Alkitab Mobile SABDA
[VER] : [MADURA]     [PL]  [PB] 
 <<  Nahum 1 >> 

1Reya’ pessenna Allah parkara Niniwe. Pessen jareya enyata’agi kalaban pangaton se eparengngagi ka Nahum, nabbi se asalla dhari Elkos.

2PANGERAN ta’ kasokan so-mosowan, oreng se ta’ atoro’ ka dhabuna masthe eparenge okoman. PANGERAN ce’ dukana, males sake’ atena ka reng-oreng jareya.

3Pajat PANGERAN ta’ gampang duka, tape Salerana talebat kobasa, daddi sapa se alako sala ta’ kera epalopot dhari okomanna. E kennengnganna PANGERAN alomampa, e jadhiya dhateng kaleng busbus; e kennengngan se edidda’ padana, e jadhiya abu daddi ondhem.

4Tase’ eara, pas epakerreng aengnga, sakabbinna songay epaasat. Gunong Karmel ban gal-teggal e Basyan daddi kajal, e Libanon padha elop sakabbinna kembang.

5Nong-gunong agaledder e ajunanna; mo’-gumo’ padha ngalelle sakabbinna. Mon PANGERAN ngaton, bume agedder, dunnya ban pandhudhu’na padha ngetter.

6Sapa se kellara mon Pangeran duka? Sapa se bisa lopot dhari dukana? Salerana ngettokkagi dukana se rabbang, e ajunanna bato daddi abu, padha lejjar.

7PANGERAN reya ce’ saena, ngaobi ommadda e bakto sossa; Pangeran ajaga oreng se nyare pangaoban ka Salerana.

8Akantha banjir raja Pangeran maancor so-mosona; se bangal alaban ka Salerana eantem ban maot epasampe’ mate.

9Apa’a bai se ekasajja ba’na kaangguy alaban ka PANGERAN, tanto tadha’ se kalakona. Salerana ta’ kera males sake’na ate ka so-mosona sampe’ dhu kale.

10Ba’na bakal eobbara akantha darameyan se kerreng, akantha ombut dhuri se ale’-pale’.

11Dhari ba’na, Niniwe, kalowar oreng se possa’ ban sajja se jahat. Oreng jareya asajja alabana ka PANGERAN.

12Daddi PANGERAN adhabu ka Isra’il, ommadda, "Maske reng-oreng Asyur rowa kowat ban bannya’, tape bakal epaancora sampe’ mosna tadha’ karena. He, Tang bangsa, bi’ Sengko’ ba’na epanyangsara, tape jareya bi’ Sengko’ ta’ edhukaleyana.

13Sateya kobasana Asyur ka ba’na bi’ Sengko’ epaambuwa, ban rantay se nale’e ba’na bi’ Sengko’ epapegga’a."

14Reya’ potosanna PANGERAN parkara bangsa Asyur, "Bangsa jareya bakal ta’ andhi’a toronan se daddiya panerrossa bangsana. Ca-arcana brahalana se badha e dhalem wel-kowella dibana bi’ Sengko’ epaancora. Koburanna bangsa Asyur bi’ Sengko’ la esadhiya’agi, sabab bangsa jareya la ta’ pantes odhi’!"

15Mara abassagi, badha otosan dhateng lebat e nong-gunong, ngeba kabar bagus, kabar kamennangan. He, bangsa Yehuda, mara raya’agi are rajana ba’na, sarta bajar hajadda ba’na ka Allah. Nagarana ba’na ta’ kera ejaja oreng jahat pole. Reng-oreng jahat jareya la epaancor tadha’ karena!


  Share Facebook  |  Share Twitter

 <<  Nahum 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran