Alkitab Mobile SABDA
[VER] : [MADURA]     [PL]  [PB] 
 <<  Ratapan 1 >> 

1Saapa seppena Yerusalim sateya reya, kottha se lamba’ ce’ rammena. Lamba’ se agung e antarana sa-bangsa, sateya akantha randha. Lamba’ kottha jareya se paleng epojja, sateya la epadaddi dunor ban haddam.

2Samalem benteng Yerusalim nanges ce’ ngennessa, aeng matana agili e pepena. Dhari para kakasena tadha’ settonga se endha’ alepor atena. Sateya la ekiyanadi ca-kancana se abalik daddi mosona.

3Pandhudhu’ Yehuda ondur dhari nagarana, polana ekadunor ban talebat nyangsarana. Sateya padha apolong ban sa-bangsa laenna, tape ta’ andhi’ kennengngan se madhateng kataremtemman. E bakto nyandhang sangsara, reng-oreng jareya ekeppong bi’ mosona.

4E re-are raja tadha’ oreng se entar ka Padalemman Socce. Ban-paraban se lakona anyanye e jadhiya nanggung sangsara, ban mam-imam padha aserrowan. Tadha’ oreng e bang-labang sakethengnga, Kottha Siyon talebat sossana.

5So-mosona padha gumbira polana ngobasae nagara jareya. Nagara jareya bi’ PANGERAN epanyangsara, polana talebat bannya’ dusana. Pandhudhu’na la etawan ban eangko’ ka pambuwangan.

6Kajaja’anna Yerusalim pera’ aropa careta jaman lamba’. Para pamimpinna la ta’ andhi’ kakowadan akantha manjangan se kalaparan. Padha ta’ bisa apa-rapa ngadhebbi mosona se nyerser aba’na.

7Saellana ngalotor ban nyangsara, Yerusalim enga’ ka jaman lamba’na, e bakto gi’ bannya’ dhi’-andhi’na. E bakto pandhudhu’na gaggar ka tanangnga mosona, tadha’ settonga oreng se aberri’ partolongan. So-mosona padha agella’an nangale’e pagaggarra.

8Yerusalim makotor aba’na ban dusana se sabannya’na. Se lamba’na ahormadi, sateya ya-nyeya aba’na polana nangale’e kabadha’anna se abangkang. Yerusalim aserrowan, polana talebat malona.

9Kanajjisanna katon ce’ nyatana, tape la ta’ parduli ka apa se bakal kadaddiyana ka aba’na. Pangalotorra ce’ sarana, tape tadha’ oreng se alepor atena. Daddi pas nyo’on kabellasanna PANGERAN, polana so-mosona padha mennang.

10Dhi’-andhi’na kabbi la erampas mosona. La’-mala’ sateya nangale’e so-mosona maso’ ka Padalemman Soccena, se tamaso’ lalakon se elarang bi’ PANGERAN monggu ka oreng se ta’ kaetong ommadda.

11Pandhudhu’na aserrowan sambi nyare kasap; dhi’-andhi’na se aji eporop ban roti sopaja aba’na ta’ mateya. Yerusalim aera’, "Adhu GUSTE, oladi abdidalem ka’dhinto, oladi kasangsara’anna abdidalem sadajana."

12"He, reng-oreng se lebat e lorong, mara abas patete tetene! Ba’ badha’a kasangsara’an se padha rajana akantha se etanggung sengko’ sateya reya, seksa se eteba’agi ka sengko’ bi’ PANGERAN, polana dukana se talebat rajana?

13Dhari langnge’ epatoron apoy se ngello’ sampe’ ka dhalem tang ate. E adha’anna sengko’ epasange jira’ sampe’ sengko’ labu. Sengko’ pas edina kadibi’an, nyangsara saare benteng.

14Tang dusa epondhut kabbi, pas epasettong etale’e, laju ekalongngagi ka tang le’er, sampe’ sengko’ ta’ kowat nahan berra’na. Sengko’ epassra’agi ka moso bi’ Pangeran, sengko’ ta’ andhi’ kakowadan se alabana.

15Pangeran nganggep tadha’ ajina sakabbinna tang pahlawan se gaga’. Pangeran madhateng tantara sabannya’na epamateyana sakabbinna tang ngangodhadan. Tang bangsa enyek-enyek sampe’ ancor akantha oreng se merres anggur.

16Jareya se daddi sababba tang aeng mata ngalocor, tadha’ se aberri’ samangat ban panglepor. Tang bangsa la kaelangan sakabbinna, sabab moso lebbi kobasa.

17Sengko’ ajuluwagi tang tanang menta bantowan, tape tadha’ settonga se aberri’ panglepor. PANGERAN ngerem moso dhari man-dhimman; se dhateng merrange sengko’. Sengko’ epakantha kas-rakas se majitjit ate e nga’-tengnga’anna so-moso jareya.

18Tape PANGERAN se bendher sabab sengko’ ta’ atoro’ ka papakonna. Edhingngagi sengko’, sa-bangsa, abassagi sengko’ e dhalem kasangsara’an reya. Tang ngangodhadan lake’ bine’ padha etawan, eangko’ egiba ka pambuwangan.

19Sengko’ ngolok tang sobat ban tang ca-kanca tape kabbi la padha akiyanat ka tang aba’ reya. Para imam ban pamimpinna bangsa la padha mate kabbi e rong-lorongnga kottha, e bakto nyare kakan kaangguy meyara odhi’na.

20Adhu, GUSTE, oladi abdidalem ka’dhinto, ate abdidalem kobater sareng tako’, mekkere sadajana dusa ate rassana ancor. E rong-lorong badha oreng epate’e oreng, e dhalem roma badha oreng mate.

21Adhu, Guste, peyarsa’agi serrona abdidalem, tadha’ oreng se alepor abdidalem. So-moso abdidalem padha perak sadajana polana sareng Junandalem abdidalem epacalaka’. Padhatengngagi are se ejanjiyagi Junandalem; panyangsara’agi so-moso abdidalem papadha akadi abdidalem.

22Oladdagi sadajana kajahadanna reng-oreng gapaneka, okommagi sadajana akadi Junandalem se ngokom abdidalem polana sa-dusa abdidalem. Abdidalem ngadhudhu e dhalem kasangsara’an, ate abdidalem sossa sareng nyangsara."


  Share Facebook  |  Share Twitter

 <<  Ratapan 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel