Alkitab Mobile SABDA
[VER] : [MADURA]     [PL]  [PB] 
 <<  Mazmur 69 >> 

1Kaangguy pamimpinna koor. Menorot nyanyeyan: Kembang Kacobung. Dhari Daud. (69-2) Ya Allah, nyo’ona salamet abdidalem, Guste, sabab aeng ampon ongga gan le’er.

2(69-3) Abdidalem tacellet ka cellot se dhalem, ta’ manggi tana panedda’anna soko. Abdidalem tasellem e aeng se dhalem, eanyo’ omba’ raja se santer.

3(69-4) Abdidalem ampon lesso se ra’-era’an, le’er kantos kerreng rassana. Mata kantos peddi anante’ bantowan dhari Junandalem, Guste Allah.

4(69-5) Oreng se baji’ ka abdidalem ta’ kalaban badha sababba, abannya’an dhari obu’ se tombu e cethak. Abdidalem epateyana reng-oreng kowat; se nyerrang abdidalem ngangguy petenna. Abdidalem epaksa mabali rang-barang se banne hasella rampasan.

5(69-6) Ya Allah, Junandalem ngagali sadajana kasala’an abdidalem, dusa abdidalem ta’ ekenneng errep dhari Junandalem.

6(69-7) Ja’ kantos abdidalem matodhusan reng-oreng se ngarep ka Junandalem, Guste ALLAH Se Mahatenggi, Se Mahakobasa. Ya Allah Isra’il, ja’ kantos abdidalem madhateng nespa ka reng-oreng se nyemba Junandalem!

7(69-8) Sabab lantaran Junandalem abdidalem eya-seya, lantaran Junandalem abdidalem ecale oreng sabannya’na.

8(69-9) Abdidalem akadi oreng manca e seddi’na la-bala sadajana, ale’ kaka’ tadha’ se kennala.

9(69-10) Samangat abdidalem rabbang lantaran taresna ka Padalemmannepon Junandalem; abdidalem eya-seya reng-oreng se ya-nyeya Junandalem.

10(69-11) Abdidalem apowasa marendha aba’, namong eya-seya sareng reng-oreng.

11(69-12) Abdidalem ngangguy kaen karong partandha sossa, namong ekala’-gella’ oreng sabannya’na.

12(69-13) Abdidalem daddi rarasanna oreng, reng-oreng mabu’ padha anyanye parkara abdidalem.

13(69-14) Namong abdidalem adu’a ka Junandalem, GUSTE, Ya Allah, kasokana Junandalem nyaodi e bakto se sae. Nyo’ona tolong abdidalem, lantaran taresnana Junandalem se raja, sareng lantaran kaestowannepon Junandalem.

14(69-15) Ja’ kantos abdidalem tasellem e dhalem cellot, nyo’ona salamet abdidalem dhari reng-oreng se baji’ ka abdidalem, sareng dhari aeng se dhalem.

15(69-16) Ja’ kantos abdidalem eanyo’ omba’ raja, sareng tasellem e dhasarra tase’ otaba ekobur e dhalem lobang.

16(69-17) Ngereng abdidalem saodi, GUSTE, sabab Junandalem sae sareng taresna salanjangnga. Kasokana Junandalem atole ka abdidalem samangken, sabab bellas asena Junandalem talebat rajana.

17(69-18) Ja’ ngetek dhari abdidalem ka’dhinto, sabab abdidalem kasossa’an, ngereng duliyan, abdidalem nyo’ona tolong.

18(69-19) Ngereng ka ka’dhinto, pasalamet abdidalem, palopottagi dhari moso.

19(69-20) Junandalem ngagali saponapa abdidalem eya-seya, ecale sareng epanespa, Junandalem ngagali ka moso abdidalem sadajana.

20(69-21) Ate abdidalem ancor lantaran eya-seya, abdidalem kantos potos pangarep. Abdidalem nyare kabellasan, namong tadha’ ollena; abdidalem nyare panglepor, namong ta’ manggi pa-ponapa.

21(69-22) La’-mala’ abdidalem epakon neddha racon e bakto lapar; e bakto pelka’ epakon ngenom cokka.

22(69-23) Mandar pestana reng-oreng gapaneka madhatengnga calaka’ ka aba’na, sareng daddi jebbak ka para tamoyya.

23(69-24) Mandar tengalla eparengngana buta, balikadda eparengngana ta’ kowat.

24(69-25) Teba’agi dukaepon Junandalem ka reng-oreng gapaneka, me’ olle reng-oreng gapaneka katebanan babendunnepon Junandalem se rabbang lap-ngolap.

25(69-26) Diggal parkemahannepon me’ olle seppe, sadajaepon kemahna me’ olle tadha’ orengnga.

26(69-27) Sabab reng-oreng gapaneka nganeyaja reng-oreng se eokom Junandalem, sareng ngacaca reng-oreng se eseksa Junandalem.

27(69-28) Diggal kasala’anna me’ olle sajan bannya’; ja’ pabendherragi reng-oreng gapaneka.

28(69-29) Diggal nyamana me’ olle ekosot dhari ketabba oreng odhi’; ban ta’ ecathet e dhalem dhaftarra reng-oreng se jujur.

29(69-30) Namong abdidalem etendhes kantos sake’ sadaja, angkessagi abdidalem, Guste, pasalamettagi.

30(69-31) Daddi sengko’ anyanye ngagungngagiya Allah, amolja’agiya Salerana sambi anyanye asokkor.

31(69-32) Jareya lebbi ekasokane PANGERAN ebandhing kurban sape lake’, kurban sape lake’ se raja.

32(69-33) Nangale’e jareya, oreng se tatendhes perak, oreng se nyemba Allah padha raja atena.

33(69-34) Sabab PANGERAN meyarsa’agi oreng se mesken, ta’ loppa ka oreng se epenjara.

34(69-35) Molja’agi Allah, langnge’ ban bume, tase’ raja ban saessena.

35(69-36) Allah masalamedda Yerusalim ban majaga’a pole tha-kottha Yehuda. Ommadda Pangeran ennengnga e jadhiya, tana jareya daddiya andhi’na.

36(69-37) Na’ potona bakal narema’a sangkol tana jareya, reng-oreng se taresna ka Pangeran bakal ennengnga e jadhiya.


  Share Facebook  |  Share Twitter

 <<  Mazmur 69 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel