Alkitab Mobile SABDA
[VER] : [MADURA]     [PL]  [PB] 
 <<  Rut 1 >> 

1Gi’ jaman lamba’ e bakto bangsa Isra’il gi’ ta’ andhi’ rato, nagara Kana’an ekenneng laep. E bakto jareya badha oreng lalake’ nyamana Elimelekh, dhari kaom Efrata. Bengkona e Betlehem e dhaera Yehuda. Polana laep jareya Elimelekh entar ka nagara Mo’ab abareng ban binena se anyama Na’omi, sarta ana’ lalake’anna se kadhuwa, se anyama Mahlon ban Kilyon. Reng-oreng jareya enneng e jadhiya. E bakto reng-oreng jareya gi’ badha neng e jadhiya,

2(1:1)

3Elimelekh mate. Daddi Na’omi kare enneng ban ana’na se kadhuwa jareya.

4Ana’na se kadhuwa jareya abine oreng Mo’ab, se anyama Orpa ban Errut. Sapolo taon saellana jareya,

5Mahlon ban Kilyon mate keya, daddi Na’omi kare kadibi’an, kaelangan lake ban ana’na.

6Ta’ abit dhari jareya Na’omi ngedhing kabar ja’ PANGERAN aberkadi ommat Isra’il kalaban apareng hasella tana se bagus. Daddi Na’omi ban mantona se kadhuwa akes-rengkes ngalleya dhari Mo’ab.

7Se katello jareya mangkat abareng moleya ka nagara Yehuda. E tengnga jalan

8Na’omi ngoca’ ka mantona se kadhuwa jareya, "Kassa’ ba’na abali ka bengkona ebuna bai. Moga-moga PANGERAN saeya ka ba’na padha ban becce’na ba’na ka sengko’ ban ka reng-oreng se la mate rowa.

9Moga-moga bi’ PANGERAN ba’na eparengngana nemmo judhu me’ olle ba’na bisa ako-bengko pole." Samarena ngoca’ kantha jareya, Na’omi amet sambi nyeyom mantona se kadhuwa jareya. Tape Orpa ban Errut nanges ce’ kajana,

10sambi ngoca’ ka Na’omi, "Bunten, Bu! Kaula noro’a sampeyan, akompola ban bangsana sampeyan."

11"Ella, na’!" ca’na Na’omi, "lebbi bagus ba’na padha mole. Arapa’a me’ noro’a sengko’? Sengko’ ta’ kera andhi’ ana’ pole se ekenneng kalake ba’na.

12Kassa’ mole bai, sengko’ la ce’ towana, ta’ bisa alake pole. La’-mala’ maske sengko’ gi’ bisa ngarep bisa’a alake pole dhaggi’ lem-malem sarta pas rembi’ lalake’,

13apa ba’na endha’ anante’a sampe’ tang ana’ jareya raja? Apa ba’na ta’ alake oreng laen pera’ polana jareya? Ella, na’, ja’ cara jareya! Sengko’ arassa ngennes, ce’ neserra ka ba’na polana kodu ngalame kabadha’an se kantha reya polana okomanna PANGERAN ka sengko’."

14Errut ban Orpa nanges pole ce’ kajana. Orpa pas amet sarta nyeyom mattowana, pas terros abali ka bengkona. Tape Errut ta’ endha’ apesa bi’ mattowana jareya.

15Ca’na Na’omi, "Errut, eparra ba’na la abali ka bangsana ban ka ba-dibana. Kassa’ ba’na abali keya, mole, noro’ Orpa!"

16Tape Errut nyaot, "Ampon, Bu, kaula ja’ pakon adinggallagi sampeyan! Sampeyan meyosa ka’amma’a saos, kaula ngerenga; sampeyan alenggiya e ka’imma saos, kaula apolonga. Bangsana sampeyan, bangsa kaula jugan. Allah se esemba sampeyan, esemba’a kaula jugan.

17E ka’imma pasedana sampeyan, kaula mateya sareng nyo’ona ekoburragi e gadhiya jugan. Mandar kaula eparengngana okoman se talebat berra’na sareng PANGERAN, manabi kaula kantos apesa sareng sampeyan, kajabana manabi sala settong e antarana sampeyan sareng kaula epondhut ajal!"

18Saellana tao ja’ karebba Errut la ta’ ekenneng pengo, Na’omi pas ta’ ca’-ngoca’ pole.

19Se kadhuwa pas terros ajalan sampe’ napa’ ka Betlehem. Sanapa’na ka jadhiya, oreng sakottha padha ramme. Babine’anna padha ngoca’, "Na’omi onggu rowa, ya?"

20"Sateya sengko’ ja’ olok Na’omi," saodda, "olok Mara bai, sabab odhi’na sengko’ reya epapae’ bi’ Allah Se Mahakobasa.

21E bakto mangkat dhari dhinna’ lamba’, sengko’ sogi, tape sateya sengko’ epabali dha’ enna’ bi’ PANGERAN e dhalem kabadha’an ta’ andhi’ pa-apa. Daddi sengko’ ja’ olok Na’omi pole, sabab PANGERAN Se Mahakobasa la ngokom sengko’ kalaban apareng kasangsara’an sabannya’na!"

22Kantha jareya caretana Na’omi se abali dhari Mo’ab abareng mantona oreng Mo’ab se anyama Errut jareya. Se kadhuwa jareya napa’ ka Betlehem parappa’na parmola’anna mosem anye gandum.


  Share Facebook  |  Share Twitter

 <<  Rut 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran