Dual Panel1"Mara langnge’, edhingngagi sengko’ acaca’a, mara bume, bukka’ kopengnga!
2Moga tang pangajaran padha’a ban ojan se gaggar, tang oca’ padha’a ban capcabba ebbun, akantha rese’ se mabacca rebba e tana, akantha ojan derres se ngenneng ka men-tamennan.
3Sengko’ amolja’agiya PANGERAN. Mara berta’agi kaagunganna Allah.
4PANGERAN reya se abilla ba’na, se parjuga ban bangalan, se adil jalanna. Allahna ba’na reya esto ban ta’ roce, se elampa’agi teppa’ tor becce’.
5Tape ba’na reya bangsa se ta’ esto atena, se roce ban bannya’ dusana, se ta’ pantes daddi ommadda Allah.
6Jareya babalessa ba’na ka PANGERAN, he, reng-oreng budhu se ta’ andhi’ pekkeran? PANGERAN reya gu ta’ ramana ba’na, se nyepta’agi ba’na, se madaddi ba’na settong bangsa.
7Kaenga’e jaman lamba’, pekker jamanna angkadan se la lebat. Tanya’agi ka oreng towana, me’ olle ecareta’agi kabbi ka ba’na.
8E bakto Se Mahatenggi magi tana, saneyap bangsa la etantowagi baba kakobasa’anna ban settong la’-alla’an se neggu’ kobasa.
9Tape toronanna Yakub reya epele PANGERAN menangka kaagunganna Salerana.
10PANGERAN manggi’i reng-oreng jareya teppa’na alalana e kennengngan se seppe e ra-ara, kabbi laju padha ejaga ban epeyara, epasalamet menangka kaagunganna Salerana.
11Akantha ellang se ngajari ngabber budhu’na, budhu’na epega’ bi’ kalembangnga se mekkar pas epanongko’ e bungkella kalembangnga,
12kantha jareya PANGERAN se mimpin ommadda, tadha’ la’-alla’an se abanto Salerana.
13Ommadda epangobasae nong-gunong, reng-oreng jareya ngakan hasella gal-teggal epangenom maddu alas se kalowar dhari gumo’ bato. Reng-oreng jareya olle mennya’ dhari bungkana jaitun se tombu e tana se bannya’ batona.
14Sape ban dumbana padha gus-bagus, bannya’ ngasellagi susu, gandum ban anggurra bagus onggu.
15Ommadda PANGERAN daddi sogi tape dujan aberonta’, kabbi padha po-lempo kakennyangan. PANGERAN se nyepta’agi aba’na eonduri, se parjuga, Panyalamet aba’na, ta’ ekendha’i.
16Reng-oreng jareya nyemba brahala sampe’ PANGERAN tamburuwan panggaliyanna, laju duka polana kajahadanna ommat jareya.
17Reng-oreng jareya ngeba kurban ka roh-erroh jahat se banne Allah, ka la’-alla’an se ta’ ekennal aba’na, la’-alla’an anyar se ta’ ekatako’e bangatowana.
18Allah se parjuga se apareng kasalameddan ekaloppae, PANGERANna se apareng odhi’ ta’ ekaenga’e.
19Ngoladi jareya PANGERAN duka, ta’ kasokan narema tra-pottrana.
20Dhabuna, ‘Sengko’ ta’ nolonga reng-oreng jareya pole; dina etengguwa baramma daddina. Sabab bangsa jareya ce’ cengkalla ban tadha’ estona.
21Sengko’ epatamburuwan ka se banne Allah epapeggel ka arca brahalana. Daddi bi’ Sengko’ Tang ommat epatamburuwana ka settong bangsa se sanyatana banne bangsa, epapeggella ka bangsa se ce’ budhuna.
22Peggella Tang ate padha ban apoy se rabbang ce’ rajana, se makatonon sampe’ ka dunnyana oreng mate. Apoy se makatonon bume ban sakabbinna hasella, sarta nong-gunong sampe’ ka mo’-ramo’na.
23Sengko’ madhatengnga balai se tadha’ ambuna. Tang na-pana eocola ka reng-oreng jareya.
24Reng-oreng jareya bakal mateya polana sake’ panas ban kalaparan, sarta panyaket se talebat berra’na. Bi’ Sengko’ epannengnga me’ olle’ ecarakem burun alas, sarta ecangnga’ olar se mandi opassa.
25E rong-lorong bannya’ oreng mate polana perrang; reng-oreng e bengkona padha katako’an. Ngangodhadan lake’ ban bine’ epamateya, bariya keya babaji’ ban oreng towa.
26Bi’ Sengko’ bangsa jareya epatompessa kabbi, me’ olle ta’ ekaenga’e oreng pole.
27Tape mosona Isra’il ta’ olle gumbira atena sala sangka apangrasa makala Tang ommat,’ mangkana sabendherra Sengko’ se mamosna bangsa jareya.
28Isra’il reya bangsa se ta’ andhi’ pekkeran; ban ta’ andhi’ pangarteyan.
29Ja’ sakenga bicaksana, tanto bangsa jareya ngarte, ban mekker dhi-budhina aba’na.
30Baramma oreng kasorang me’ bisa nyerser oreng saebu, oreng kadhuwa andaddiyagi oreng sapolo ebu padha buru? Sababba tadha’ laen kajabana polana bangsa jareya eonduri PANGERANna; edina bi’ Allahna se parjuga.
31Mosona Isra’il padha tao kabbi, la’-alla’anna ta’ andhi’ kakowadan, ta’ padha ban Allah se alindhunge bangsa Isra’il.
32Mosona Isra’il jahadda padha ban Sodom sarta Gomora, padha ban bungkana anggur se pae’ ban mabu’ buwana.
33Aeng anggurra raconna olar se mandi opassa.
34PANGERAN emot ka lalakonna mosona ommadda, se eokoma mon la napa’ baktona.
35PANGERAN aparenga babales ban okoman ka mosona ommadda jareya; ta’ abit pole bangsa jareya bakal ancora; bakal tompessa tadha’ karena.
36PANGERAN tanto nolong ommadda ban bellas ka para abdina, mon ngoladi ommadda la ta’ bisa apa-rapa ban ta’ andhi’ kakowadan.
37PANGERAN tanto pas atanya ka ommadda, ‘Kemma la’-alla’an se eandellagi ba’na?’
38La’-alla’anna ba’na ngakan gaji tor-atorra ba’na, ban ngenom aeng anggur kurbanna ba’na. Kassa’ soro nolonge ba’na sateya, me’ olle ba’na epalopot dhari calaka’.
39Abassagi, Sengko’ Allah Se Settong, tadha’ allah salaenna Sengko’. Sengko’ mate’e ban maodhi’. maloka ban mabaras. Tadha’ oreng se bisa’a lang-ngalange mon Sengko’ la akarep.
40Demi Sengko’ dibi’, Allah se odhi’, Sengko’ ngangka’ Tang tanang asompa:
41Sengko’ agangseya Tang peddhang epatajemma sampe’ agalirap, Sengko’ aberri’a okoman epaadila. Sengko’ malessa sakabbinna Tang moso ban reng-oreng se baji’ ka Sengko’.
42Tang na-pana bakal buddhaga bi’ dharana Tang so-moso, ban pa-sapa se alaban ka Sengko’ bakal mateya bi’ Tang peddhang. Pa’-sapa’a se ta’ atoro’ ka Sengko’ reya, bi’ Sengko’ ta’ epannengnga; oreng tahanan ban se ka-loka kabbi bakal mateya keya.
43E, sa-bangsa, mara asorak, ngormat ommadda PANGERAN, sabab Pangeran apareng okoman ka pa’-sapa’a se mate’e ommadda. Pangeran males ka mosona tape ommadda esapora dusana."
44Mosa ban Yusak anyanye nyanyeyan jareya, daddi bangsa Isra’il padha ngedhing kabbi.
45Samarena ngajarragi sakabbinna papakonna Pangeran ka bangsa Isra’il,
46Mosa adhabu, "Kaenga’e sakabbinna parenta se eajarragi sengko’ ka ba’na are teya. Ajarragi ka na’-ana’na, sopaja na’-ana’na ba’na jareya ngestowagi sakabbinna Hokomma PANGERAN.
47Pangajaran jareya banne pera’ ca’-oca’ se kosong, tape jareya odhi’na ba’na. Ta’adi sakabbinna papakon jareya, me’ olle ba’na lanjang omor e nagara se ekobasa’ana ba’na e bara’na Songay Yordan rowa."
48E are jareya keya PANGERAN adhabu ka Mosa,
49"Kassa’ ba’na entar ka pagunongan Abarim e nagara Mo’ab e bara’na kottha Yerikho. Dhari jadhiya pas ongga ka Gunong Nebo; dhari kennengngan jareya ba’na ngabas ka nagara Kana’an se bi’ Sengko’ ebagiya ka bangsa Isra’il sakejja’ aggi’.
50Ba’na bakal mateya e gunong jareya, akantha Harun, taretanna ba’na se mate e Gunong Hor rowa,
51sabab ba’na ban Harun ta’ hormat ka Sengko’ e adha’anna bangsa Isra’il, e bakto badha e Somber Meriba, e seddi’na kottha Kades, e ra-ara Zin rowa.
52Daddi ba’na pera’ olle ngabas nagara jareya dhari jauna, ta’ olle noro’ maso’ ka nagara se bi’ Sengko’ ebagi ka bangsa Isra’il jareya."