Dual Panel1Mon sape otaba dumbana oreng sabangsana ba’na posang ban ba’na nangale’e keban jareya, ba’na ja’ o-mata’tao, tape giba abali keban jareya ka orengnga se andhi’.
2Mon se andhi’ jareya jau bengkona, otabana ba’na ta’ tao sapa se andhi’, giba keban jareya ka bengkona ba’na. Mon se andhi’ dhateng nyare’e, bagi ka orengnga.
3Bariya keya mon ba’na nemmo hemar, angguyya oreng, otabana apa’a bai andhi’na oreng sabangsana ba’na.
4Mon hemar otabana sape andhi’na oreng sabangsana ba’na robbu e lorong, ba’na ja’ o-mata’tao, tape tolonge oreng jareya majaga’agi ebinna.
5Babine’ ta’ olle akalambi kantha lalake’ ban lalake’ ta’ olle akalambi akantha babine’, sabab oreng se kantha jareya ekabaji’i GUSTE Allah.
6Mon ba’na nemmo lebunna mano’ e settong kajuwan otabana e tana, dineng e lebunna mano’ jareya badha korbina mano’ se teppa’na ngerremme tellorra otabana apolong ban dhu’-budhu’na, korbina mano’ jareya ja’ kala’.
7Ba’na olle ngala’ dhu’-budhu’na, tape dina korbina me’ olle ngabber, sopaja ba’na lanjanga omor ban odhi’na ma’mor.
8Mon ba’na maddek bengko anyar, pasange pagar e sakalenglengnga penggirra ata’na. Daddi banne salana ba’na mon badha oreng labu dhari ata’ jareya sampe’ mate.
9Kebbun anggurra ba’na ja’ tamenne en-laenna kajabana bungkana anggur. Mon bi’ ba’na gi’ etamenne keya, ba’na ta’ olle ngala’ hasella kebbunna, iya areya hasella anggurra ban bariya keya hasella tamennan laenna.
10Ja’ masang sape ban hemar ka settong nanggala.
11Ja’ ngangguy kalambi se ekagabay dhari wol ban linen e dhalem settong tennonan.
12Poncana kalambina se pa’-empa’ pobuwi bay-rambay."
13"Ompamana badha oreng lalake’ se abine paraban, pas ta’ lebur pole ka babine’ jareya.
14Oreng jareya abay-gabay ngarane ja’ se bine’ jareya banne paraban e bakto akabin.
15E dhalem parkara jareya oreng towana se bine’ kodu ngala’ kaenna pangantan se badha lampadda dharana, menangka bukte ja’ ana’na e bakto jareya gi’ paraban. Kaen jareya kodu eduduwagi ka para pamimpinna kottha e pangadilan.
16Eppa’na babine’ jareya kodu ngoca’ kantha reya ka para pamimpinna kottha jareya, ‘Kaula ampon massra’agi ana’ kaula ka oreng paneka menangka binena, namong samangken oreng paneka ampon ta’ poron pole.
17Oreng paneka abay-gabay ngoca’ ja’ binena banne paraban e bakto se kadhuwa paneka akabin. Namong paneka’ buktena ja’ ana’ kaula e bakto ganeka gi’ paraban. Ngereng oladi lampadda dhara e kaen pangantanna paneka!’
18Para pamimpinna kottha jareya kodu ngolok lalake’ gella’, lalake’ jareya pas kodu epokol.
19Lalake’ jareya salaenna epokol kodu edhindha saratos pesse salaka, pesse jareya kodu ebagi ka mattowana, sabab oreng jareya arosak kahormadanna babine’ Isra’il. Ban pole babine’ jareya kodu teptep daddi binena, ban ta’ olle etellak saomorra.
20Tape mon se earannagi jareya bendher ban tadha’ buktena ja’ binena jareya gi’ paraban e bakto akabin,
21babine’ jareya kodu egiba ka labangnga bengkona oreng towana. E jadhiya lalake’an kottha jareya kodu agarujuk babine’ jareya sampe’ mate. Babine’ jareya la ngalakone barang se mamalo bangsana sengko’ ban ba’na sabab tedhung ban oreng lalake’ e bakto gi’ apolong ban eppa’na. Kalaban okoman se etanggungngagi ka babine’ jareya ba’na matadha’ kajahadan jareya.
22Mon badha oreng lalake’ tajuguk teppa’na tedhung apolong ban binena oreng laen, se kadhuwa jareya kodu eokom mate. Kalaban cara se kantha jareya ba’na matadha’ kajahadan jareya.
23Ompamana e dhalem kottha badha oreng lalake’ se tajuguk teppa’na tedhung apolong ban babine’ se la abakalan oreng laen.
24E dhalem parkara se kantha jareya se kadhuwa jareya kodu egiba ka lowar kottha pas garujuk pasampe’ mate. Babine’ jareya kodu epate’e polana ta’ atharat menta tolong, mangkana kadaddiyan jareya e dhalem kottha, mon atharat tanto ekaedhing bi’ oreng. Ban lalake’ jareya kodu epate’e polana tedhung apolong ban babine’ se la abakalan. Kalaban ngokom se kadhuwa jareya, ba’na matadha’ kajahadan jareya.
25Tape laen mon badha oreng lalake’ e penggirra kottha arosak kalaban paksa babine’ se la abakalan. E dhalem parkara se kantha jareya pera’ lalake’na se kodu eokom mate.
26Babine’na ta’ olle epama-baramma sabab ta’ ngalakone pa-apa se pantes eokom mate. Parkara jareya padha ban parkarana oreng se nyerrang oreng laen sarta pas epate’e.
27Paraban se la abakalan jareya erosak kalaban paksa e penggiranna kottha, maske atharada menta tolong, ta’ kera badha oreng se nolongana.
28Ompamana badha oreng lalake’ tajuguk teppa’na arosak kalaban paksa kahormadanna paraban se gi’ ta’ abakalan.
29E dhalem parkara se kantha jareya lalake’ buru kodu majar ka eppa’na paraban jareya mas kabin se argana saeket pesse salaka. Paraban jareya kodu ekabine, sabab epaksa ekapolong tedhung, ban saomorra ta’ olle etellak.
30Ta’ olle badha oreng ya-nyeya eppa’na kalaban cara tedhung ban sala settonga binena eppa’na."