadi se eparenge teddha’an se nyaman.
6(63-7) E bakto dhung-tedhungan abdidalem emot ka Junandalem; samalem benteng abdidalem mekkere Junandalem,
7(63-8) sabab Junandalem se nolong abdidalem; e babana kalembangngepon Junandalem abdidalem ngaop sambi anyanye kalaban ate gumbira.
8(63-9) Abdidalem nagenne ka Junandalem epasekken, astaepon Junandalem se nyekkenne sareng masalamet abdidalem.
9(63-10) Namong reng-oreng se mateyana abdidalem bakal torona ka dunnyaepon oreng mate.
10(63-11) Reng-oreng gapaneka badhi tebasa e dhalem paperrangan, daddi teddha’anna burun alas.
11(63-12) Rato badhi anga-bunga lantaran partolongannepon Allah; oreng se asompa bit asmaepon Allah bakal amolja’agiya asmana, namong colo’epon oreng se lecegan bakal esompedda.