Dual Panel1Ba’na ja’ ngatorragi sape otabana dumba se ena ka GUSTE Allahna, sabab PANGERAN baji’ ka kurban se kantha jareya.
2Mon ba’na ngedhing ja’ e sala settonga kotthana ba’na badha oreng se andhi’ dusa ka GUSTE Allahna ba’na polana ta’ ngestowagi parjanjiyan
3ban papakonna, iya areya nyemba ban ngabdi ka la’-alla’an otabana ka are, bulan otabana tang-bintang,
4ba’na kodu nalektegi pateppa’ parkara jareya. Mon bendher pajat badha kajahadan se kantha jareya e Isra’il,
5oreng se sala jareya kodu egiba ka lowar kottha, pas garujuk pasampe’ mate.
6Tape oreng jareya pera’ olle eokom mate mon badha sakse kadhuwa otaba lebbi; oreng ta’ olle eokom mate mon saksena coma kasorang.
7Reng-oreng se daddi sakse kodu ngotebbagi bato dha’-adha’ ka oreng jareya, saellana jareya buru eterrossagi bi’ reng-oreng laenna. Kalaban cara se kantha jareya ba’na matadha’ kajahadan jareya.
8Mon badha parkara se ta’ ekenneng potose bi’ kim-hakim e kennengnganna kadaddiyan jareya polana malarat se motosana, ompamana parkara oreng mate’e oreng laen se ta’ etengnget otaba etengnget, oreng atokar polana dhi’-andhi’na otabana badha oreng se maloka oreng laen, ba’na kodu entar ka kennengngan se la epele GUSTE Allahna.
9Reppottagi parkara jareya ka mam-imam Lewi ban ka hakim se teppa’na atugas, pas dina me’ olle reng-oreng jareya se motose.
10Mam-imam ban kim-hakim jareya se kodu motose, ban ba’na kodu ajalannagi pa-apa se la ekoca’agi bi’ reng-oreng jareya ka ba’na.
11Tarema potosan jareya ban lakone apa se la eteptebbagi bi’ reng-oreng jareya sampe’ ka ke’-lekke’na.
12Sapa’a bai se bangal alaban ka hakim otabana imam se teppa’na atugas, kodu eokom mate; kalaban cara se kantha jareya ba’na matadha’ kajahadan jareya e Isra’il.
13Reng-oreng tanto ngedhing kabbi parkara kajahadan jareya ban tanto pas padha tako’, daddi pas ta’ kera badha pole se bangal alako kantha jareya."
14"Mon tana se eparengngagi ka ba’na bi’ GUSTE Allahna rowa la ekaandhi’ ba’na, ban ba’na la ako-bengko e jadhiya, olle daddi ba’na pas terro andhi’a rato akantha sa-bangsa laenna se badha e sabingkerra ba’na.
15Senga’ mon mele rato pateppa’, pele oreng peleyanna GUSTE Allahna ba’na. Rato jareya kodu bangsana ba’na dibi’; oreng manca ta’ olle epadaddi ratona ba’na.
16Rato ta’ olle kaagungan jaran bannya’ kaangguy tantarana, ban ta’ olle makon bangsa reya entar melle jaran ka Messer, sabab PANGERAN la adhabu ja’ ommadda ta’ olle abali ka nagara jareya.
17Rato ta’ olle bannya’ rajina, sabab mon rato bannya’ rajina pas ta’ emot ka PANGERAN. Bariya keya rato reya ta’ olle nompo’ emmas ban salaka.
18Mon oreng epadaddi rato kodu eatore buku se aesse kom-hokomma Allah se esalen dhari buku se asli se esempen bi’ mam-imam Lewi.
19Buku jareya kodu esaba’ e seddi’anna, ban rato jareya saomorra kodu maos buku jareya, sopaja rato jareya ajar apareng panghormadan ka GUSTE Allahna sarta ngestowagi sakabbinna papakon se etoles e dhalem buku jareya.
20Mon rato jareya bajeng maos buku jareya, ta’ kera nganggep salerana alebbiyan dhari reng-oreng sabangsana, ban ta’ kera ta’ atoro’ papakonna PANGERAN kalaban cara apa’a bai. Mon kantha jareya rato jareya ban toronanna bakal marenta’a bangsana sampe’ ron-temoron."