1Kaangguy pamimpinna koor. Eerenge calempong. Jaburra Daud. (67-2) Moga Allah bellas ban aberkadi sengko’ ban ba’na, moga Salerana ngoladana ka sengko’ ban ba’na kalaban mora ate.
2(67-3) Ya Allah, moga karsaepon Junandalem ekaonengana oreng saantero bume, moga kasalameddannepon Junandalem ekaonengana sareng sa-bangsa.
3(67-4) Ya Allah, moga sa-bangsa amolja’agiya Junandalem, moga sa-bangsa padha’a asokkor ka Junandalem.
4(67-5) Moga sa-bangsa padha’a asorak kaperagen, sambi asorak kalaban gumbira. Sabab Junandalem adil e dhalem marenta sareng nonton saneyap bangsa e dunnya.
5(67-6) Ya Allah, moga sa-bangsa amolja’agiya Junandalem, moga sa-bangsa padha’a asokkor ka Junandalem.
6(67-7) Tana la makalowar hasella, Allah, Allahna sengko’ ban ba’na se apareng berkat.
7(67-8) Allah aberkadi sengko’ ban ba’na; moga Salerana ehormadi saantero dunnya.