Dual Panel1"Suku Lewi eberri’i tugas daddi imam kabbi, daddi ta’ olle narema bagiyanna tana e Isra’il. Oreng Lewi jareya kodu odhi’ dhari tor-ator ban ban-kurban laenna se eatorragi ka PANGERAN.
2Suku Lewi ta’ olle andhi’ tana e antarana ku-suku laenna, sabab PANGERAN se daddi bagiyanna sangkola, akantha se la ejanjiyagi dibi’ bi’ PANGERAN ka suku jareya.
3Mon badha oreng ngatorragi kurban sape otaba dumba, bagiyan pokang adha’na, rahangnga ban tabu’na kodu ebagi ka mam-imam jareya menangka bagiyanna.
4Hasella gandum se dha’-adha’, bariya keya aeng anggur, mennya’ jaitun ban buluna dumba, daddi bagiyanna para imam jareya keya.
5Dhari sakabbinna suku Isra’il, GUSTE Allah mele suku Lewi jareya epadaddi imam salanjangnga.
6Mon badha oreng Lewi se asalla dhari kottha dhimma’a bai entar ka kennengngan se epele PANGERAN ban neptebba e jadhiya,
7olle daddi imam ban aladine GUSTE Allahna ba’na akantha reng-oreng Lewi laenna se atugas e jadhiya.
8Oreng Lewi jareya kodu narema kakan se padha bannya’na ban mam-imam laenna; ban pa-apa se ekeremmagi ana’ binena, daddi andhi’na keya."
9"Mon ba’na la maso’ ka nagara se eparengngagi ka ba’na bi’ GUSTE Allahna, ja’ nerowe kajahadanna sa-bangsa se badha e jadhiya.
10Ja’ sampe’ ba’na badha se ngurbannagi na’-ana’na menangka kurban obbaran. Ja’ sampe’ ba’na badha se daddi tokang tebbak, nyare dha-tandha, ngangguy wa’-duwa’ otabana
11elmo seher, otabana mabadha hubungan ban roh-errohna oreng mate.
12Oreng se ngalakone lalakon se jahat kantha jareya ekabaji’i bi’ GUSTE Allahna ba’na, ban jareya sababba arapa sa-bangsa jareya me’ epanyengla dhari nagara jareya e bakto ba’na maso’a ka jadhiya.
13Daddi ba’na kodu ngabdi ka GUSTE Allah pagu-onggu ate."
14Mosa pas adhabu, "Sa-bangsa se badha e nagara se ekennengngana ba’na rowa parcaja ka tokang tebbak ban nyare dha-tandha. Tape GUSTE Allah ta’ ngedine ba’na alako kantha jareya.
15Sabaligga, Salerana ngotosa nabbi akantha sengko’ reya, se epeleya dhari bangsana ba’na, ba’na kodu atoro’ ka nabbi jareya.
16E bakto ba’na akompol e Gunong Sinay, ba’na nyo’on sopaja ba’na ta’ ngedhinga pole sowarana GUSTE Allahna abu-dhabu ban ta’ nangaleyana pole kahadiranna Salerana e dhalem apoy se rabbang, polana ba’na tako’ mate.
17Daddi PANGERAN adhabu ka sengko’, ‘Parnyo’onanna reng-oreng jareya bicaksana.
18Sengko’ ngotosa nabbi akantha ba’na, bi’ Sengko’ epeleya dhari antarana ommat jareya dibi’. Nabbi jareya bi’ Sengko’ ebala’ana apa se kodu ekoca’agi, sarta malae ommat Isra’il sabarang se eparenta’agi Sengko’.
19Nabbi jareya bakal makkelana Sengko’ acaca ka ommat Isra’il, ban pa’-sapa’a se ta’ atoro’ ka oca’na nabbi jareya bi’ Sengko’ eokoma.
20Tape mon badha nabbi se manapa’ sen-pessen ka ommat Isra’il, ngoca’ esoro Sengko’, mangkana Sengko’ ta’ nyoro, nabbi jareya kodu mate; bariya keya mon badha nabbi se la-malae ommat Isra’il, se ngoca’ esoro la’-alla’anna, nabbi jareya kodu mate keya.’
21Olle daddi ba’na atanya e dhalem atena, ‘Baramma sengko’ se taowa apa pessenna nabbi rowa dhari PANGERAN apa banne?’
22Mon nabbi la-malae ba’na sambi ngoca’ epakon PANGERAN, tape se ekoca’agi jareya ta’ kalakon otaba tadha’ buktena, ramalanna jareya banne dhari PANGERAN. Babala’anna nabbi jareya dhari aba’na dibi’, ban ba’na ta’ osa tako’ ka nabbi jareya."