Dual Panel1Nyanyeyan pangajaranna Etan, oreng Ezrahi. (89-2) Kataresna’annepon Junandalem, GUSTE, sareng abdidalem enyanyeyagiya ros-terrosan, kaestowannepon Junandalem eberta’agiya ron-temoron salanjangnga.
2(89-3) Sabab abdidalem oneng kataresna’annepon Junandalem langgeng tadha’ ambuna, kaestowannepon Junandalem akadi langnge’ kokona.
3(89-4) Junandalem adhabu, "Sengko’ la agabay parjanjiyan ban oreng Tang peleyan; Sengko’ la asompa ka Daud, Tang abdi:
4(89-5) ‘Korse karaja’anna ba’na bi’ Sengko’ ejaga’a salanjangnga, ron-temoron na’ potona ba’na bakal toju’a e korse jareya.’"
5(89-6) Kompolan e sowarga ngalem sabarang se ajib se elampa’agi Junandalem, sareng anyanyeyagi kaestowannepon Junandalem, GUSTE.
6(89-7) E langnge’ tadha’ se akadi Junandalem, GUSTE, tadha’ mahlok sowarga se madhane Junandalem.
7(89-8) Junandalem ehormadi e kalangannepon oreng se socce, ekatako’e ngalebbi’i sadaja se ngalenglenge Junandalem.
8(89-9) PANGERAN, Allah Se Mahakobasa, pasera se padha sareng Junandalem kakowadanna? Junandalem esto e dhalem sadajana parkara.
9(89-10) Junandalem ngobasane tase’ se raja omba’na, sareng maambu omba’na se nako’e.
10(89-11) Rahab, naga tase’ sareng Junandalem eparemmok epate’e, astaepon Junandalem se kowat makala sadajana moso.
11(89-12) Langnge’ sareng bume kaagungannepon Junandalem, dunnya saessena cepta’anna Junandalem.
12(89-13) Junandalem se abadhi lao’ sareng dhaja, Gunong Tabor sareng Gunong Hermon rak-soragan amolja’agi Junandalem ce’ peragga.
13(89-14) Raja onggu kakobasa’annepon Junandalem, raja onggu kakowadannepon Junandalem!
14(89-15) Kaadilan sareng hokom dhasarra karaja’annepon Junandalem, kataresna’an sareng kaestowan nyata e dhalem sadaja se elampa’agi Junandalem.
15(89-16) Pojur onggu bangsa se abakte ka Junandalem kalaban ate gumbira, se odhi’ e dhalem cajana kahadirannepon Junandalem, GUSTE.
16(89-17) Saare benteng reng-oreng gapaneka padha perak sareng teptep koko lantaran kabecce’annepon Junandalem.
17(89-18) Junandalem marenge abdidalem sadajana kamennangan se talebat rajana, lantaran kabecce’annepon Junandalem abdidalem sadaja mennang.
18(89-19) Sabab se ngaobi abdidalem sadaja oreng peleyannepon Junandalem, GUSTE; rato abdidalem kaagungannepon Allah Isra’il se socce.
19(89-20) Gi’ jaman lamba’ e bakto Junandalem ngaton, Junandalem adhabu ka abdiepon se esto, "Sengko’ la nolong pahlawan se kasohor, oreng se epele bi’ Sengko’ dhari antarana ra’yat epadaddiya rato.
20(89-21) Sengko’ la nemmo Daud, Tang abdi, bi’ Sengko’ la eangkat ngangguy mennya’ opacara.
21(89-22) Tang kakowadan bakal ngaobana aba’na ros-terrosan, Tang kobasa bakal makowada aba’na.
22(89-23) Aba’na ta’ kera epakala mosona, oreng jahat ta’ kera bisa apa-rapa ka aba’na.
23(89-24) Mosona kabbi bi’ Sengko’ epaancora, sapa se baji’ ka aba’na epamateya.
24(89-25) Sengko’ pagguna taresna ban esto ka aba’na, sajan abit epasajana kobasa.
25(89-26) Sengko’ malebara karaja’anna, dhari Tase’ Tengnga epasampe’a ka Songay Efrat.
26(89-27) Daud bakal ngoca’a ka Sengko’, ‘Junandalem Rama abdidalem, Allah abdidalem, se ngaobi sareng masalamet abdidalem.’
27(89-28) Bi’ Sengko’ aba’na epadaddiya Tang ana’ se sareyang, se paleng agung e antarana to-rato sadunnya.
28(89-29) Bi’ Sengko’ oreng jareya ekataresna’ana saterrossa, Tang parjanjiyan ban aba’na bakal teptep kokowa.
29(89-30) Korse karaja’anna bi’ Sengko’ ejaga’a saabidda badha langnge’ e attassa bume, ron-temoron na’ potona bakal marenta’a e korse jareya.
30(89-31) Tape mon Tang hokom ta’ etoro’ bi’ na’ potona, mon odhi’na ta’ atoro’ ka Tang parenta,
31(89-32) mon na’ potona ta’ marduli ka Tang oca’, ban ngenthengngagi Tang atoran,
32(89-33) bi’ Sengko’ eokoma ngangguy peccot polana kasala’anna jareya, ban epadhatengngana balai lantaran sa-dusana.
33(89-34) Tape Sengko’ paggun taresna’a ka Daud, ban ta’ loppa’a ka Tang janji ka aba’na.
34(89-35) Tang parjanjiyan ban Daud jareya ta’ epabattala, dhari Tang janji tadha’ se epaburunga.
35(89-36) Sengko’ asompa bit Tang nyama se socce sakaleyan kaangguy salanjangnga; ka Daud Sengko’ ta’ acaca’a lecek.
36(89-37) Korse karaja’anna bakal kokowa saabidda are gi’ badha, ron-temoron na’ potona bakal marenta’a e jadhiya.
37(89-38) Karaja’anna bakal teptebba badha akantha bulan, sakse se esto e attas ondhem."
38(89-39) Namong samangken Junandalem duka ka rato, Junandalem mowang sareng nolak oreng peleyannepon dibi’.
39(89-40) Junandalem maburung janjina ka abdiepon, makothana sareng Junandalem ebuwang ka cellot.
40(89-41) Junandalem magujur dhung-geddhungnga kotthana, teng-bintengngepon epatadha’ karena.
41(89-42) Sadajana oreng se lebat arampas dhi’-andhi’na, saleraepon ekala’-gella’ ga-tatanggana.
42(89-43) Junandalem apareng kamennangan ka so-mosona, tro-sattrona padha epaperak.
43(89-44) Sanjatana sareng Junandalem epatadha’ gunana, e dhalem paperrangan ta’ eparenge partolongan.
44(89-45) Kakobasa’annepon sareng Junandalem eahere, korse karaja’anna eonjebbagi ka tana.
45(89-46) Junandalem mapandha’ bakto ngodhana, epamalo e adha’na oreng sabannya’na.
46(89-47) Kantos bilaepon Junandalem se ngetegga, GUSTE? Kantos bilaepon Junandalem terrosa duka akadi apoy se bal-kobalan?
47(89-48) Abdidalem laju enga’ ce’ sakejja’na odhi’ abdidalem e dunnya, Junandalem nyepta’agi manossa menangka mahlok se fana.
48(89-49) Pasera se bisa odhi’ terros sareng ta’ mateya? Pasera se bisa lopot dhari koburan?
49(89-50) Adhu Guste, ka’dhimma bukte kataresna’annepon Junandalem se asal, se ejanjiyagi Junandalem ka Daud bit kaestowannepon Junandalem?
50(89-51) Kaemodi Guste, kadi ponapa abdidalem ka’dhinto ecale, abdidalem sangsara eya-seya sa-bangsa sabannya’na.
51(89-52) So-mosoepon Junandalem ya-nyeya rato peleyannepon Junandalem, GUSTE, ka ka’dhimma’a saos rato meyos, ekala’-gella’ ekala’-gella’ sareng reng-oreng gapaneka.
52(89-53) Molja’agi PANGERAN salanjangnga. Amin! Amin!