Dual Panel1E settong are, pa’ bulan saellana jareya, e baktona Rato Artahsasta teppa’na adha’ar, sengko’ ngangka’agi nom-enomanna kalaban mowa se sossa. Rato ta’ tao ngoladi tang mowa se katon sossa akantha e are jareya.
2Daddi rato jareya mareksane, "Ba’na ta’ sake’, arapa me’ katon ce’ sossana? Tanto badha se marentek atena ba’na." Sengko’ takerjat,
3laju nyaot, "Moga-moga junandalem eparengngana odhi’ salanjangnga! Kadi ponapa abdidalem se ta’ sossa’a manabi kottha kennengngannepon koburanna sadajana bangatowa abdidalem samangken kare aropa jur-gujuran, sarengngan pole bang-labang sakethengngepon ampon ancor katonon sadaja."
4Dhabuna rato, "Daddi apa pangaterrona ba’na sateya?" E dhalem ate sengko’ adu’a ka Allah se ngobasane sowarga,
5pas ngoca’ ka rato, "Manabi junandalem neser ka abdidalem sareng kasokan ngabbuli parnyo’onan abdidalem, ngereng abdidalem otos ka tana Yehuda sopaja abdidalem kengenga maddek pole kottha kennengngannepon koburanna sadajana bangatowa abdidalem."
6Rato se alenggi ajajar ban parameswarina, ngabbullagi tang parnyo’onan. Sengko’ etanya’agi barampa abidda ennengnga e Yehuda ban bila se abaliya; sengko’ abala tanggalla se la eteptebbagi bi’ sengko’.
7Sengko’ pas nyo’on sorat ka para gubennor e propinsi Efrat Bara’, sopaja magampanga tang parjalanan ka Yehuda.
8Salaenna jareya sengko’ menta sorat ka Asaf, pangawassa alassa karaja’an, sopaja sengko’ eberri’ana kaju se ekagabaya labang sakethengnga binteng e seddi’na Padalemman Socce, ban kaangguy geddhungnga kottha ban bengko se ekennengngana sengko’. Tang parnyo’onan jareya ekabbuli kabbi bi’ rato, sabab sengko’ etolonge Pangeran.
9Rato marenta’agi pan-barampan parwira ban tantara se nompa’ jaran abarengnge sengko’ mangkat ka Efrat Bara’. Sanapa’na ka jadhiya, soradda rato gella’ bi’ sengko’ eatorragi ka para gubennor e jadhiya.
10Tape e bakto Sanbalat, oreng Bet Horon, ban Tobiya, kaom oreng agung e propinsi Amon, ngedhing ja’ sengko’ entar ka jadhiya ngorosa kaparlowanna bangsa Isra’il, se kadhuwa jareya pas peggel.
11Sanapa’na ka Yerusalim, sengko’ aistirahat tello are abidda.
12Saabidda jareya sengko’ ta’ ala-bala ka sapa’a bai ja’ Allah marenge ilham ka sengko’ kaangguy maddek Yerusalim pole. Kalagguwanna lem-malem sengko’ jaga tedhung; sengko’ pas kalowar, ngajak pan-barampan kanca ka lowar kottha. Sengko’ sakanca ta’ ngeba keban tompa’an laenna, kajabana hemar se etompa’ sengko’.
13Are gi’ malem e baktona sengko’ sakanca mangkat dhari kottha jareya lebat e Labang Saketheng Cora e bagiyan bara’. Dhari jadhiya sengko’ sakanca terros dha’ lao’, lebat e Somber Naga ka Labang Saketheng Bu-rombu. E dhalem parjalanan jareya sengko’ mareksa bagiyanna geddhung kottha jareya se sak-rosak; salaenna jareya sengko’ nenggu keya bang-labang saketheng se katonon tadha’ karena.
14Saellana jareya dhari bagiyan temorra kottha sengko’ terros ka dhaja ka Labang Saketheng Aeng Maancor ban Tamanna Rato. Tape e jadhiya talebat bannya’ jur-gujuran daddi ta’ ekenneng lebadi hemar se etompa’ sengko’.
15Daddi sengko’ sakanca toron ka Cora Kidron ban nerrossagi parjalanan e malem jareya sambi mareksa geddhungnga kottha jareya. Saellana jareya sengko’ sakanca abiluk terros abali ka kottha lebat Labang Saketheng Cora.
16Para pamimpinna ra’yat tadha’ se taowa sengko’ reya entar dha’ emma ban apa se elakonana sengko’. Sabab sampe’ bakto jareya sengko’ ta’ ala-bala pa-apa ka reng-oreng se sabangsa ban sengko’, maske oreng jareya imam otaba pamimpinna ra’yat, ka ba-ponggaba otaba sapa’a bai se noro’a maddek kottha Yerusalim.
17Tape saellana jareya sengko’ ngoca’ ka reng-oreng jareya, "Ngereng oladi saponapa nyangsarana kabadha’anna bangsa Isra’il paneka! Yerusalim pera’ kare jur-gujuranna ban bang-labang sakethengnga katonon tadha’ karena! Tore geddhungnga kottha Yerusalim paneka paddek pole, me’ olle sampeyan ban kaula ta’ eya-seya oreng pole."
18Sengko’ pas nyareta’agi ka reng-oreng jareya baramma Allah se nolonge sengko’ sarta apa se edhabuwagi rato ka sengko’. Saodda reng-oreng jareya, "Tore molae paddek saos!" Daddi kabbi pas padha aya-sadhiya se amola’ana lalakon jareya.
19E bakto rancana jareya ekaedhing bi’ Sanbalat, Tobiya ban oreng Arab se anyama Gesyem, sengko’ sakanca ekala’-gella’. Ca’na reng-oreng jareya, "Sampeyan ganeka aponapa’a? Aberonta’a ka rato?"
20Sengko’ nyaot, "Allah se ngobasane sowarga tanto nolonge kaula sadaja sopaja lalakon paneka bisa’a ahasel. Kaula sadaja paneka abdina Allah, samangken mola’ana maddegga pole kottha paneka. Tape sampeyan sadaja ta’ gadhuwan ha’ e Yerusalim paneka. La’-mala’ mon badha oreng acaca parkara Yerusalim, nyamana sampeyan sadaja ta’ kera ebut-sebbut."