Dual Panel1"Kom-hokom se eajarragi sengko’ are teya kodu estowagi kabbi sopaja ba’na teptebba odhi’, atamba bannya’ ban bisa’a ngennengnge nagara se ejanjiyagi PANGERAN ka bangatowana ba’na.
2Kaenga’e, pa’ polo taon abidda ba’na epimpin GUSTE Allahna e dhalem parjalanan se jau lebat e ra-ara. Parjalanan jareya bi’ Pangeran emaksottagi nyoba’a ba’na, sopaja Pangeran ngagaliya ka essena atena ba’na, ban pole sopaja etemmo keya apa ba’na ngestowagi papakonna apa enja’.
3Ba’na epanneng sampe’ kalaparan, saellana jareya pas eparenge manna menangka kakanna, ba’na ban para bangatowana sabellunna jareya ta’ tao rassana ngakan kakanan jareya. Maksodda Pangeran ngajara ba’na ja’ manossa reya odhi’na banne dhari kakanan malolo, tape dhari pa-apa se edhabuwagi PANGERAN.
4Pa’ polo taon abidda kalambina ba’na ta’ alpo’ ban sokona ta’ bara.
5Kaenga’e, GUSTE Allahna ba’na ngajari ba’na akantha oreng towa se ngajari ana’na.
6Daddi, lakone sabarang se eparenta’agi GUSTE Allahna ba’na, odhi’ menorot kom-hokom jareya, ban hormadi Salerana.
7GUSTE Allah abakta ba’na ka nagara se landhu, se bannya’ songayya ban bannya’ somberra, se e dhalem tanana agili aeng se nancel ka ra-cora ban ka mo’-gumo’.
8Nagara jareya ngasellagi gandum acem-macem, anggur, buwana ara, dalima, bungkana jaitun ban maddu.
9E jadhiya ba’na ta’ kera kalaparan otaba kakorangan. Bato gunongnga badha bessena, ban mo’-gumo’na mon ekale badha dimbagana.
10Ba’na bakal bisa’a ngakan sanyang-kennyangnga, ban ba’na bakal asokkora ka GUSTE Allahna polana se apareng tana se landhu jareya ka ba’na."
11"Senga’ ja’ sampe’ ba’na loppa ka GUSTE Allahna; ja’ sampe’ ba’na ngenthengngagi kom-hokomma se bi’ sengko’ eajarragi ka ba’na are teya, ja’ enthengngagi maske settonga.
12Mon ba’na la ngakan sampe’ kennyang, ban la andhi’ bengko se bagus se ekennengngana ba’na,
13sarta sape ban dumbana la aba-tamba, bariya keya emmas ban salakana ban dhi’-andhi’na ba’na se laen,
14jaga pateppa’ ja’ sampe’ ba’na sombong sarta loppa ka GUSTE Allahna se mabebas ba’na dhari Messer, kennengnganna ba’na ekadunor oreng.
15Pangeran mimpin ba’na lebat e ra-ara se lebar tor nako’e, se bannya’ olarra ban kalajengkingnga. E tana se kerreng se tadha’ aengnga rowa Pangeran magili aeng dhari dhalem bato sopaja ba’na bisa’a ngenom satobugga.
16E ra-ara ba’na eparenge manna se daddi kakanna, bangatowana ba’na dibi’ ta’ tao rassana ngakan kakanan jareya. Ba’na epakantha jareya polana Pangeran ngojiya ba’na, sopaja dhi-budhina Pangeran bisa’a apareng kabecce’an ka ba’na.
17Daddi ba’na ja’ sampe’ apekker ja’ ba’na daddi sogi ollena ehteyarra ban kakowadanna dibi’.
18Kaenga’e ja’ se masogi ba’na jareya GUSTE Allahna. Salerana apareng jareya polana sampe’ sateya Salerana gi’ esto ka parjanjiyanna ban bangatowana ba’na.
19Ja’ sampe’ ba’na loppa ka GUSTE Allahna, ban ja’ sampe’ ba’na nyemba ban ngabdi ka la’-alla’an. Sateya sengko’ maenga’a ka ba’na, ja’ mon ba’na sampe’ atengka kantha jareya, ba’na tanto epatompes bi’ Pangeran.
20Mon ba’na ta’ ta’at ka GUSTE Allahna, ba’na tanto epatompes epakantha sa-bangsa laen se epatompes e adha’na matana ba’na."