Alkitab Mobile SABDA
[VER] : [MADURA]     [PL]  [PB] 
 <<  Mazmur 72 >> 

1Dhari Sulaiman. Ya Allah, ajarragi okomannepon Junandalem ka rato, parengngagi kaadilannepon Junandalem ka pottrana rato.

2Moga rato ahakime ommattepon Junandalem menorot hokom, sareng adil ka reng-oreng se tatendhes.

3Moga nagara abdidalem eparengngana ma’mor, ra’yattepon ngarassa’agi kaadilan.

4Moga rato abilla’ana ha’epon ra’yat kene’, nolong reng-oreng mesken sareng matadha’ reng-oreng se nganeyaja ra’yat.

5Moga salerana teptebba kobasa kantos ron-temoron saabidda gi’ badha are sareng bulan.

6Moga rato padha’a sareng ojan se gaggar e gal-teggal, akadi ojan derres se mabacca tana.

7Moga kaadilan atamba’a sae e jaman pamarenta’anna, nagara ma’mor saabidda bulan gi’ nyonar.

8Moga karaja’annepon atamba’a lebar dhari tase’ se settong ka tase’ settongnga, malebar dhari temor kantos ka bara’.

9Pandhudhu’epon sagara beddhi badhi asojuda ka salerana, moso asojud e adha’na padana.

10To-rato Tarsis sareng lo-polo badhi abakta’a tor-ator ka salerana. To-rato Arab sareng Etiopia rabu abakta pesse opet.

11To-rato badhi asojuda sadaja e ajunanna, sa-bangsa sadajana badhi daddiya dunorra.

12Sabab salerana nolong oreng se tatendhes odhi’na se ta’ gadhuwan kakowadan ta’ bisa apa-ponapa, ban oreng mesken aserro nyo’on tolong ka salerana.

13Rato gapaneka bellas ka oreng mesken sareng ra’yat biyasa, sareng masalamet reng-oreng se malarat odhi’na.

14Salerana mabebas reng-oreng gapaneka dhari panendhessan sareng kakerrasan, sabab odhi’na reng-oreng gapaneka eanggep talebat raja argana.

15Lanjang omor, rato! Moga salerana eatorana emmas dhari nagara Arab. Moga salerana enyo’onnagi ka Pangeran ros-terrosan, sareng eberkadi Pangeran salanjangnga.

16Moga bannya’ a hasella gandum saantero nagara, mo’-gumo’epon possa’ sareng hasel bume. Moga tanaepon landhu akadi Pagunongan Libanon, pandhudhu’epon kotthana atamba akadi rebba e talon.

17Moga asmaepon rato ekaemodi salanjangnga, moga asmaepon atamba’a kasohor saabittepon gi’ badha are se nyonar. Moga sa-bangsa nyo’ona berkattepon Junandalem akadi se etarema salerana, sareng nyo’on sopaja rato eparengngana senneng salanjangnga.

18Molja’agi PANGERAN, Allahna Isra’il! Pera’ Salerana se alampa’agi sabarang se makasambu’ ate.

19Molja’agi asmana se agung salanjangnga; moga kamolja’anna mossa’e bume ban saessena! Amin! Amin!

20Gan jadhiya du’ana Daud, pottrana Isay.


  Share Facebook  |  Share Twitter

 <<  Mazmur 72 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran